پيدائيش 4

قائن ھانَ ھابل

پَڇي آدم آپرِي لُگائِي حوا ڪڍي گيو، او اُميد ݾون ھوئِي ھانَ اُوئي ڏيڪرو جِڻيو۔ اُوئي، اُوئي رو نون قائن راکيو، جڪَي رو مطلب ھَي ”مِليو“ ھانَ حوا ڪھيو ڪہ، ”پرميشوَر ݾون مھنَي ھيڪ ڏيڪرو مِليو ھَي۔“ ‏2 قائن ݾون پَڇي اُوئي رو ڀائي ھابل جايو۔

ھابل رڍون ٻڪرَي چارتو ھانَ قائن ھاݪِي ھتو۔ ‏3 ڪئينڪہ ڏِنون ݾون پَڇي، اِيئون ھويو ڪہ قائن آپرِي ٻنِي رِي پوک ݾون ڪئين ڀيٽا لي آيو ھانَ پرميشوَر رَي نون تي چاڙھِي۔ ‏4 ھابل ڀِي آپرَي رڍون ٻڪريون را پيلڪا ڦݪيا چُونڊي، اُوئون رو ݾجون ݾون ݾُٺو موݾ ھانَ ݾار لي آيو ھانَ پرميشوَر رَي نون تي چاڙھيو۔ پرميشوَر، ھابل ھانَ اُوئي رِي ڀيٽا قبُول ڪِي۔ ‏5 پڻ قائن ھانَ اُوئي رِي ڀيٽا قبُول ڪونھي ڪِي۔ اِيئي تي قائن نَي تموم گھڻِي ريݾ آئِي ھانَ اُوئي رو مونڏو بِگڙي گيو۔ ‏6 اِيئي تي پرميشوَر قائن نَي ڪھيو ڪہ، ”ٿنَي ڪيئون ريݾ آئِي ھَي؟ ٿارو مونڏو ڪيئون بِگڙيو ھَي؟ ‏7 جي تُو ݾُٺو ڪوم ڪرِي، تو ھُون ٿنَي ضرُور قبُول ڪرين۔ پڻ خبردار، جي تُو ݾُٺو ڪوم ڪونھي ڪرَي، تو تُو پاپون ۾ ڦاݾي جائِي۔ ٿارَي من ۾ پاپ ڪرڻ رِي خواھش ھَي، پڻ تُو اُوئي تي آپنَي ڪاٻُو راک۔“

‏8 پَڇي قائن آپرَي ڀائي ھابل نَي ڪھيو ڪہ، ”آ، تو آپي ٻنِي تي ھالون۔“ جڏي او ٻيئي ٻنِي تي پُگا، تو اوٿ قائن آپرَي ڀائي ھابل تي حملو ڪيئو ھانَ ماري ڇوڙيو۔ ‏9 اِيئي تي پرميشوَر قائن نَي ڪھيو ڪہ، ”ٿارو ڀائي ھابل ڪيٿ ھَي؟“ اُوئي ڪھيو ڪہ، ”مھنَي ڪھڙِي خبر؟ ڪِي ھُون اُوئي رو ڌراڙ ھون؟“ ‏10 پرميشوَر ڪھيو ڪہ، ”قائن، ٿَي اَي ڪِي ڪيئو؟ ٿارَي ڀائي رو لوئِي مھنَي ڌرتي ݾون اِنصاف رَي ݾارُو ھيلا ڪرَي پڙيو۔ ‏11 تُو مھارو پِٽيوڙو ھَي ھانَ تُو زمين رِي پوک ڪري ڪونھي ݾگھَي، ڪيونڪہ اِيئي تي ٿَي آپرَي ڀائي رو خُون ڪيئو ھَي۔ ‏12 جڏي تُو ٻنِي ڪرِي، تو ٿنَي اُوئي ۾ ڪو ڀِي پيداوار ڪونھي ملَي ھانَ تُو ڌرتي تي اِيئا اُوئا رُلتو رئِي۔“ ‏13 پَڇي قائن پرميشوَر نَي ڪھيو ڪہ، ”مھنَي اترِي موٽِي سزا نِي ڏي، جڪو برداش ݾون ٻاھر ھووَي۔ ‏14 ڪيونڪہ ھُون اِيئي علائقَي ݾون ھانَ ٿَي ݾون اݪگو ھوئي جائين ھانَ ھُون ڌرتي تي اِيئا اُوئا رُلتو رئين ھانَ جڪو ڀِي مھنَي ڏيکشَي، تو او مھنَي ماري ڇوڙشَي۔“ ‏15 پڻ پرميشوَر اُوئي نَي ڪھيو ڪہ، ”نا، اِيئون ڪونھي ھووَي۔ جي ڪُڻ ٿنَي مارشَي، تو جڪو سزا مھَي ٿنَي ڏينِي ھَي، اِيئي ݾون ڀِي ݾات گُھمرا وڌيڪ سزا اُوئي نَي ڏئين۔“ پَڇي پرميشوَر قائن تي ھيڪ نِشون ڪيئو ڪہ جڪو ڀِي قائن نَي ڏيکَي، تو اُوئي نَي مارَي نِي۔ ‏16 پَڇي قائن پرميشوَر ݾون بُوئو گيو ھانَ نُود رَي علائقَي ۾ جائي ريوَڻ لاگو، جڪو عدن باگ رَي اُوگوڻَي پاݾَي ھَي۔

