Urang te bekawan abaꞌ dunia
4
Apa te nyuroh kitaꞌ blayaꞌ abaꞌ betengek daentara kitaꞌ? Ukai weh tegal mayoh kebala penekaꞌ kitaꞌ kedireꞌ te belawan alam ati kitaꞌ?2 Kitaꞌ kaꞌ amat ke kebala utai uleh kitaꞌ nitauꞌ buleh, kebaꞌ kitaꞌ kaꞌ sampai munoh! Kitaꞌ ransak kaꞌ buleh, uleh kitaꞌ nadai buleh utai, kebaꞌ kitaꞌ betengek abaꞌ blayaꞌ. Kitaꞌ nadai buleh utai nema kitaꞌ nadai mintaꞌ ke Tuhan Allah. 3 Enteꞌ kitaꞌ mintaꞌ kitaꞌ nadai buleh kebala utai, nema kitaꞌ salah pintaꞌ. Kitaꞌ proꞌ kaꞌ kebala utai ngau muas direꞌ kitaꞌ kedireꞌ jaꞌ. 4 Kitaꞌ toꞌ upa urang inoꞌ te baraꞌ tengan belaki! Kitaꞌ tauꞌ badaꞌ enteꞌ kitaꞌ gaga ke pramai dunia toꞌ, breti kitaꞌ munsoh Tuhan Allah. Kebaꞌ enteꞌ kitaꞌ mileh bekawan abaꞌ dunia toꞌ, kitaꞌ pesti mulah direꞌ bemunsoh abaꞌ Tuhan Allah. 5 Kitab Suci madah, “Roh Kudos te adai alam kita kaꞌ amat isaꞌ kita betah abaꞌ Ya.” Te depadah toꞌ amat mah, kitaꞌ alah pecayaꞌ ke utai nyaꞌ. 6 Amat mah dunia toꞌ nguda kita uleh Tuhan Allah lebeh mayoh mreꞌ krunia ke kita ngau kita ngadap ugaꞌ nyaꞌ. Kebaꞌ adai datules alam Kitab Suci:
“Tuhan Allah nglawan urang te sumong,
uleh nganyaꞌ pemayek ati Ya ke urang te renah ati.”a
7 Kebaꞌ nyaꞌ tunok ke kitaꞌ ke Tuhan Allah. Lawankah Ibles Kepalaꞌ bala sitan isaꞌ ya rari ari kitaꞌ. 8 Datai ke kitaꞌ nyemak direꞌ ke Tuhan Allah, abaꞌ Tuhan Allah sigeꞌ kaꞌ nyemak kitaꞌ. Urang te dusa, breseh kah idop kitaꞌ ari dusa! Abaꞌ urang te gamaꞌ, breseh ke ati kitaꞌ. 9 Kitaꞌ alah bekenang, nesal, abaꞌ nyabak. Ari pada kitaꞌ ketawaꞌ lebeh bayek kitaꞌ nyabak, ari pada kitaꞌ gaga lebeh bayek kitaꞌ reyu! 10 Renah kah direꞌ kitaꞌ de mua Tuhan Allah, isaꞌ Tuhan Allah ningeꞌ kitaꞌ.
Nang nyalah pangan bukai
11 Kebala menyadeꞌ ku nang kitaꞌ gah nganoꞌ pangan abaꞌ nang nyalah pangan. Urang te gah nganoꞌ abaꞌ nyalah kebala menyadeꞌ seiman, ya nganoꞌ abaꞌ nyalah Printah Tuhan Allah. Abaꞌ enteꞌ kitaꞌ nyalah Printah Tuhan Allah, nyaꞌ reti kitaꞌ ngai patoh ke Printah nyaꞌ abaꞌ ngangap direꞌ akem lebeh tingeꞌ ari Printah nyaꞌ. 12 Proꞌ Tuhan Allah mah te mreꞌ Printah ke ensia abaꞌ tauꞌ nyidang ensia. Ya mah te nyelamat abaꞌ te ngukom kita. Kebaꞌ nang kitaꞌ brani nyalah sama direꞌ.
Nang nglupa Tuhan enteꞌ ngamoꞌ mulah kebala utai
13 O kebala kitaꞌ te madah, “Enteꞌ nadai sari toꞌ lah pagi kami kaꞌ angkat ke kuta anoꞌ abaꞌ diyau den setaon kaꞌ bedagang buleh untong.” 14 Uleh kitaꞌ kedireꞌ nitauꞌ badaꞌ apa te kaꞌ tejadi ke kitaꞌ pagi lah! Idop de dunia toꞌ upa asap, stegal mah pedaꞌ udah nyaꞌ lenyau. 15 Tunaꞌ sa kitaꞌ alah madah pitoꞌ, “Enteꞌ Tuhan nyadi kami kaꞌ idop abaꞌ mulah kebala brena utai.” 16 Uleh entoꞌ kitaꞌ sumong abaꞌ ngepah ngemah pengamoꞌ direꞌ. Ugaꞌ nyaꞌ bamat-amat salah. 17 Kebaꞌ nyaꞌ enteꞌ urang tauꞌ badaꞌ apa te kenaꞌ, uleh ya nadai mulah utai te kenaꞌ nyaꞌ, urang nyaꞌ dusa.