پيدائيش 12

پرميشوَر رو اڀرام نَي ھيلو ڪرڻ

جڏي اڀرام آپرَي مُلڪ ۾ ھتو، تو پرميشوَر اُوئي نَي درشن ڏي ڪھيو ڪہ، ”تُو آپرَي مُلڪ، آپرَي عزيزون ھانَ آپرَي ٻاپ رو گھر ڇوڙي اُوئي مُلڪ ۾ جا، جڪو ھُون ٿنَي بتائين۔ ‏2 ھُون ٿَي ݾون ھيڪ موٽِي قوم ٺائين

ھانَ ٿنَي برڪت ڏئين،

ٿارو نون تموم گھڻو مشھُور ھوشَي

ھانَ ٿارَي وسيلَي مِنکون نَي برڪت ملشَي۔

‏3 جڪو ڀِي ٿارَي بارَي ۾ ڀلو ݾوچشَي،

ھُون اُوئون نَي برڪت ڏئين

ھانَ جڪو ڀِي ٿارَي بارَي ۾ بُرو ݾوچشَي،

ھُون اُوئون نَي سزا ڏئين

ھانَ دُنيا رَي ݾجَي قومون نَي ٿارَي ڪري برڪت ملشَي۔“

‏4 پَڇي اڀرام پرميشوَر رَي ڪيوَڻ تي حاران شھر ݾون بَئير ھويو۔ اُوئي ٽيم اُوئي رِي عُمر پنجھتر ݾال ھتِي ھانَ لُوط ڀِي اُوئي ڀيڙو گيو۔ ‏5 اڀرام آپرِي لُگائِي ݾاري، آپرَي ڀاتريجَي لُوط ھانَ حاران شھر ۾ ڀيڙو ڪيئوڙو مال ھانَ آپرا غُلوم ڀيڙا لي ڪنعان مُلڪ ڏيݾا بَئير ھويو ھانَ اوٿ پُگو۔ ‏6 اُوئون ڏِنون ۾ اُوئي مُلڪ ۾ ڪنعاني مِنک ريتا۔

پَڇي اڀرام آپرَي مِنکون ڀيڙو ڪنعان مُلڪ ۾ بيتو بيتو سِڪم شھر رَي مورا نون جگھا تي پُگو، جيٿ بلُوط رو ھيڪ موٽو بَڻ ھتو۔ ‏7 اوٿ پرميشوَر اڀرام نَي درشن ڏي ڪھيو ڪہ، ”اَي اوج مُلڪ ھَي، جڪو ھُون ٿارِي اولاد نَي ڏئين۔“ پَڇي اڀرام اوٿ پرميشوَر رَي ݾارُو ٻَليدون رِي جگھا ٺائِي، ڪيونڪہ پرميشوَر اوٿ اُوئي نَي درشن ڏينو ھتو۔ ‏8 پَڇي اوٿ ݾون بيت ايل شھر رَي اُوگوڻَي پاݾَي جبلون ڏيݾا گيو ھانَ اوٿ آپرا تنٻُو لگايا۔ اُوئي رَي آٿوڻَي پاݾَي بيت ايل شھر ھانَ اُوگوڻَي پاݾَي عئي شھر ھتو۔ اوٿ اڀرام پرميشوَر رَي ݾارُو ٻَليدون رِي جگھا ٺائِي ھانَ اوٿ پرميشوَر رِي ڀگتي ڪِي۔ ‏9 پَڇي اڀرام اوٿ ݾون ڪنعان مُلڪ رَي ڏکڻ علائقَي ڏيݾا بڌتو گيو۔

‏10 پَڇي ڪنعان مُلڪ ۾ اھڙو ڏُڪاݪ پڙيو ڪہ او ڪئينڪہ ڏِن، مِصر مُلڪ ۾ ريوَڻ رَي ݾارُو گيا۔ ‏11 جڏي او مِصر مُلڪ ۾ پُگڻ آݪا ھتا، تو اڀرام آپرِي لُگائِي ݾاري نَي ڪھيو ڪہ، ”تُو تموم گھڻِي ڦُوٽرِي ھَي ھانَ مھنَي ٻِي ھَي ڪہ، ‏12 مِصري مِنک ٿنَي جوئي ڪشَي ڪہ، ’اَي اِيئي رِي لُگائِي ھَي۔‘ ھانَ او ٿنَي ليوَڻ رَي ݾارُو مھنَي ماري ڇوڙشَي۔ ‏13 اِيئي رَي ڪري تُو ڪئي ڪہ، ’ھُون اِيئي رِي ٻين ھون۔‘ ھانَ اَي ڪيوَڻ تي او مھنَي جيتو ڇوڙشَي ھانَ مھَي ݾون ݾُٺو سلُوڪ ڪرشَي۔“

‏14 جڏي او مِصر مُلڪ ۾ پُگا، تو اوٿ رَي مِنکون اڀرام رِي لُگائِي نَي ڏيٺِي ڪہ او تموم گھڻِي ڦُوٽرِي ھَي۔ ‏15 مِصر رَي بادشاھ رَي وزيرون جڏي اڀرام رِي لُگائِي نَي ڏيٺِي، تو جائي بادشاھ آگھي اُوئي رِي نيڪِي ڪِي ڪہ او تموم گھڻِي ڦُوٽرِي ھَي۔ پَڇي او اُوئي نَي بادشاھ رِي محلات ۾ لي آيا۔ ‏16 بادشاھ اڀرام نَي ݾاري رو ڀائي ݾمجھي اُوئي رو خيال ڪيئو ھانَ اُوئي نَي رڍون، ٻڪرَي، ڍگا ڍگَي، گڏَي گڏا، اُونٺ، ٻونھَي ھانَ غُلوم ڏينا۔ ‏17 پڻ پرميشوَر اڀرام رِي لُگائِي ݾاري رَي ڪري بادشاھ ھانَ اُوئي رَي خاندان نَي تموم گھڻَي ڪِنَي بيماريون ۾ ڦݾايو۔ ‏18 اِيئي تي بادشاھ، اڀرام نَي آپ ڪڍي اَڻائي ڪھيو ڪہ، ”ٿَي مھَي ݾون اِيئون ڪيئون ڪيئو؟ ٿَي ڪيئون ڪونھي ݾُڻايو ڪہ ݾاري ٿارِي لُگائِي ھَي؟ ‏19 ٿَي اَي ڪيئون ڪھيو ڪہ، ’اَي مھارِي ٻين ھَي؟‘ مھَي اِيئي نَي اِيئي رَي ڪري لِي ھتِي ڪہ ھُون اِيئي ݾون بيئان ڪرون۔ ھمَي اَي ھَي ٿارِي لُگائِي، اِيئي نَي لَي ھانَ ايٿ ݾون نڪري جا۔“ ‏20 پَڇي بادشاھ آپرَي مِنکون نَي اڀرام رَي بارَي ۾ حُڪم ڏينو ھانَ اُوئون اڀرام نَي اُوئي رِي لُگائِي، مِنکون، مال ھانَ ݾجَي سيمون ݾُوڌو مِصر مُلڪ ݾون ٻاھر ڪاڍي ڇوڙيو۔