Idop urang te blaki bini
3
Piyaꞌ gaꞌ kitaꞌ kebala bini, tunok ke laki kitaꞌ isaꞌ enteꞌ adai laki kitaꞌ te bedau pecayaꞌ ke Brita Bayek, sidaꞌ tauꞌ pecayaꞌ enteꞌ sidaꞌ medaꞌ idop kitaꞌ. Amat mah kitaꞌ nadai madah utai ke sidaꞌ, 2 sidaꞌ kaꞌ pecayaꞌ nema sidaꞌ medaꞌ idop kitaꞌ te bamat-amat tulos abaꞌ hormat ke Tuhan Allah. 3 Pemanci kitaꞌ nang proꞌ pedaꞌ ari luar gena, upa medaꞌ ngelagaꞌ bok te blebeh-lebeh, ngau kebala mas abaꞌ ngau kebala selawar baju te mahal. 4 Uleh pemanci kitaꞌ alah keluar ari ati kitaꞌ. Pemanci te upa toꞌ nadai ngamoꞌ maleꞌ, nema nyaꞌ ari idop kitaꞌ te bayek abaꞌ tenang. Toꞌ mah pemanci te ma brega de pemedaꞌ Tuhan Allah. 5 Nema piyaꞌ mah cara kebala urang inoꞌ jaman dulau te nyemah Tuhan Allah nglagaꞌ direꞌ. Sidaꞌ bamat-amat pecayaꞌ ke Tuhan Allah abaꞌ nglagaꞌ direꞌ ngau cara patoh ke laki sidaꞌ. 6 Sara sigeꞌ mulah piyaꞌ, ya patoh ke Abraham abaꞌ nyebot ya tuan ya. Entoꞌ kitaꞌ tauꞌ dasebot kebala anak Sara enteꞌ kitaꞌ mulah kebala utai te bayek abaꞌ nadai takot ke kebala utai. 7 Piyaꞌ gaꞌ kitaꞌ kebala laki, kitaꞌ alah nyarok ke bini kitaꞌ, nema sidaꞌ lebeh lemah ari kitaꞌ. Hormat ke sidaꞌ, nema Tuhan Allah kaꞌ mreꞌ berkat jong idop abaꞌ Ya ke snikoꞌ. Pulah ke nyaꞌ isaꞌ niseꞌ te nekol pradua kitaꞌ.Idop damai abaꞌ pangan bukai
8 Entoꞌ, cakap ku toꞌ, ku padah ke kitaꞌ: Kitaꞌ alah idop sati abaꞌ pangan bukai. Kitaꞌ alah nyarok ke pangan abaꞌ kaseh ke pangan upa ngaseh menyadeꞌ direꞌ. Kitaꞌ alah ritak abaꞌ renah ati. 9 Nang malas jat ngau jat, abaꞌ enteꞌ urang mejaiꞌ kitaꞌ nang malas sidaꞌ. Uleh kitaꞌ alah mintaꞌ isaꞌ Tuhan Allah mreꞌ berkat ke sidaꞌ, nema nyaꞌ mah nyuroh Tuhan Allah ngumai kitaꞌ. Ngau cara nyaꞌ Tuhan Allah kaꞌ mreꞌ berkat ke kitaꞌ. 10 Upa te datules alam Kitab Suci,
“Enteꞌ urang kaꞌ idop nyamai,
abaꞌ kaꞌ ngasa kebala utai te bayek,
ya alah nyaga mulot isaꞌ nadai ngumong utai te jat ke urang bukai,
abaꞌ nadai ngemulaꞌ.
11 Ya alah ngeyawoh te jat abaꞌ alah mulah te bayek,
Ya alah bamat-amat brusaha idop damai abaꞌ urang.
12 Nema mata Tuhan slareh medaꞌ kebala urang te mulah te kenaꞌ,
abaꞌ peneng Ya ninga kebala pradua sidaꞌ.
Uleh Tuhan ngukom kebala urang te mulah te jat.”a
Deprisa tegal mulah te bayek
13 Sapa piyaꞌ te kaꞌ mulah te jat ke kitaꞌ, enteꞌ kitaꞌ gaga mulah te bayek? 14 Uleh enteꞌ kitaꞌ alah deprisa tegal mulah te bayek, betuwah amat kitaꞌ! Kebaꞌ nyaꞌ nang kitaꞌ takot ke sidaꞌ abaꞌ nang kitaꞌ saban. 15 Uleh kitaꞌ alah bamat-amat nyemah Al Maseh abaꞌ hormat ke Ya nema Ya mah Tuhan. Abaꞌ kitaꞌ alah slareh siap nyelas ke kebala urang te nanyaꞌ apa te kitaꞌ agam. 16 Uleh kitaꞌ alah nyawot sidaꞌ blubah-lubah ngau penoh hormat. Jaga ke ati kitaꞌ isaꞌ slareh breseh isaꞌ enteꞌ adai urang te mejaiꞌ kitaꞌ, sidaꞌ malu kedireꞌ nema sidaꞌ medaꞌ enteꞌ kitaꞌ mulah te bayek nema kitaꞌ idop suteꞌ abaꞌ Al Maseh. 17 Lebeh bayek mrinsaꞌ tegal mulah te bayek enteꞌ nyaꞌ te dakedekaꞌ Tuhan Allah, ari pada mrinsaꞌ tegal mulah te jat. 18 Nema Al Maseh sigeꞌ udah mati skaleꞌ tegal nangong dusa ensia. Ya niseꞌ dusa, uleh Ya mati nganti kebala urang te dusa isaꞌ Ya tauꞌ ngemaiꞌ kitaꞌ ke Tuhan Allah. Ya dabunoh, uleh Ya daidop ageꞌ ngau kuasa Roh Kudos. 19 Alam Roh nyaꞌ, Ya angkat madah pesau Tuhan Allah ke kebala semengat urang te dekurong alam penyara.b 20 Kebala semengat nyaꞌ, kebala semengat urang te nadai patoh ke Tuhan Allah de jaman Noh meliyaꞌ. Tuhan Allah sabar nadai ngukom sidaꞌ slamaꞌ Noh mulah bahtra ya. Proꞌ lapan urang te tamaꞌ ke bahtra, nyaꞌ mah te daslamat Tuhan Allah ari ranah te besai nyaꞌ. 21 Ranah te besai nyaꞌ tana paneꞌ te nyelamat kitaꞌ. Paneꞌ nyaꞌ nadai ngau mreseh tuboh kitaꞌ te kutor, uleh nyaꞌ ngau danyi ari ati nurani kitaꞌ te bayek ke Tuhan Allah. Paneꞌ nyaꞌ nyelamat kitaꞌ tegal Isa Al Maseh daidop ageꞌ ari pemati. 22 Entoꞌ Al Maseh udah trangkat ke sruga, abaꞌ den Ya dudok de spiyak kanan Tuhan Allah. Ugaꞌ mlikat, ugaꞌ roh te kuat abaꞌ te bekuasa tunok ke Ya.