اِسماعيل رو جنم
16
اڀرام رِي لُگائِي ݾاري نَي اَڃون توڻي ڪو ڀِي اولاد ڪونھي ھويو۔ ݾاري رِي ھيڪ ٻونھِي ھتِي، جڪَي رو نون ھاجرا ھتو، اَي مِصر مُلڪ رِي ھتِي۔ 2 ݾاري اڀرام نَي ڪھيو ڪہ، ”جو، پرميشوَر مھنَي اولاد تو ڪونھي ڏينا، اِيئي رَي ڪري تُو مھارِي ٻونھِي ڪڍي جا۔ ھوئي ݾگھَي ڪہ اُوئي ݾون مھارَي ݾارُو اولاد ھووَي۔“ اڀرام ݾاري رِي بات منِي۔3 پَڇي اِيئون ھويو ڪہ اڀرام آپرِي لُگائِي ݾاري رَي ڪيوَڻ تي اُوئي رِي مِصري ٻونھِي ھاجرا ݾون بيئان ڪيئو۔ اُوئي ٽيم اڀرام نَي ڪنعان مُلڪ ۾ ريتَي ڏَݾ ݾال ھويا ھتا۔ 4 پَڇي اڀرام ھاجرا ڪڍي گيو ھانَ او اُميد ݾون ھوئِي۔ جڏي ھاجرا نَي خبر پڙِي ڪہ او اُميد ݾون ھَي، تو او آپرِي مالڪيوڻِي ݾاري نَي آپ ݾون گھٽ ݾمجھڻ لاگِي۔ 5 اِيئي تي ݾاري اڀرام نَي ڪھيو ڪہ، ”جڪو ظُلم مھَي تي ھووَي پڙيو، او ݾجو ٿارَي ڪرَي ھَي۔ مھَي آپ ٿنَي آپرِي ٻونھِي ڏينِي ھتِي، پڻ جڏي او اُميد ݾون ھَي، اُوئي ٽيم ݾون او مھنَي گھٽ ݾمجَھي ھَي۔ ھمَي پرميشوَر اِنصاف ڪرَي ڪہ آپون ۾ ڪُڻ حق تي ھَي۔“ 6 اڀرام ݾاري نَي ڪھيو ڪہ، ”ٿارِي ٻونھِي تو ٿارَي ھاٿ ۾ ھَي، جون وڻَي، اِيئوج ڪر۔“ پَڇي ݾاري ھاجرا ݾون اِترو تو ظُلم ڪيئو ڪہ او اوٿ ݾون ناٺِي۔
7 پَڇي پرميشوَر رَي فريشتَي رڻ پَٽ ۾ ھاجرا نَي اُوئي کُوھ ڪڍي درشن ڏينو، جڪو شُور علائقَي رَي مارگ تي ھَي۔ 8 اُوئي ھاجرا ݾون پُوڇو ڪہ، ”ݾاري رِي ٻونھِي ھاجرا، تُو ڪيٿ ݾون آئِي ھَي ھانَ ڪيئا جاوَي پڙِي؟“ ھاجرا ڪھيو ڪہ، ”ھُون آپرِي مالڪيوڻِي ݾاري ݾون ناݾي آئِي ھون۔“ 9 پرميشوَر رَي فريشتَي اُوئي نَي ڪھيو ڪہ، ”تُو آپرِي مالڪيوڻِي ڪڍي پاڇِي جا ھانَ اُوئي رِي بات من۔ 10 ھُون ٿارا اولاد اِترا تو بڌائين ڪہ ڪو ڀِي اُوئون نَي گِڻي ڪونھي ݾگھَي۔
11 تُو اُميد ݾون ھَي ھانَ ٿنَي ڏيڪرو ھوشَي،
تُو اُوئي رو نون اِسماعيل راکي،
جڪَي رو مطلب ھَي، ’ايشوَر ݾُڻَي ھَي۔‘
ڪيونڪہ پرميشوَر ٿارِي فرياد ݾُڻِي ھَي۔
12 جون جھنگلِي گڏو آزاد رَي ھَي،
اُوئيج نمُونَي ٿارو ڏيڪرو ڀِي آزاد ھانَ آپرِي مرضِي ݾون ريشَي۔
او ݾجون رَي خلاف ھانَ ݾجائِي اُوئي رَي خلاف ھوشَي۔
ھانَ او ݾجِي حياتِي آپرَي ݾجَي ڀايون رو دُشمن ريشَي۔“
13 پَڇي ھاجرا آپرَي من ۾ ݾوچڻ لاگِي ڪہ،”مھَي پرميشوَر نَي ڏيٺو ھَي، تو ڀِي ھُون جيتِي ھون۔“ اُوئي پرميشوَر رو نون ايل روئي راکيو، جڪَي رو مطلب ھَي، ”ايشوَر ݾجو ڪئين ڏيکَي ھَي۔“ 14 اِيئي رَي ڪري مِنک اُوئي کُوھ نَي بيرلحي روئي، ”ݾجو ڪئين ڏيکڻ آݪَي ايشوَر رو کُوھ“ ڪَي ھَي۔ اَي کُوھ قادس ھانَ بِرد شھر رَي بِچ ۾ ھَي۔