اِنسون رِي نافرمونِي
3
پرميشوَر ايشوَر جِترا ڀِي جھنگلِي جِنار ٺاھيا ھتا، اُوئون ݾجون ۾ ناگ تموم گھڻو چالاڪ ھتو۔ اُوئي لُگائِي ݾون پُوڇو ڪہ، ”ڪِي ݾاچيلي ايشوَر ڪھيو ھَي ڪہ ٿي باگ رَي ڪَي ڀِي بَڻ رو ڦل نِي کايا؟“ 2 لُگائِي ناگ نَي ڪھيو ڪہ، ”مھي باگ رَي ݾجَي بَڻون را ڦل تو کائي ݾگھون ھون، 3 پڻ ايشوَر ڪھيو ھَي ڪہ جڪو بَڻ باگ رَي بِچ ۾ ھَي، اُوئي رو ڦل نِي کايا ھانَ نِي اُوئي نَي ھاٿ لگايا، جي اِيئون ڪيئو، تو ٿي مري جاشو۔“ 4 اِيئي تي ناگ لُگائِي نَي ڪھيو ڪہ، ”ٿي ڪڏي ڀِي ڪونھي مرو۔ 5 ايشوَر اِيئي رَي ڪري پاليا ھَي، ڪيونڪہ اُوئي نَي خبر ھَي ڪہ جڪَي ڏِن ٿي او کاشو، تو ٿونَي ݾمجھ آشَي رِي ھانَ ٿي ايشوَر آݪِي ڪار ڀلائي ھانَ بُڇڙائي نَي ݾمجھڻ آݪا ھوئي جاشو۔“ 6 لُگائِي ڏيٺو ڪہ اَي بَڻ ڏيکيجڻ ۾ ڦُوٽرو ھَي ھانَ اِيئي رو ڦل کاوڻ ۾ ݾُٺو ھوشَي۔ اُوئي ݾوچو ڪہ اِيئي ݾون ݾمجھ ڀِي آشَي، تو اُوئي بَڻ ݾون ڦل توڙيو ھانَ کاڌو۔ پَڇي آپرَي ڌڻِي نَي ڀِي ڏينو، جڪو اُوئي ڀيڙو ھتو ھانَ اُوئي ڀِي کاڌو۔ 7 اِيئي تي اُوئون ٻيئون نَي ݾمجھ آئِي۔ پَڇي اُوئون نَي خبر پڙِي ڪہ مھي تو اُگھاڙا ھون ھانَ او شرماوڻ لاگا۔ اُوئون انجير رَي بَڻ رَي پونون نَي گنڍي آپنَي ڍڪيو۔8 پَڇي شام رَي ٽيم جڏي آدم ھانَ اُوئي رِي لُگائِي باگ ۾ پرميشوَر ايشوَر رَي بيوَڻ رو آواز ݾُڻيو، تو او باگ رَي بَڻون ۾ لِڪيا۔ 9 پڻ پرميشوَر ايشوَر آدم نَي ھيلو ڪري ڪھيو ڪہ، ”آدم، آدم تُو ڪيٿ ھَي؟“ 10 اُوئي بݪتِي ڏينِي ڪہ، ”مھَي باگ ۾ ٿارَي آوڻ رو آواز ݾُڻيو، تو ھُون ٻيئاجو ھانَ لِڪيو، ڪيونڪہ ھُون اُگھاڙو ھتو۔“ 11 ايشوَر ڪھيو ڪہ، ”ٿنَي ڪيڪر خبر پڙِي ڪہ تُو اُگھاڙو ھَي؟ ڪِي ٿَي اُوئي بَڻ رو ڦل کاڌو ھَي، جڪَي رو مھَي ٿنَي پاليو ھتو؟“ 12 آدم ڪھيو ڪہ، ”ٿَي جڪو لُگائِي مھنَي ڏينِي ھَي، اُوئي مھنَي اُوئي بَڻ رو ڦل ڏينو ھانَ مھَي کاڌو۔“ 13 اِيئي تي پرميشوَر ايشوَر لُگائِي نَي ڪھيو ڪہ، ”ٿَي اِيئون ڪيئون ڪيئو؟“ لُگائِي ڪھيو ڪہ، ”ناگ مھنَي برگلائِي، تو مھَي او ڦل کاڌو۔“
ايشوَر رو سزا ڏيوَڻ
