پيدائيش 17

ايشوَر رو اڀرام رو نون بدلاوڻ

جڏي اڀرام نَوانوي ݾالون رو ھويو، تو پرميشوَر اڀرام نَي درشن ڏي ڪھيو ڪہ، ”ھُون قُدرت آݪو ايشوَر ھون۔ تُو مھارِي مرضِي تي بَي ھانَ نيڪ ڪوم ڪرتو رَي، ‏2 تو ھُون ٿَي ݾون وچن ڪرين ھانَ ٿارا اولاد تموم گھڻا بڌائين۔“ ‏3 اِيئي تي اڀرام ايشوَر آگھي شيش نِمايو۔ پَڇي ايشوَر اُوئي نَي ڪھيو ڪہ، ‏4 ”جو، مھارو ٿَي ݾون اَي وچن ھَي ڪہ تُو تموم گھڻَي قومون رو ڏاڏو ھوئِي۔ ‏5 آج ݾون ٿارو نون اڀرام نا، پڻ اڀراھيم ھوشَي، ڪيونڪہ ھُون ٿنَي تموم گھڻَي قومون رو ڏاڏو ٺائين۔ ‏6 ھُون ٿنَي تموم گھڻا اولاد ڏئين ھانَ اُوئون ݾون تموم گھڻَي قومون ھانَ تموم گھڻا بادشاھ ھوشَي۔ ‏7 مھارو اَي وچن ٿَي ݾون، ٿَي ݾون پَڇي ٿارِي اولاد ݾون ھانَ اُوئون رِي ݾجِي پيڙھِي ݾون ھميشا توڻي بيتو ريشَي ھانَ ھُون ٿارو ھانَ ٿارَي اولادون رو ايشوَر ھوئين۔ ‏8 ھُون ڪنعان رو اَي ݾجو مُلڪ، جڪَي ۾ تُو پرديسي ھَي، ٿنَي ھانَ ٿَي ݾون پَڇي، ٿارَي اولادون نَي ھميشا رَي ݾارُو ڏئين ھانَ ھُون اُوئون رو ايشوَر ھوئين۔“

کَتنو وچن رو نِشون

‏9 پَڇي ايشوَر اڀراھيم نَي ڪھيو ڪہ، ”ٿنَي ھانَ ٿارِي نسل نَي ݾجِي پيڙھِي توڻي اَي وچن پُورو ڪرڻو پڙشَي۔ ‏10 جڪو وچن مھارَي ھانَ ٿارَي بِچ ۾ ھَي ھانَ ٿَي ݾون پَڇي، ٿارِي نسل رَي بِچ ۾ ھوشَي، ٿي اَي وچن ھميشا منتا رھيا، اُوئي رو اَي نِشون ھَي ڪہ ٿون ۾ ھر ھيڪ آڏمي رو کَتنو ڪيئو جاوَي۔ ‏11 ٿون ۾ ھر ھيڪ آڏمي آپرو کَتنو ڪراوَي، جڪو مھارَي ھانَ ٿونرَي بِچ ۾ اُوئي وچن رو نِشون ھوشَي۔ ‏12 آج ݾون لي ھر ھيڪ ڇوڪرو جڏي او آٺون ڏِنون رو ھووَي، تو اُوئي رو کَتنو ڪيئو جاوَي۔ اِيئون ۾ ٿارا غُلوم ڀِي شامل ھَي، بيشڪ او ٿارَي غُلومون ݾون جايا ھووَي، جون او مول ليئوڙا ھووَي۔ ‏13 ھر ھيڪ ڇوڪرَي رو کَتنو ضرُور ڪيئو جاوَي۔ اَي ھميشا رَي ݾارُو جِسموني نِشون ھوشَي، جڪَي ݾون خبر پڙشَي ڪہ ٿون ݾون مھارو وچن ھميشا رَي ݾارُو ھَي۔ ‏14 جڪَي آڏمي رو کَتنو ڪونھي ھويوڙو، اُوئي نَي آپرَي مِنکون ݾون ڪاڍيو جاوَي، ڪيونڪہ اُوئي مھارو وچن پُورو ڪونھي ڪيئو۔“

