پيدائيش 15

اڀرام ݾون ايشوَر رو وچن

اِيئون باتون ݾون پَڇي، پرميشوَر اڀرام نَي ݾپنَي ۾ ڪھيو ڪہ، ”اڀرام تُو نِي ٻيئاج، ھُون ٿارِي ݾنڀال ڪرين ھانَ ٿنَي تموم گھڻِي برڪت ڏئين۔“ ‏2 اڀرام ڪھيو ڪہ، ”اي پرميشوَر ھُون اھڙِي برڪت نَي ڪِي ڪرين، ڪيونڪہ ھُون تو بي اولاد مري جائين ھانَ مھارَي گھر رو بارݾ مھارو خاص نوڪر اليعزر ھوشَي، جڪو دمشق شھر رو ھَي۔ ‏3 جو، ٿَي مھنَي ڪو ڀِي اولاد ڪونھي ڏينو، اِيئي رَي ڪري مھارو نوڪر مھارَي گھر رو بارݾ ھوشَي۔“ ‏4 اِيئي تي پرميشوَر اڀرام نَي ڪھيو ڪہ، ”اليعزر ٿارَي گھر رو بارݾ ڪونھي ھووَي، پڻ ٿارو آپرو ڏيڪرو ٿارَي گھر رو بارݾ ھوشَي۔“ ‏5 پَڇي پرميشوَر اڀرام نَي ٻاھر لي گيو ھانَ ڪھيو ڪہ، ”ھمَي آڪاش ڏيݾا جو، جي تُو تارون نَي گِڻي ݾگھَي ھَي، تو گِڻ، ٿارا اولاد ڀِي اِيئون تارون جِترا ھوشَي۔“ ‏6 اِيئي تي اڀرام پرميشوَر رِي اِيئي بات رو وِشواس ڪيئو، اِيئي رَي ڪري پرميشوَر اُوئي نَي نيڪ مِنکون ۾ گِڻيو۔

‏7 پَڇي پرميشوَر اُوئي نَي ڪھيو ڪہ، ”ھُونج پرميشوَر ھون، جڪو ٿنَي ڪسدِي قوم رَي اُور شھر ݾون ڪاڍي لايو ھون ڪہ ٿنَي اِيئي مُلڪ رو مالڪ ٺائُون۔“ ‏8 پَڇي اڀرام ڪھيو ڪہ، ”اي پرميشوَر مھنَي ڪيڪر خبر پڙشَي ڪہ ھُون اِيئي مُلڪ رو مالڪ ھوئين؟“ ‏9 پرميشوَر اُوئي نَي ڪھيو ڪہ، ”اِيئي رَي ڪري تُو ھيڪ ٽوگھڙِي، ھيڪ ٻڪرِي ھانَ ھيڪ گھيٽو لَي، جڪو تينون تينون ݾالون را ھووَي ھانَ ھيڪ ڪٻُوتر رو ٻچيو ھانَ ھيڪ گيرِي لَي۔“ ‏10 اڀرام او ݾجائِي لي آيو ھانَ ريت تي پکيون ݾون ٽاݪ ٻيجَي جِنارون را بِچ ݾون ٻي حِصا ڪيئا ھانَ اَي حِصا اومھا ݾومھا راکيا۔ ‏11 پَڇي گِريجون اِيئي جِنارون را حِصا کاوڻ رَي ݾارُو اُتري آئَي، پڻ اڀرام اُوئون نَي اُڏاوتو رھيو۔

‏12 ڏِن آٿوئڻ رَي ٽيم اڀرام نَي تموم گھڻِي اُونگ آئِي ھانَ اِيئون لاگو ڪہ اُوئي آگھي گھور انڌارو ھَي۔ ‏13 پَڇي ايشوَر اڀرام نَي ڪھيو ڪہ، ”ٿارِي پيڙھِي غير مُلڪ ۾ پرديسي ھوشَي، اُوئون نَي غُلوم ٺاھيا جاشَي ھانَ او چار ݾئو ݾال ڏُک ڏيکشَي۔ ‏14 ھُون اُوئي قوم نَي سزا ڏئين، جڪو اُوئون نَي غُلوم ٺاشَي ھانَ جڏي او اُوئي غير مُلڪ ݾون نڪرشَي، تو تموم گھڻو مال ملڪيت اوٿ ݾون لي آشَي۔ ‏15 تُو موٽِي عُمر آݪو ھوئِي ھانَ ݾُٺِي موت مري ٻُوريجِي ھانَ آپرَي ٻاپ ڏاڏون ݾون جائي ملِي۔ ‏16 چار ݾئو ݾالون ݾون پَڇي، ٿارِي پيڙھِي آݪا اِيئي مُلڪ ۾ پاڇا آشَي۔ اُترِي توڻي ايٿ رِي اموري قوم را پاپ اِترا تو بڌي گيا ھوشَي ڪہ ھُون ٿارِي پيڙھِي ݾون اُوئون نَي سزا ڏيرائين۔“

‏17 ڏِن آٿوئڻ ݾون پَڇي، جڏي انڌارو ھويو، تو ھيڪ تندُور ظاھر ھويو، جڪَي ۾ ڌُونئو نڪرتو پڙيو ھانَ اُوئي ڀيڙو ڀيڙو ھيڪ ٻَݪتو ڏِيئو ڀِي ڏيکيجڻ ۾ آيو۔ پَڇي پرميشوَر ݾونݾ ليوَڻ رَي ݾارُو تندُور ھانَ ڏِيئي رَي رُوپ ۾ اُوئون جِنارون رَي حِصون رَي بِچ ݾون لنگھيو۔ ‏18 اُوئي ڏِن پرميشوَر اڀرام ݾون وچن ڪيئو ڪہ مِصر دريا ݾون لي موٽَي دريا فرات توڻي ݾجو مُلڪ، ‏19 يعني قيني، قنزي، قدموني، ‏20 حِتي، فرزي، رفائي، ‏21 اموري، ڪنعاني، جرجاسي ھانَ يبُوسي، ھُون ݾجَي قومون را اَي علائقا ٿارِي پيڙھِي نَي ڏئين۔