SURAT
PETROS
TE SEMARU
Tabeꞌ
1
Tabeꞌ ari ku Petros, rasol Isa Al Maseh. Surat toꞌ ku kirem ke kebala urang te dapileh Tuhan Allah te jadi penatai de daerah Pontus, Galatia, Kapadokia, Asia abaꞌ Bitinia. 2 Ari meliyaꞌ, Tuhan Allah, Apai kita, udah ngamoꞌ mileh kitaꞌ abaꞌ nyuroh jadi empu Ya, te dakudos uleh Roh kudos. Tuhan Allah mileh kitaꞌ isaꞌ kitaꞌ patoh ke Isa Al Maseh abaꞌ isaꞌ dusa kitaꞌ deampon ngau darah Isa Al Maseh.Ku bradua isaꞌ Tuhan Allah nganyaꞌ pemayek ati Ya ke kitaꞌ sengabot abaꞌ isaꞌ kitaꞌ buleh idop penoh damai te nadai bejangkaꞌ.
Pengarap, iman abaꞌ kaseh
3 Puji Allah abaꞌ Apai Tuhan kita Isa Al Maseh! Nema tegal pengaseh Allah te ma besai, Ya mereꞌ idop baru ke kita. Kita dabreꞌ idop baru nema tegal Tuhan Allah udah ngidop Isa ageꞌ. Nyaꞌ mah te jadi pengarap kita. 4 Entoꞌ kita kaꞌ nrimaꞌ kebala berkat te udah de ageh Tuhan Allah ke kebala urang te pecayaꞌ ke Ya. Kebala berkat nyaꞌ de taroh de sruga abaꞌ nitauꞌ rusak, nitauꞌ buntau, abaꞌ nitauꞌ bebaleꞌ. 5 Nema kitaꞌ pecayaꞌ ke Tuhan Allah, kebaꞌ kitaꞌ kaꞌ dejaga Tuhan Allah ngau kuasa Ya, datai ke kitaꞌ nrimaꞌ slamat te ka deanyaꞌ Ya ke kitaꞌ de ari pemadoꞌ. 6 Kebaꞌ nyaꞌ, kitaꞌ alah gaga, amat mah tengan toꞌ kitaꞌ alah mayoh ngasa pedeh uleh kebala penusah. Uleh nyaꞌ nadai lamaꞌ lah. 7 Kebala penusah nyaꞌ proꞌ ngau nguji, bamat nadai pecayaꞌ kitaꞌ ke Tuhan. Mas te tauꞌ rusak jaꞌ alah deuji ngau api ngau medaꞌ seli ke nadai. Upa piyaꞌ gaꞌ pecayaꞌ kitaꞌ alah deuji, nema nyaꞌ jaoh lebeh brega ari mas. Enteꞌ kitaꞌ tetap tegoh pecayaꞌ datai ke Isa datai ageꞌ, Tuhan Allah kaꞌ muji, ngehormat abaꞌ ningeꞌ kitaꞌ. 8 Amat mah kitaꞌ bedau kalaꞌ medaꞌ Isa, uleh kitaꞌ ngaseh Ya. Amat mah kitaꞌ nadai medaꞌ Ya entoꞌ, uleh kitaꞌ pecayaꞌ ke Ya. Nyaꞌ te ngasoh kitaꞌ ngasa lampar gaga te nitauꞌ dejelas. 9 Kitaꞌ gaga nema Tuhan Allah nyelamat kitaꞌ. Utai nyaꞌ tauꞌ piyaꞌ nema kitaꞌ pecayaꞌ ke Al Maseh.
10 Kebala nabi udah nginsor ngau tliti kati Tuhan Allah kaꞌ nyelamat urang. Sidaꞌ dulau becakap ke slamat te kaꞌ dabreꞌ Tuhan Allah ke kitaꞌ. 11 Roh Al Maseh te adai de alam sidaꞌ udah madah enteꞌ Al Maseh kaꞌ ngasa pemedeh. Uleh udah nyaꞌ Tuhan Allah kaꞌ ningeꞌ Ya. Nyaꞌ mah nyuroh sidaꞌ nyelidek kmaya abaꞌ kati ugaꞌ utai nyaꞌ kaꞌ tejadi. 12 Tuhan Allah udah nyuroh kebala nabi nyaꞌ nyarok enteꞌ sidaꞌ mulah utai nyaꞌ nadai ngau sidaꞌ kedireꞌ, uleh ngau nulong kitaꞌ. Tuhan Allah udah ngutos Roh Kudos ari sruga ngau mimpen kebala urang te madah Brita Bayek ke kitaꞌ. Kebala Mlikat sigeꞌ kaꞌ tauꞌ badaꞌ tentang Brita Bayek nyaꞌ.