14 پَڇي پرميشوَر ايشوَر ناگ نَي ڪھيو ڪہ، ”ٿَي اِيئون ڪيئو، اِيئي رَي ڪري تُو ݾجَي جيوَو جِنارون ھانَ جھنگلِي جِنارون ۾ لعنتِي ھَي۔ تُو آپرَي پيٽ ݾون گِݾڪِي ھانَ ݾجِي حياتِي مٽِي کائِي۔ 15 ھُون ٿارَي ھانَ لُگائِي رَي بِچ ۾ ھانَ ٿارِي نسل ھانَ لُگائِي رِي نسل رَي بِچ ۾ دُشمنِي گھاتين۔ او ٿارو ماٿو چِپلشَي ھانَ تُو اُوئي رِي کُڙِي تي چڪ ھڻين۔“
16 پَڇي ايشوَر لُگائِي نَي ڪھيو ڪہ، ”ھُون ٿارا اُميدگارِي را ڏوکن تموم گھڻا بڌائين ھانَ تُو ڏُکون ݾون ٻاݪ جِڻين۔ ٿارو من تو آپرَي ڌڻِي ڏيݾا ھوشَي، پڻ تو ڀِي او ٿَي ماٿَي حُڪم ھلاشَي۔“
17 پَڇي ايشوَر آدم نَي ڪھيو ڪہ، ”ٿَي آپرِي لُگائِي رِي بات منِي ھانَ او ڦل کاڌو، جڪَي رو مھَي ٿنَي پاليو ھتو۔ اِيئي رَي ڪري ڌرتي نَي ٿارَي ڪري پِٽ ھَي، تُو اُوئي رِي پوک کاوڻ رَي ݾارُو ݾجِي حياتِي ڏُکون ݾون پورھيو ڪرِي۔ 18 ٿارَي ݾارُو ٻنِي ۾ ھر نمُونَي را ڪونٽون آݪا بَڻيا اُگشَي۔ ٿنَي ٻنِي ݾون پوک تو ملشَي، 19 پڻ ٿنَي تموم گھڻِي محنت ڪرڻِي پڙشَي۔ تُو ݾجِي حياتِي پِراݾيو بيوَڻ ݾون پَڇي ٻاٽِي کائِي، جترِي توڻي تُو مٽِي ۾ نِي جاوَي، ڪيونڪہ تُو مٽِي رو ٺاھيوڙو ھَي ھانَ پاڇو مٽِي ۾ جائين۔“
20 آدم آپرِي لُگائِي رو نون حوا راکيو، جڪَي رو مطلب ھَي ”زندگِي“ ڪيونڪہ اِنسونون رِي بيل اُوئي ݾون بڌِي ھَي۔
21 پَڇي پرميشوَر ايشوَر چوٻڙَي را گاڀا ٺائي آدم ھانَ اُوئي رِي لُگائِي نَي پيرڻ رَي ݾارُو ڏينا۔
22 پَڇي پرميشوَر ايشوَر ڪھيو ڪہ، ”جوئو، ھمَي اِنسون ڀلائي ھانَ بُڇڙائي رِي اوݪکڻ ۾ آپون جھڙو ھويو ھَي۔ ھمَي اِيئون نِي ھووَي ڪہ او زندگِي رَي بَڻ رو ڦل توڙَي ھانَ کاوَي ھانَ ھميشا اِيئي حالت ۾ جيتو رَي۔“ 23 اِيئي رَي ڪري پرميشوَر ايشوَر اُوئون نَي عدن رَي باگ ݾون ٻاھر ڪاڍيا ڪہ او ٻنِي ٻارو ڪرَي، جڪِي زمين ݾون اِنسون ٺاھيوڙو ھتو۔ 24 اُوئون نَي ڪاڍڻ ݾون پَڇي، ايشوَر عدن باگ رَي اُوگوڻَي پاݾَي آڪاشِي مخلُوق ڪروبِي اُڀاڙيا ھانَ ھيڪ ٻَݪڻ آݪِي تلوار ڀِي راکِي، جڪو چوڌاري ڦِرتِي ڪہ ڪو ڀِي زندگِي رَي بَڻ رَي پاݾَي ۾ نِي آوَي۔