اضحاق رَي جنم رو واعدو

‏15 پَڇي ايشوَر اڀراھيم نَي ڪھيو ڪہ، ”آج ݾون پَڇي، ٿارِي لُگائِي رو نون ݾاري نا، پڻ ’ݾارون‘ ھوشَي۔ (ݾارون رو مطلب ھَي، ’روڻِي۔‘) ‏16 ھُون اُوئي نَي برڪت ڏئين ھانَ اُوئي ݾون ٿارو ڏيڪرو ھوشَي۔ ھُون اُوئي نَي اترِي برڪت ڏئين ڪہ او قومون رِي ڏاڏِي ھوشَي ھانَ اُوئي رَي اولادون ݾون قومون را بادشاھ ھوشَي۔“ ‏17 اِيئي تي ڀڙي اڀراھيم ايشوَر آگھي شيش نِمايو ھانَ ھَݾي من ۾ ڪيوَڻ لاگو ڪہ، ”ڪِي ݾئو ݾال رَي ڏوڪرَي ھانَ نَوي ݾال رِي ڏوڪرِي ݾون ڏيڪرو ھوشَي؟“ ‏18 اڀراھيم ايشوَر نَي ڪھيو ڪہ، ”جي ھوئي ݾگھَي، تو اِسماعيل نَي مھارو بارݾ ڪر۔“ ‏19 پڻ ايشوَر ڪھيو ڪہ، ”نا، اِيئون ڪونھي ھووَي، پڻ ٿارِي لُگائِي ݾارون ݾون ٿارو ڏيڪرو ضرُور ھوشَي ھانَ تُو اُوئي رو نون اضحاق راکي، جڪَي رو مطلب ھَي، ’ھَݾڻ۔‘ مھارو وچن اضحاق ݾون ھانَ اُوئي رَي اولادون ݾون ھميشا توڻي بيتو ريشَي۔ ‏20 ھمَي رئِي اِسماعيل رِي بات، تو اُوئي رَي ݾارُو ڀِي مھَي ٿارِي مِنٿ ݾُڻِي ھَي۔ ھُون اُوئي نَي برڪت ڏئين ھانَ اُوئي را ڀِي تموم گھڻا اولاد ھوشَي۔ اُوئي رَي اولادون ݾون ٻارھَي ݾردار ھوشَي ھانَ ھُون اُوئي نَي ھيڪ موٽِي قوم ٺائين۔ ‏21 پڻ مھارو وچن اضحاق ݾون ھوشَي۔ ھيڪَي ݾال ݾون پَڇي، اِيئوج ڏِنون ۾ ݾارون اضحاق نَي جنم ڏيشَي۔“ ‏22 جڏي ايشوَر اڀراھيم ݾون باتون ڪري ھئو ڪيئو، تو اوٿ ݾون آڪاش تي بُوئو گيو۔ ‏23 پَڇي اُوئيج ڏِن، اڀراھيم ايشوَر رَي حُڪم تي آپرَي ڏيڪرَي اِسماعيل ھانَ ݾجَي آڏميون رو کَتنو ڪيئو، جڪون ۾ ݾجائِي غُلوم ڀِي شامل ھتا، بيشڪ او جڪو اُوئي رَي گھر ۾ جايا ھتا، جون مول ليئوڙا ھتا۔ ‏24 جڏي اڀراھيم رو کَتنو ھويو، تو اُوئي رِي عُمر نَوانوي ݾال ھتِي۔ ‏25 جڏي اِسماعيل رو کَتنو ھويو، تو اُوئي رِي عُمر تيرھَي ݾال ھتِي۔ ‏26 اڀراھيم ھانَ اُوئي رَي ڏيڪرَي اِسماعيل رو کَتنو ھيڪَي ئِي ڏِن ھويو ‏27 ھانَ اُوئي رَي گھر ۾ جايوڙَي ھانَ مول ليئوڙَي ݾجَي غُلومون رو کَتنو ڀِي اُوئيج ڏِن ھويو۔