Dekumai isaꞌ idop kudos
13 Kebaꞌ nyaꞌ siap ke akal piker kitaꞌ. Kitaꞌ alah ngetat direꞌ abaꞌ alah bamat-amat ngagam berkat te kaꞌ dabreꞌ Isa ke kitaꞌ pas Ya datai ageꞌ. 14 Patoh ke Tuhan Allah abaꞌ nang nunaꞌ penekaꞌ te jat ageꞌ upa jalai kitaꞌ bedau nglala Tuhan Allah. 15 Kitaꞌ alah idop kudos, sama upa Ya te udah ngumai kitaꞌ nyaꞌ kudos. 16 Nema adai datules alam Kitab Suci, “Kudos ke kitaꞌ nema Ku kudos.”a
17 Kitaꞌ nyebut Allah nyaꞌ Apai jalai kitaꞌ bradua ke Ya. Allah nyaꞌ mah te nadai nyemeh mipeh. Ya nyidang ugaꞌ urang nunaꞌ apa te udah sidaꞌ pulah. Kebaꞌ nyaꞌ slamaꞌ kitaꞌ ageꞌ de dunia toꞌ kitaꞌ alah nyunyong tingeꞌ Ya ngau idop kitaꞌ. 18 Cara idop te slamaꞌ toꞌ kitaꞌ wares ke ari puyang jagang kitaꞌ nyaꞌ niseꞌ reti sama skaleꞌ. Uleh kitaꞌ tauꞌ badaꞌ Tuhan Allah udah nebus kitaꞌ ari cara idop te upa nyaꞌ, ukai ngau kebala barang te tauꞌ rusak, upa kebala mas abaꞌ pirak. 19 Sebalek kitaꞌ detebos ngau darah Al Maseh te ma mahal te upa darah dumba te niseꞌ tacat abaꞌ niseꞌ pejah. 20 Sebedau dunia toꞌ dapulah Tuhan Allah udah mileh Al Maseh. Uleh de jaman pemadoꞌ toꞌ, Ya baroꞌ datai ke dunia ngau nyelamat kita. 21 Kitaꞌ pecayaꞌ ke Tuhan Allah ari Isa Al Maseh. Tuhan Allah udah nyuroh Isa idop ageꞌ ari pemati abaꞌ nyunyong tingeꞌ Ya. Tegal nyaꞌ mah kitaꞌ pecayaꞌ ke Tuhan Allah abaꞌ proꞌ ngagam Ya.
22 Kitaꞌ udah mreseh direꞌ ari dusa ngau cara nunaꞌ pengajar te kenaꞌ tentang Al Maseh, nyaꞌ te nyuroh kitaꞌ tauꞌ tulos ngaseh menyadeꞌ seiman kitaꞌ. Kebaꞌ nyaꞌ, kitaꞌ alah bamat-amat kaseh ke sama direꞌ. 23 Kitaꞌ alah kaseh ke pangan bukai, nema kitaꞌ udah deadai ageꞌ. Idop baru nyaꞌ nadai ari beneh te tauꞌ mati, uleh ari beneh te nitauꞌ mati. Kitaꞌ buleh idop te baru ari pemadah Tuhan Allah te bekuasa abaꞌ nadai kalaꞌ bebaleꞌ. 24 Alam Kitab Suci datules pitoꞌ,
“Ugaꞌ urang upa rumpot,
abaꞌ ugaꞌ utai te deangap urang bayek, upa bunga rumpot.
Rumpot jadi layoꞌ
abaꞌ kebala bunga rarah.
25 Uleh pemadah Tuhan Allah kaꞌ jong adai sengabot.”b
Pemadah toꞌ mah Brita Bayek te depadah ke kitaꞌ.