Isa toꞌ batu dasar te ma penteng
2
Kebaꞌ nyaꞌ buai ke kebala utai te jat, nang ngemulaꞌ abaꞌ nang budi-budi bayek. Nang iri abaꞌ nang mejaiꞌ urang bukai. 2 Sama upa miyak te baroꞌ adai, kitaꞌ alah slareh kaꞌ nginom aiꞌ tusu rohani te seli, isaꞌ kitaꞌ betumoh abaꞌ daslamat. Aiꞌ tusu rohani te seli nyaꞌ, pemadah Tuhan Allah. 3 Pulah ke piyaꞌ nema kitaꞌ bamat-amat udah ngasa pemayek Tuhan. 4 Kebaꞌ nyaꞌ, datai ke ngusong Ya, batu te idop te debuai ensia, uleh dapileh abaꞌ dehormat Tuhan Allah. 5 Kitaꞌ toꞌ upa kebala batu te idop te dengau niri rumah Tuhan Allah te rohani. Ngau cara nyaꞌ kitaꞌ jadi kebala imam te idop kusos ngau Tuhan Allah. Isa Al Maseh te nyuroh kitaꞌ tauꞌ mreꞌ pesemah rohani nunaꞌ te dakedekaꞌ Tuhan Allah. 6 Nema adai datules alam Kitab suci tentang Isa Al Maseh,“Ku udah nepoꞌ sigeꞌ batu dasar te ma penteng de Sion,
batu te dapileh abaꞌ brega.
Sapa te pecayaꞌ ke Ya, nadai ngamoꞌ nesal.”a
7 Enteꞌ bagi kitaꞌ te pecayaꞌ batu nyaꞌ brega, uleh bagi urang te nadai pecayaꞌ, Ya nyaꞌ,
“Batu te udah debuai kebala tukang,
nyaꞌ udah jadi batu dasar te ma penteng,”b
abaꞌ
“Nyaꞌ mah batu te nyuroh urang tetanyal,
batu nyaꞌ nyuroh sidaꞌ terap.”c
8 Sidaꞌ tetanyal ke batu nyaꞌ, nema sidaꞌ ngai patoh ke apa depadah Tuhan Allah. Nyaꞌ mah te udah deamoꞌ Tuhan Allah ngau sidaꞌ.
9 Uleh kitaꞌ mah bangsa te dapileh Tuhan Allah, kebala imam te ngelayan Raja te ma bekuasa, bansa te kudos, abaꞌ kebala urang te daempu Tuhan Allah. Tuhan Allah udah mileh kitaꞌ isaꞌ kitaꞌ nusoi kebala utai te luar biasa ari Ya. Ya udah ngumai kitaꞌ ari teban te petang ke teban Ya te ma tampak.
10 “Meliyaꞌ teh kitaꞌ ukai urang te daempu Tuhan Allah,
uleh entoꞌ kitaꞌ nyau jadi urang te daempu Ya.
Meliyaꞌ teh kitaꞌ nadai nerimaꞌ pengaseh Tuhan Allah,
uleh entoꞌ kitaꞌ nyau nrimaꞌ pengaseh Ya.”d
Idop ngau Tuhan Allah
11 Kebala kawan ku te ku kaseh, kita toꞌ upa urang penatai abaꞌ perantau de dunia toꞌ. Kebaꞌ nyaꞌ, ku ngajar kitaꞌ isaꞌ kitaꞌ ngenyawoh direꞌ ari penekaꞌ te jat te slareh beperang ngelawan penekaꞌ ati nurani kitaꞌ. 12 Kitaꞌ alah idop bayek abaꞌ kenaꞌ de tengah kebala urang te nadai nglala Tuhan Allah, isaꞌ enteꞌ sidaꞌ mlicak kitaꞌ, madah kitaꞌ urang te jat, sidaꞌ medaꞌ kedireꞌ enteꞌ idop kitaꞌ nyaꞌ bayek abaꞌ sidaꞌ kaꞌ muji Tuhan Allah senta Ya datai jemah.
13 Kitaꞌ alah tunok ke ugaꞌ pemrintah te adai de dunia toꞌ, nema nyaꞌ mah te dakedekaꞌ Tuhan Allah. Tunok ke kitaꞌ ke raja te empu kuasa paleng tingeꞌ. 14 Tunok ke gaꞌ ke gubernor te dapileh raja, te ngukom urang te mulah te jat abaꞌ te hormat ke urang te mulah te bayek. 15 Nema Tuhan Allah kaꞌ isaꞌ ngau idop kitaꞌ te bayek nyaꞌ, kitaꞌ nangam nyawa kebala urang te budu te melicak kitaꞌ. 16 Kitaꞌ alah idop upa urang te udah bibas, uleh nang nguna bibas kitaꞌ nyaꞌ ngau mulah te jat. Kitaꞌ alah idop ngelayan Tuhan Allah. 17 Hormat ke ugaꞌ urang, kaseh ke menyadeꞌ seiman kitaꞌ, tunok ke Tuhan Allah, abaꞌ hormat ke Raja.
Pemedeh Al Maseh ngau cuntoh te alah kita tunaꞌ
18 O kebala ulon, tunok ke tuan kitaꞌ ngau penoh hormat. Nadai proꞌ ke tuan kitaꞌ te awas abaꞌ adel, uleh ke tuan kitaꞌ te garang gaꞌ. 19 Tuhan Allah kaꞌ mreꞌ berkat ke kitaꞌ, enteꞌ kitaꞌ sabar ngasa pemedeh te nadai patot kitaꞌ asa. Enteꞌ kitaꞌ sadar Tuhan medaꞌ kitaꞌ, nyaꞌ te ngasoh kitaꞌ tan ngasa pemedeh nyaꞌ ngau sabar. 20 Piyaꞌ apa te kaꞌ depuji urang ke kitaꞌ, enteꞌ kitaꞌ sabar ngasa pemedeh depangkong paloꞌ nema kitaꞌ mulah dusa? Uleh enteꞌ kitaꞌ mulah te bayek, abaꞌ tegal nyaꞌ kitaꞌ alah sabar ngasa pemedeh, Tuhan Allah kaꞌ mreꞌ berkat ke kitaꞌ. 21 Tuhan Allah ngumai kitaꞌ isaꞌ kitaꞌ sabar ngasa pemedeh upa Isa Al Maseh. Ya udah ngasa pemedeh ngau nulong kitaꞌ abaꞌ Ya udah mreꞌ teladan isaꞌ kitaꞌ nunaꞌ teladan Ya.
22 “Ya nadai kalaꞌ mulah dusa,
abaꞌ Ya nadai kalaꞌ ngemulaꞌ.”e
23 Pas Ya deplicak, Ya nadai malas, pas Ya depedeh, Ya nadai ngancam. Uleh Ya nyerah direꞌ ke Tuhan Allah te nyidang ngau adel. 24 Isa Al Maseh te udah nangong dusa kita alam tuboh Ya de kayu saleb, isaꞌ kita bibas ari kuasa dusa abaꞌ idop kenaꞌ de mua Tuhan Allah. Kebala bakal nyaꞌ ngasoh Ya mati abaꞌ nyaꞌ te nyemoh kitaꞌ. 25 Meliyaꞌ teh kitaꞌ idop upa dumba te tesat, uleh entoꞌ kitaꞌ udah pulai ageꞌ ke Gemala dumba te ngelinong idop kitaꞌ.