پيدائيش 18

اڀراھيم را ميموڻ

ھيڪ ڏِن پرميشوَر اڀراھيم نَي درشن ڏينو۔ اُوئي ٽيم اڀراھيم بلُوط رَي بَڻون ڪڍي ريتو، جڪو ممري نون رَي مِنک رِي ٻنِي تي ھتا۔ او ٻيپار رو آپرَي تنٻُو رَي در تي ٻيٺو ھتو۔ ‏2 پَڇي اڀراھيم ڏيٺو ڪہ آپ ݾومھا تين مِنک اُڀا ھَي، تو او اُوئون نَي ڏيکي ڇيڪو ڇيڪو گيو ھانَ زمين توڻي جُھڪي اُوئون ݾون مِليو۔ ‏3 پَڇي اُوئون نَي ڪھيو ڪہ، ”مھارا مالڪ، مھربونِي ڪري مھارَي گھري ھالو ھانَ مھنَي آپرِي شيوا رو موقعيو ڏيئو۔ ‏4 ھُون پوڻي لي آئُون ھون، ٿي آپرا ھاٿ پگ ڌوئي بَڻ ھيٺا آروم ڪرو۔ ‏5 ٿي مھارَي گھري آيا ھانَ مھنَي عِزت ڏينِي، اِيئي رَي ڪري ھمَي مھنَي شيوا رو موقعيو ڏيئو۔ ٿي ڪئين آروم ڪرو، تو ھُون ٻاٽِي لي آئُون ھون۔ ٿي ٻاٽِي کائو، پَڇي جي ٿونَي تڪڙ ھَي، تو ڀلي بُوئا جايا۔“ پَڇي اُوئون ڪھيو ڪہ، ”جون ٿارِي مرضِي۔“ ‏6 پَڇي اڀراھيم ڇيڪو ڇيڪو تنٻُو ۾ گيو ھانَ آپرِي لُگائِي ݾارون نَي ڪھيو ڪہ، ”ڇيڪِي ھو ݾُٺو آٽو لَي، گو ھانَ تينون مِنکون رِي ٻاٽِي گَھڙ۔“ ‏7 پَڇي اڀراھيم ڇيڪو ڇيڪو آپرَي ڌڻ ڏيݾا گيو ھانَ ݾجون ݾون ڀلو ٽوگھڙو لائي آپرَي نوڪر نَي ڏينو ھانَ اُوئي ڇيڪائِي ڪري رڌ پچا ڪيئو۔ ‏8 پَڇي اڀراھيم ڏئِي، ڏُوڌ ھانَ موݾ لائي ميموڻون آگھي راکيو ھانَ جترِي توڻي اُوئون ٻاٽِي ڪونھي کاڌِي، اُترِي توڻي اڀراھيم اُوئون رِي شيوا ۾ بَڻ ھيٺا اُڀو رھيو۔ ‏9 پَڇي اُوئون اڀراھيم ݾون پُوڇو ڪہ، ”ٿارِي لُگائِي ݾارون ڪيٿ ھَي؟“ اُوئي ڪھيو ڪہ، ”او تنٻُو ۾ ھَي۔“ ‏10 اِيئي تي پرميشوَر ڪھيو ڪہ، ”ھُون آوڻ آݪَي ݾال ڀڙي پاڇو آئين ھانَ اُوئون ڏِنون ۾ ٿارِي لُگائِي ݾارون نَي ڏيڪرو ھوشَي۔“ ݾارون تنٻُو رَي در ڪڍي ميموڻون لاري ٻيٺِي ھتِي ھانَ اُوئون رَي باتون ݾُڻتِي پڙِي۔ ‏11 اڀراھيم ھانَ ݾارون بُوڍا ھتا ھانَ ݾارون رِي عُمر ٻاݪ جِڻڻ جھڙِي ڪونھي ھتِي۔ ‏12 اِيئي تي ݾارون آپرَي من ۾ ھاݾِي ھانَ ݾوچو ڪہ، ”ھمَي تو ھُون بُوڍِي ھون، مھارو ڌڻِي ڀِي بُوڍو ھَي۔ ڪِي مھنَي اَي خُوشِي مِلي ݾگھَي ھَي؟“ ‏13 پَڇي پرميشوَر اڀراھيم نَي ڪھيو ڪہ، ”ݾارون من ۾ ھاݾي اَي ڪيئون ڪھيو ڪہ، ’ڪِي مھَي بُوڍِي ݾون ڀِي ڏيڪرو ھوشَي؟‘ ‏14 ھُون تو پرميشوَر ھون، مھارَي ݾارُو ڪو ڀِي بات ڏُکِي ڪونھي۔ جون مھَي ڪھيو ھَي، ھُون آوڻ آݪَي ݾال آئين ھانَ اُوئون ڏِنون ۾ ٿارِي لُگائِي ݾارون نَي ضرُور ڏيڪرو ھوشَي۔“ ‏15 اَي بات ݾُڻي ݾارون ٻيئاجِي ھانَ نا ڪري ڪھيو ڪہ، ”ھُون تو ڪونھي ھاݾِي۔“ پڻ پرميشوَر ڪھيو ڪہ، ”نا، تُو ݾاچيلي ھاݾِي ھَي۔“