‏17 پَڇي قائن آپرِي لُگائِي ڪڍي گيو ھانَ او اُميد ݾون ھوئِي ھانَ اُوئي نَي حنُوڪ جايو۔ قائن ھيڪ شھر ٺاھيو ھانَ اُوئي رو نون آپرَي ڏيڪرَي حنُوڪ رَي نون تي راکيو۔

‏18 حنُوڪ ݾون عيراد جايو ھانَ عيراد ݾون محويائيل جايو، محويائيل ݾون متُوسائيل جايو ھانَ متُوسائيل ݾون لمڪ جايو۔

‏19 لمڪ رَي ٻي لُگائَي ھتَي، ھيڪِي رو نون عدا ھانَ ٻيجِي رو نون ضِلا ھتو۔ ‏20 عدا نَي ھيڪ ڏيڪرو جايو، جڪَي رو نون يابل راکيو۔ او پيلڪو مِنک ھتو، جڪو تنٻُوئون ۾ ريتو ھانَ مال ڌارتو۔ ‏21 عدا نَي ھيڪ ٻيجو ڏيڪرو جايو، جڪَي رو نون يوبل ھتو، او پيلڪو مِنک ھتو، جڪو بوݾلِي ھانَ تارون آݪا ساز بجاوتو۔ ‏22 ضِلا نَي ڀِي ھيڪ ڏيڪرو جايو، جڪَي رو نون توبلقائن ھتو۔ او پيلڪو مِنک ھتو، جڪو پيتل ھانَ لوھ را اوزار ٺاوتو۔ ضِلا نَي ھيڪ ڏيڪرِي جائِي، جڪَي رو نون نعما ھتو۔ ‏23 لمڪ آپرَي لُگايون نَي ڪھيو ڪہ،

”اي عدا ھانَ ضِلا، مھارِي بات ݾُڻو،

اي مھارَي لُگايون مھارِي بات تي ڌھيون لگائو،

جي ڪُڻ مھنَي زخمي ڪرَي،

جي ٻاݪ ڀِي مھنَي ڌڪ ھڻَي،

تو ھُون اُوئي نَي ماري ڇوڙين۔

‏24 جي ڪُڻ قائن نَي مارشَي،

تو ايشوَر اُوئي ݾون ݾات گُھمرا بدلو ليشَي،

پڻ جي ڪُڻ مھنَي نُقصون ڏيشَي،

تو ھُون اُوئي ݾون ݾتھتر گُھمرا بدلو لئين۔“

‏25 آدم رِي لُگائِي نَي ھيڪ ٻيجو ڏيڪرو جايو، جڪَي رو نون اُوئي سيت راکيو، جڪَي رو مطلب ھَي ”ڏينو“ ھانَ او ڪيوَڻ لاگِي ڪہ، ”ايشوَر مھنَي ھيڪ ٻيجو ڏيڪرو ھابل رِي جگھا تي ڏينو ھَي، جڪَي نَي قائن ماريو ھتو۔“ ‏26 سيت رو ڀِي ھيڪ ڏيڪرو جايو، جڪَي رو نون اُوئي انُوس راکيو۔ اُوئي ٽيم ݾون مِنک پرميشوَر رو نون لي ڀگتي ڪرڻ لاگا۔