Idop nunaꞌ penekaꞌ Tuhan Allah
4
Nema Al Maseh udah mrinsaꞌ de kayu saleb, kitaꞌ sigeꞌ alah nyiap direꞌ mrinsaꞌ abaꞌ bepiker upa Ya. Urang te mrinsaꞌ de dunia toꞌ pesti kaꞌ nudi dusa. 2 Kebaꞌ nyaꞌ, selamaꞌ kitaꞌ ageꞌ idop de dunia toꞌ, kitaꞌ alah nunaꞌ penekaꞌ Tuhan Allah abaꞌ nadai nunaꞌ penekaꞌ direꞌ kitaꞌ te jat. 3 Nema meliyaꞌ teh udah mayoh waktu te dengau kitaꞌ mulah te jat upa kebala urang te nadai ngelala Tuhan Allah. Meliyaꞌ teh kitaꞌ peroꞌ kaꞌ miker te kutor abaꞌ nunaꞌ penekaꞌ direꞌ te kanyi. Kitaꞌ gah mabok, gah biboryor, begugoꞌ nginom mabok abaꞌ nyemah kebala pentek te tunaꞌ des nitauꞌ depulah.4 Entoꞌ sidaꞌ te nadai ngelala Tuhan Allah ampal medaꞌ kitaꞌ nadai ageꞌ idop mulah brena macam te jat upa sidaꞌ, nyaꞌ nyuroh sidaꞌ mejaiꞌ kitaꞌ. 5 Uleh jemah lah sidaꞌ alah nangong penyalah sidaꞌ de mua Tuhan Allah te siap kaꞌ nyidang ugaꞌ urang te idop abaꞌ te mati. 6 Nyaꞌ nyuroh Brita Bayek udah depadah gaꞌ ke kebala urang te udah mati. Tuhan Allah kaꞌ nyidang kebala urang te mati upa nyidang ugaꞌ urang te ke bukai isaꞌ sidaꞌ tauꞌ idop uleh roh nunaꞌ kedekaꞌ Tuhan Allah.
Idop urang Kristen
7 Nadai lamaꞌ ageꞌ ugaꞌ utai te de dunia toꞌ badoꞌ, kebaꞌ nyaꞌ kitaꞌ alah tenang abaꞌ nyaga pemiker direꞌ, isaꞌ kitaꞌ tauꞌ bradua. 8 Uleh te ma penteng kitaꞌ alah bamat-amat kaseh ke pangan bukai. Nema kaseh nyaꞌ nyuroh kitaꞌ ngampon kebala urang te mulah te jat ke kitaꞌ. 9 Trimaꞌ ke kebala urang te singah de rumah kitaꞌ ngau ati gaga. 10 Ngenap urang te pecayaꞌ ke Tuhan Allah debereꞌ krunia te nadai serupa. Kebaꞌ nyaꞌ kitaꞌ alah jadi penguros te bayek abaꞌ ngau ke krunia te debereꞌ Ya nyaꞌ ngau nulong pangan bukai. 11 Urang te debereꞌ panai becakap, alah madah pesau Tuhan Allah. Urang te mantoꞌ urang bukai, urang nyaꞌ alah mantoꞌ ngau penalah ari Tuhan Allah isaꞌ Tuhan Allah dejunyong tingeꞌ alam brena utai tegal Isa Al Maseh. Puji Tuhan Isa te patot dejunyong tingeꞌ, nema Ya te bekuasa niseꞌ pemadoꞌ. Amen!
Mrinsaꞌ tegal jadi urang Kristen
12 Kebala menyadeꞌ ku te ku kaseh, amat mah pemedeh te datai nguji kitaꞌ ma amat pedeh, uleh nang kitaꞌ ngangap nyaꞌ utai te luar biasa nema nadai peroꞌ kitaꞌ kedireꞌ te ngasa pemedeh nyaꞌ. 13 Uleh gaga ke kitaꞌ enteꞌ kitaꞌ tauꞌ ngasa pemedeh te deasa Al Maseh, isaꞌ enteꞌ senta kuasa Ya te lampar besai deanyaꞌ ke dunia, kitaꞌ ngasa gaga. 14 Betuah amat kitaꞌ enteꞌ tegal nunaꞌ Al Maseh urang mejaiꞌ kitaꞌ. Nyaꞌ bukti Roh te bekuasa, Roh Tuhan Allah nyaꞌ, adai de kitaꞌ. 15 Nang sampai kitaꞌ mrinsaꞌ tegal kitaꞌ munoh, encuri, mulah te jat abaꞌ kalot ke urang bukai. 16 Uleh enteꞌ kitaꞌ mrinsaꞌ tegal kitaꞌ urang Kristen, nang kitaꞌ malu. Uleh kitaꞌ alah muji Tuhan Allah nema kitaꞌ depadah urang Kristen.
17 Entoꞌ Tuhan Allah kaꞌ belaboh nyidang ugaꞌ urang abaꞌ te semaru desidang Ya, nyaꞌ urang te deempu Ya. Enteꞌ urang te desidang nyaꞌ belaboh ari kita, apa mah klageꞌ kebala urang te ngai pecayaꞌ ke Brita Bayek ari Tuhan Allah. 18 Alam Kitab Suci detules,
“Enteꞌ urang te patoh ke Tuhan Allah jaꞌ nyau kaꞌ nadai selamat,
apa mah klageꞌ kebala urang dusa te ngai pecayaꞌ ke Tuhan Allah.”a
19 Kebaꞌ nyaꞌ urang te mrinsaꞌ tegal mulah kedekaꞌ Tuhan Allah, alah nyerah idop direꞌ ke Ya abaꞌ selareh mulah te bayek. Ya mah te udah mulah sidaꞌ abaꞌ Ya selareh setia.