سدُوم شھر رَي ݾارُو اڀراھيم رِي مِنٿ

‏16 پَڇي او ميموڻ اُٺيا ھانَ سدُوم شھر ڏيݾا بَئير ھويا ھانَ اڀراھيم اُوئون نَي موڪل ڏيوَڻ رَي ݾارُو اُوئون ڀيڙو گيو۔ ‏17 پَڇي پرميشوَر آپرَي من ۾ ڪھيو ڪہ، ”جڪو ڪئين ھُون ڪرڻ آݪو ھون، او ھُون اڀراھيم نَي ݾُڻائين۔ ‏18 ڪيونڪہ پڪِي بات ھَي ڪہ اڀراھيم ݾون ھيڪ موٽِي ھانَ طاقت آݪِي قوم ٺيشَي ھانَ ڌرتي رَي ݾجَي قومون نَي اڀراھيم رَي وسيلَي برڪت ملشَي۔ ‏19 مھَي اُوئي نَي اِيئي رَي ڪري چُونڊيو ھَي ڪہ او آپرَي ڏيڪرون ھانَ آپرِي پيڙھِي نَي ݾيکاوَي ڪہ او ݾچائي ھانَ اِنصاف ݾون مھارَي ڪيوَڻ تي بيتا رَي۔ جي او اِيئون ڪرشَي، تو ھُون اڀراھيم ݾون ڪيئوڙو آپرو واعدو پُورو ڪرين۔“ ‏20 پَڇي پرميشوَر اڀراھيم نَي ڪھيو ڪہ، ”مھَي ݾُڻيو ھَي ڪہ سدُوم ھانَ عمُورا را مِنک حد ݾون وڌيڪ ظُلمي ھَي ھانَ اُوئون را پاپ تموم گھڻا بڌي گيا ھَي۔ ‏21 اِيئي رَي ڪري ھمَي ھُون اوٿ جائي جوئين ڪہ جون مھَي ݾُڻيو ھَي، ڪِي او ݾاچِي بات ھَي، جون نا۔“

