پيدائيش 20

اڀراھيم ھانَ ابيملڪ بادشاھ

پَڇي اڀراھيم اوٿ ݾون ڪنعان مُلڪ رَي ڏکڻ رَي علائقَي ۾ گيو ھانَ سفر ڪرتو قادس ھانَ شُور علائقَي رَي بِچ ۾ جرار شھر ۾ آئي ريوَڻ لاگو۔ ‏2 اوٿ اُوئي آپرِي لُگائِي ݾارون رَي بارَي ۾ ڪھيو ڪہ، ”اَي مھارِي ٻين ھَي۔“ اِيئي تي جرار شھر رَي بادشاھ ابيملڪ بيئان ڪرڻ رَي ݾارُو ݾارون نَي آپرِي محلات ۾ اَڻائِي۔ ‏3 پڻ ھيڪ رات ايشوَر ابيملڪ بادشاھ نَي ݾپنَي ۾ آئي ڪھيو ڪہ، ”جڪِي لُگائِي نَي ٿَي اَڻائِي ھَي، اُوئي رَي ڪري تُو مري جائِي، ڪيونڪہ او ڪَي ٻيجَي رِي لُگائِي ھَي۔“ ‏4 پڻ اَڃون توڻي ابيملڪ بادشاھ ݾارون نَي ھاٿ ڀِي ڪونھي لگايو ھتو۔ اِيئي رَي ڪري اُوئي ڪھيو ڪہ، ”اي مالڪ، ھُون تو بي ڏوھي ھون۔ ڪِي پَڇي ڀِي تُو مھنَي ھانَ مھارِي قوم نَي مارِي؟ ‏5 اڀراھيم آپ مھنَي ڪھيو ھتو ڪہ، ’او مھارِي ٻين ھَي۔‘ ھانَ اُوئي رِي لُگائِي آپ ڪھيو ھتو ڪہ، ’او مھارو ڀائي ھَي۔‘ اِيئي ۾ مھارو ڪو ڀِي ڏوھ ڪونھي، مھَي تو اُوئي نَي ݾُٺِي نيت ݾون بيئان ڪرڻ رَي ݾارُو اَڻائِي ھتِي۔“ ‏6 ايشوَر اُوئي نَي ݾپنَي ۾ ڪھيو ڪہ، ”ھاوي، مھنَي خبر ھَي ڪہ ٿَي اَي ڪوم نيڪ نيت ݾون ڪيئو ھَي، اِيئي رَي ڪري مھَي ٿنَي پاليو ڪہ تُو اُوئي نَي ھاٿ نِي لگاوَي ھانَ مھارَي خلاف پاپ نِي ڪرَي۔ ‏7 ھمَي تُو اڀراھيم نَي اُوئي رِي لُگائِي پاڇِي ڏي، ڪيونڪہ او نبِي ھَي۔ او ٿارَي ݾارُو پراٿنا ڪرشَي ھانَ تُو ڪونھي مرَي۔ پڻ جي تُو اِيئون ڪونھي ڪرَي، تو پَڇي پڪ ھَي ڪہ تُو ھانَ ٿارا ݾجائِي مِنک ضرُور مرشو۔“

‏8 پَڇي ابيملڪ بادشاھ ݾاڪݪي تارھي اُٺي آپرَي ݾجَي وزيرون نَي اَڻايا ھانَ ݾجِي بات ݾُڻائِي۔ اِيئي تي او تموم گھڻا ٻيئاجا۔ ‏9 پَڇي ابيملڪ بادشاھ اڀراھيم نَي اَڻائي ڪھيو ڪہ، ”ٿَي مھون ݾون اَي ڪِي ڪيئو؟ مھَي ٿارو ڪھڙو ڏوھ ڪيئو ھَي، جڪو ٿَي مھَي تي ھانَ مھارِي بادشاھي تي اترَي موٽَي پاپ رو الزوم لگايو۔ جڪو ڪئين ٿَي مھَي ݾون ڪيئو ھَي، اَي ٿنَي نِي ڪرڻو ھتو۔ ‏10 ٿَي اھڙو ڪوم ڪيئون ڪيئو؟“ ‏11 اڀراھيم بݪتِي ڏينِي ڪہ، ”مھَي ݾوچو ڪہ ايٿ ڪو ڀِي ايشوَر رو ٻِي ڪونھي راکتو ھانَ او مھارِي لُگائِي نَي کوݾڻ رَي ݾارُو مھنَي ماري ڇوڙشَي۔ ‏12 اَي بات ݾاچِي ھَي ڪہ اَي مھارِي لُگائِي ھَي، پڻ او مھارِي ٻين ڀِي ھَي، ڪيونڪہ مھورو ٻاپ ھيڪ ھَي، پڻ مائون ڌار ڌار ھَي۔ ‏13 اِيئي رَي ڪري جڏي ايشوَر مھنَي ڪھيو ڪہ آپرَي ٻاپ رو گھر ڇوڙي پرديس ۾ جا، تو اُوئيج ڏِن مھَي آپرِي لُگائِي نَي ݾَمجھائِي ڪہ مھربونِي ڪري جيٿ ڀِي آپي ھالون، اوٿ مھارَي ڪري اَي ڪئي ڪہ اَي مھارو ڀائي ھَي۔“

‏14 پَڇي ابيملڪ بادشاھ اڀراھيم رِي لُگائِي اُوئي نَي پاڇِي ڏينِي۔ اُوئي اڀراھيم نَي رڍون ٻڪرَي، ڍگا ڍگَي، ٻونھَي ھانَ غُلوم ڏينا۔ ‏15 پَڇي ابيملڪ بادشاھ ڪھيو ڪہ، ”جو، مھارو مُلڪ ٿَي آگھي ھَي، جيٿ ٿنَي ڀلو لاگَي، اوٿ جائي رَي۔“ ‏16 پَڇي اُوئي ݾارون نَي ڪھيو ڪہ، ”مھَي اَڻ ݾمجھ ۾ اِيئو ڪيئو، تو ڀِي مھَي ٿارَي ڀائي نَي چوندِي را ھيڪ ھزار ݾِڪا ڏينا ھَي ڪہ جڪو مِنک ٿَي ڀيڙا ھَي، اُوئون ݾجون رَي رُوبرو اَي ثابُوتِي ھووَي ڪہ تُو بي داگ ھَي۔“

‏17 پَڇي اڀراھيم ايشوَر ݾون پراٿنا ڪِي ھانَ ايشوَر ابيملڪ بادشاھ، اُوئي رِي لُگائِي ھانَ اُوئي رَي ٻونھيون نَي شفا ڏينِي ھانَ اُوئون را ڀڙي اولاد ھوئڻ لاگا۔ ‏18 اِيئي ݾون پيل پرميشوَر ابيملڪ بادشاھ نَي سزا ڏينِي ھتِي ڪہ اُوئي رَي محل ۾ ريوَڻ آݪَي ݾجَي لُگايون را ٻاݪ ھوئڻ بند ھويا ھتا، ڪيونڪہ اُوئي اڀراھيم رِي لُگائِي ݾارون ݾون بيئان ڪرڻ رَي ݾارُو آپرَي محل ۾ راکِي ھتِي۔