Pengajar ke kebala pemimpen abaꞌ ke kebala jemat
5
Ku ngajar kebala pemimpen jemat te adai daentara kitaꞌ. Ku sigeꞌ pemimpen jemat te medaꞌ lansong kati pemedeh Al Maseh. Abaꞌ ku sigeꞌ kaꞌ abaꞌ dajunyong tingeꞌ senta kuasa Ya te lampar besai deanyaꞌ ke ensia. 2 Gemala ke kebala dumba Tuhan Allah te dapecayaꞌ ke kitaꞌ, intu ke sidaꞌ nang tepaksa, uleh pulah ke nyaꞌ ngau ati gaga nunaꞌ kedekaꞌ Tuhan Allah. Pulah ke nyaꞌ nang tegal kitaꞌ kaꞌ nguntong direꞌ, uleh nema kitaꞌ bamat-amat kaꞌ nulong sidaꞌ. 3 Nang kitaꞌ penekaꞌ ati direꞌ mrintah kebala urang te udah dapecayaꞌ Tuhan Allah ke kitaꞌ. Uleh kitaꞌ alah jadi cuntoh te bayek ke sidaꞌ. 4 Abaꞌ senta Al Maseh, Gemala Agong nyaꞌ datai kedua kaleꞌ lah, Ya kaꞌ mreꞌ ke kitaꞌ mahkuta te lampar bayek, te nitauꞌ bebaleꞌ.5 Piyaꞌ gaꞌ kitaꞌ kebala urang te ageꞌ biyak, tunok kah ke kebala urang te tuwai ari kitaꞌ. Abaꞌ ugaꞌ kitaꞌ alah renah ati abaꞌ sama direꞌ. Nema alam Kitab Suci datules,
“Tuhan Allah nglawan urang te sumong,
uleh nganyaꞌ pemayek ati Ya ke urang te renah ati.”a
6 Kebaꞌ nyaꞌ renah ke direꞌ kitaꞌ de baroh jari Tuhan Allah te ma bekuasa isaꞌ enteꞌ nyau senta te pas Ya kaꞌ ningeꞌ kitaꞌ. 7 Serah kah ke Tuhan Allah ugaꞌ utai te kitaꞌ saban nema Ya iboh ke kitaꞌ. 8 Sadar abaꞌ bejaga ke kitaꞌ! Nema Ibles Kepalaꞌ bala sitan munsoh kitaꞌ nyaꞌ, bejalai klileng kiyaꞌ-kitoꞌ upa singa te merawok abaꞌ ngigaꞌ urang te tauꞌ datelan ya. 9 Lawan ke Ibles nyaꞌ ngau iman te tegoh, nema kitaꞌ tauꞌ badaꞌ kebala menyadeꞌ seiman kitaꞌ de ugaꞌ dunia sigeꞌ ngasa pemedeh te upa kitaꞌ asa. 10 Uleh udah kitaꞌ ngasa pemedeh nyaꞌ stegal, Tuhan Allah kaꞌ nyemayek kitaꞌ ageꞌ. Tuhan Allah te lampar bayek nyaꞌ kaꞌ negoh, nguat, ngukoh kitaꞌ. Ya udah ngumai kitaꞌ isaꞌ ngasa kuasa Ya te niseꞌ pemadoꞌ. Utai nyaꞌ tauꞌ piyaꞌ nema kitaꞌ suteꞌ abaꞌ Al Maseh. 11 Tuhan Allah mah te bekuasa sengabot! Amen.
Pesau te pemadoꞌ
12 Silwanos te udah mantoꞌ ku nules surat te panos toꞌ. Ya menyadeꞌ seiman kita te setia. Ari surat toꞌ, ku kaꞌ nyuroh isaꞌ kitaꞌ ransak sengabot. Ku kaꞌ kitaꞌ pecayaꞌ enteꞌ kebala utai te ku tules ke toꞌ tauꞌ ngasoh kitaꞌ ngasa kaseh abaꞌ pemayek Tuhan Allah. Kitaꞌ alah slareh idop alam kaseh abaꞌ pemayek Tuhan Allah nyaꞌ!
13 Kebala urang de Babilon te sama-sama dapileh Tuhan Allah abaꞌ Markos te ku kaseh upa anak ku kedireꞌ kirem tabeꞌ ke kitaꞌ. 14 Betabeꞌ kah kitaꞌ ngau penoh kaseh abaꞌ sama direꞌ urang pecayaꞌ.
Ku bradua isaꞌ kitaꞌ te daempu Al Maseh tauꞌ ngasa idop penoh damai. Amen.