‏22 پَڇي اُوئون ميموڻون ۾ ٻي مِنک سدُوم شھر ڏيݾا گيا، پڻ پرميشوَر اڀراھيم ڀيڙو اُڀو رھيو۔ ‏23 اِيئي تي اڀراھيم پرميشوَر ݾون پُوڇو ڪہ، ”ڪِي تو ݾاچيلي نيڪ مِنکون نَي بُڇڙون ڀيڙو ماري ڇوڙِي؟ ‏24 جي اُوئي شھر ۾ پنجاھ نيڪ مِنک ھووَي، تو ڪِي تُو ݾجو شھر برباد ڪري ڇوڙِي؟ ڪِي تُو اُوئون پنجاھ نيڪ مِنکون رَي ڪري اُوئون نَي معاف ڪونھي ڪرَي؟ ‏25 اَي ھوئي ڪونھي ݾگھتو ڪہ تُو بُڇڙون ڀيڙا نيڪ مِنک ڀِي ماري ڇوڙَي۔ جي تُو اِيئون ڪرِي، تو نيڪ ھانَ بُڇڙَي ۾ ڪھڙو فرق؟ تُو جڪو ݾجِي دُنيا رو اِنصاف ڪرڻ آݪو ھَي، ڪِي تُو اِيئي بات رو اِنصاف ڪونھي ڪرَي؟“ ‏26 پرميشوَر بݪتِي ڏينِي ڪہ، ”جي سدُوم شھر ۾ پنجاھ نيڪ مِنک ڀِي ھويا، تو ڀِي ھُون اُوئون رَي ڪري ݾجَي شھر نَي معاف ڪرين۔“ ‏27 پَڇي اڀراھيم مِنٿ ڪري ڪھيو ڪہ، ”اي پرميشوَر، مھنَي معاف ڪر، ڪيونڪہ مھَي مٽِي ھانَ راک ھوتَي، ٿَي ݾون ٻولڻ رِي ھِمت ڪِي۔ ‏28 ھوئي ݾگھَي ڪہ اُوئي شھر ۾ پنجيتالي نيڪ مِنک ھووَي، تو پَڇي ڪِي تُو پونچ مِنک گھٽ ھوئڻ رَي ڪري ݾجو شھر برباد ڪري ڇوڙِي؟“ پرميشوَر بݪتِي ڏينِي ڪہ، ”جي اوٿ پنجيتالي نيڪ مِنک ھويا، تو ڀِي ھُون ݾجو شھر برباد ڪونھي ڪرون۔“ ‏29 اڀراھيم ڀڙي مِنٿ ڪري ڪھيو ڪہ، ”ھوئي ݾگھَي ڪہ اوٿ رُگو چاليھ نيڪ مِنک ھووَي۔“ پرميشوَر بݪتِي ڏينِي ڪہ، ”جي اوٿ چاليھ نيڪ مِنک ھويا، تو ڀِي ھُون ݾجو شھر برباد ڪونھي ڪرون۔“ ‏30 اڀراھيم مِنٿ ڪِي ڪہ، ”اي پرميشوَر، جي تُو ناراض نِي ھووَي، تو ھُون ھيڪ گُھمرو ڀڙي ڪئين ڪونھ۔ جي اوٿ رُگو ٽيھ نيڪ مِنک ھووَي، تو؟“ پرميشوَر بݪتِي ڏينِي ڪہ، ”جي اوٿ رُگو ٽيھ نيڪ مِنک ھووَي، تو ھُون اِيئون ڪونھي ڪرون۔“ ‏31 اڀراھيم ڀڙي مِنٿ ڪِي ڪہ، ”اي پرميشوَر مھنَي معاف ڪر ڪہ مھَي ٿَي ݾون ٻولڻ رِي ھِمت ڪِي۔ جي اوٿ رُگو بيݾ نيڪ مِنک ھووَي، تو؟“ پرميشوَر بݪتِي ڏينِي ڪہ، ”جي اوٿ رُگو بيݾ نيڪ مِنک ھووَي، تو ھُون اِيئون ڪونھي ڪرون۔“ ‏32 اڀراھيم ھيڪ گُھمرو ڀڙي مِنٿ ڪِي ڪہ، ”اي مالڪ، جي تُو ناراض نِي ھووَي، تو ھُون ھيڪ گُھمرو ڀڙي ڪئين ڪونھ۔ ھوئي ݾگھَي ڪہ اوٿ رُگو ڏَݾ نيڪ مِنک ملَي۔“ پرميشوَر بݪتِي ڏينِي ڪہ، ”جي اوٿ رُگو ڏَݾ نيڪ مِنک ھووَي، تو ڀِي ھُون اُوئون نَي برباد ڪونھي ڪرون۔“ ‏33 پَڇي جڏي پرميشوَر اڀراھيم ݾون باتون ڪري ھئو ڪيئو، تو اوٿ ݾون بُوئو گيو ھانَ اڀراھيم آپرَي گھري پاڇو آيو۔