Urang kaya daingat
5
O kebala urang kaya, kitaꞌ kaꞌ bekenang abaꞌ nyabak nema kitaꞌ kaꞌ ngasa idop mrinsaꞌ. 2 Nema pengaya kitaꞌ kaꞌ ancor abaꞌ kebala pramu kitaꞌ depakai sampok. 3 Mas abaꞌ pirak kitaꞌ udah tegeran. Tegeran nyaꞌ kaꞌ jadi bukti enteꞌ kitaꞌ salah. Abaꞌ tegeran nyaꞌ mah makai iseꞌ kitaꞌ upa api. Uleh kitaꞌ tubah kaꞌ nimon kebala pramu de pemadoꞌ dunia toꞌ. 4 Bukti kitaꞌ nadai jujor, kitaꞌ nadai mayar kebala upah ke urang te bekreja de uma kitaꞌ. Kebala urang te ngumpol kebala asel uma kitaꞌ, nyerabak mintaꞌ talau abaꞌ serabak sidaꞌ udah datai ke peneng Tuhan Allah te ma bekuasa. 5 Kitaꞌ udah idop nyamai abaꞌ gaga de dunia toꞌ. Kitaꞌ nupeꞌ direꞌ sampai kenyang uleh kitaꞌ nadai sadar apa te kaꞌ nacah kitaꞌ, upa kebala pengidop te kaꞌ dasemeleh. 6 Kitaꞌ madah urang te kenaꞌ salah nyaꞌ nyuroh sidaꞌ daukom mati abaꞌ sidaꞌ nadai talah ngelawan kitaꞌ.Idop sabar abaꞌ tan alam pemedeh
7 Kebaꞌ nyaꞌ kebala menyadeꞌ ku, sabar kah datai ke senta penatai Tuhan Isa. Prati kah penyabar kebala petani, sidaꞌ nungoꞌ asel te bayek ari tanah nyaꞌ. Abaꞌ sidaꞌ sabar nungoꞌ ujan rama daun kayu blayar abaꞌ ujan rama kayu nimol bunga. 8 Piyaꞌ gaꞌ kitaꞌ alah sabar abaꞌ ati kitaꞌ alah tan nema ari penatai Tuhan Isa nyau kaꞌ semak. 9 Kebala menyadeꞌ ku, kitaꞌ nang bejuweꞌ nyalah pangan bukai isaꞌ nadai daukom Tuhan. Kingat kah Akem udah semak, siap kaꞌ datai. 10 Kebala menyadeꞌ ku, tunaꞌ kah penyabar kebala nabi te mrinsaꞌ tegal madah pesau Tuhan Allah. 11 Kita ngangap sidaꞌ betuah amat, nema sidaꞌ tan. Kitaꞌ udah ninga Ayob tan ngasa pemedeh abaꞌ kitaꞌ tauꞌ badaꞌ kati Tuhan Allah kepanyai mreꞌ kebala utai te bayek ke ya. Nema Tuhan Allah penoh pengaseh abaꞌ bayek ati.
Pengajar tentang pradua
12 Kebala menyadeꞌ ku, prati ke bamat-amat asa kitaꞌ bedanyi, nang ngemaiꞌ nama Tuhan Allah, abaꞌ bumi, abaꞌ kebala utai te kebukai ngau bukti enteꞌ kita madah te kenaꞌ. Kitaꞌ proꞌ tauꞌ madah pitoꞌ: enteꞌ auꞌ padah ke auꞌ, abaꞌ enteꞌ nadai padah ke nadai, isaꞌ Tuhan Allah nadai ngukom kitaꞌ.
13 Enteꞌ adai daentara kitaꞌ te tengan tusah, bradua jaꞌ ke Tuhan Allah. Enteꞌ adai te tengan gaga menanyi jaꞌ muji Tuhan Allah. 14 Enteꞌ adai te tengan pedeh, ya alah ngumai kebala pemimpen jemat, isaꞌ sidaꞌ bradua ke ya abaꞌ ngunsot ngau binyak ngau kuasa Tuhan Isa. 15 Enteꞌ sidaꞌ bradua ngau iman, Tuhan pesti nyemoh urang te pedeh nyaꞌ, abaꞌ enteꞌ ya udah mulah dusa, dusa ya kaꞌ deampon. 16 Kebaꞌ nyaꞌ kitaꞌ alah ngakoꞌ kebala dusa ke pangan bukai abaꞌ sama bradua ke pangan bukai, isaꞌ kitaꞌ tauꞌ semoh. Pradua urang te kenaꞌ ma bekuasa. 17 Elia toꞌ urang biasa ensia te lemah sama upa kita. Ya bamat-amat bradua isaꞌ ari nadai ujan, kebaꞌ nyaꞌ ari nadai ujan slamaꞌ tiga taon setengah.a 18 Udah nyaꞌ Elia bradua ageꞌ, isaꞌ ari ujan, baroꞌ ari ujan abaꞌ kebala te detamak tauꞌ bebuah.b
19 Kebala menyadeꞌ ku, enteꞌ adai daentara kitaꞌ te nadai nunaꞌ pengajar te kenaꞌ, uleh adai urang bukai te nulong ya bebalek ke Tuhan Allah, 20 kitaꞌ alah tauꞌ badaꞌ, urang te ngemaiꞌ urang te dusa bebalek ke Tuhan Allah, kaꞌ nyelamat urang te dusa nyaꞌ ari pemati, abaꞌ Tuhan Allah ngampon urang nyaꞌ ari kebala dusa ya te mayoh.c