Nang nyemeh mipeh urang
2
Kebala menyadeꞌ ku, kitaꞌ urang te pecayaꞌ ke Isa Al Maseh, Tuhan kita te patot dejunyong tingeꞌ. Kebaꞌ nyaꞌ nang kitaꞌ nyemeh mipeh, medaꞌ urang ari gaya idop ya. 2 Empama teh, kitaꞌ tengan kumpol adai urang datai ngau baju te bayek abaꞌ ngau kebala tincem mas, baroꞌ datai gaꞌ urang misken ngau baju te gareꞌ, 3 uleh kitaꞌ lebeh hormat ke urang te ngau baju te bayek nyaꞌ. Kitaꞌ madah ke ya, “De atau toꞌ ke wan dudok de teban te bayek.” Uleh ke urang te misken kitaꞌ madah, “Dudok de baroh de teban te jaiꞌ toꞌ.” Abaꞌ ke urang misken te sikoꞌ ageꞌ, “Diri ken.” 4 Enteꞌ kitaꞌ mulah piyaꞌ breti kitaꞌ nyemeh mipeh urang, abaꞌ nilai urang ngau pemiker te jat.5 Kebala menyadeꞌ ku te ku kaseh, dinga kah! Urang te misken de dunia toꞌ depileh Tuhan Allah, isaꞌ jadi urang te kaya alam iman, abaꞌ kaꞌ adai hak de alam Pemrintah Tuhan Allah upa te udah dedanyi Tuhan Allah ke urang te ngaseh Ya. 6 Uleh kitaꞌ empala nadai hormat ke urang misken, bataꞌ urang kaya te gah ngelakar kitaꞌ abaꞌ ngiret kitaꞌ ke teban jalai urang sidang! 7 Urang kaya mah gaꞌ te gah melicak nama Isa Tuhan kita te udah mulah kita jadi empu Ya.
8 Enteꞌ kitaꞌ patoh ke Printah Tuhan Allah te ma penteng, kitaꞌ udah mulah te kenaꞌ. Printah nyaꞌ, “Kaseh ke sama direꞌ ensia, upa ngaseh direꞌ kedireꞌ.”a 9 Uleh enteꞌ kitaꞌ nyemeh mipeh urang, kitaꞌ mulah dusa, nyaꞌ mah bukti kitaꞌ salah nema kitaꞌ nadai patoh ke Ya. 10 Kebaꞌ sapa te nadai patoh ke suteꞌ printah, breti ya nadai patoh ke ugaꞌ printah. 11 Nema Tuhan Allah te madah, “Nang besinah.” Ya gaꞌ te madah, “Nang munoh.” Enteꞌ kitaꞌ nadai besinah, uleh kitaꞌ munoh, nyaꞌ sama gaꞌ kitaꞌ nadai patoh ke ugaꞌ Prator Tuhan Allah te detules Musa.b
12 Jemah lah kitaꞌ desidang nunaꞌ Prator Musa te nglepas kitaꞌ ari dusa. Kebaꞌ nyaꞌ jaga ke mulot kitaꞌ abaꞌ apa te kitaꞌ pulah. 13 Enteꞌ kitaꞌ ngai nganyaꞌ pengaseh kitaꞌ ke urang bukai, Tuhan Allah sigeꞌ ngai nganyaꞌ pengaseh Ya ke kitaꞌ senta kitaꞌ desidang. Uleh urang te nganyaꞌ pengaseh ya ke urang bukai, ya nadai takot senta ya desidang.
Iman abaꞌ kebala pemulah utai te bayek
14 Kebala menyadeꞌ ku, niseꞌ guna urang madah, “Ku urang te adai iman,” enteꞌ ya nadai mulah te bayek. Tauꞌ weh iman te piyaꞌ nyelamat ya? 15 Empama teh, adai urang pecayaꞌ te niseꞌ kayen baju abaꞌ niseꞌ pemakai ngenap ari, 16 baroꞌ kitaꞌ madah ke ya, “Tuhan Allah mereꞌ tuah ke kitaꞌ; ngau ke selawar baju te bayek abaꞌ makai mah.” Niseꞌ guna kitaꞌ madah piyaꞌ enteꞌ kitaꞌ nadai mereꞌ ke ya apa te deperlu ngau ya idop. 17 Piyaꞌ gaꞌ iman, enteꞌ kitaꞌ ngai mulah te bayek, niseꞌ guna iman nyaꞌ.
18 Uleh mali adai urang te madah, “De meh adai iman, abaꞌ de ku adai pemulah te bayek.” Ku kaꞌ madah ke urang nyaꞌ, “Kati meh madah direꞌ adai iman enteꞌ meh niseꞌ mulah utai te bayek? Entoꞌ ku kaꞌ nganyaꞌ ke meh iman ku ari apa te ku pulah.” 19 Kitaꞌ pecayaꞌ peroꞌ sikoꞌ mah Tuhan Allah. Nyaꞌ bayek! Uleh kebala sitan sigeꞌ pecayaꞌ abaꞌ sidaꞌ begetar takot.
20 Kitaꞌ budu amat! Apa perlu bukti enteꞌ kitaꞌ nadai mulah te bayek niseꞌ guna iman kitaꞌ? 21 Ingat puyang jagang kita Abraham. Ya deangap kenaꞌ ari kebala utai te depulah ya, pas ya mereꞌ Isak anak ya ngau korban pesemah de atau mesbah.c 22 Ditoꞌ kitaꞌ tauꞌ medaꞌ nema ya pecayaꞌ ke Tuhan Allah, kebaꞌ ya alah mulah utai te bayek. Utai te bayek te depulah Abraham nyaꞌ nyuroh iman ya niseꞌ pejah. 23 Temoꞌ mah apa te adai detules alam Kitab Suci te madah munyi pitoꞌ, “Abraham pecayaꞌ ke Tuhan Allah abaꞌ Tuhan Allah ngangap ya urang te kenaꞌ.” Nyaꞌ nyuroh ya depadah kawan Tuhan Allah.d 24 Jelas mah entoꞌ, urang deangap kenaꞌ uleh Tuhan Allah nyaꞌ tegal apa te depulah ya, nadai peroꞌ tegal iman ya gena.
25 Ingat ke gaꞌ Rahap inoꞌ pelacor nyaꞌ. Ya deangap kenaꞌ uleh Tuhan Allah nema apa te ya pulah, pas ya napok sidaꞌ Israel te diyau-diyau merati menua ya, abaꞌ nulong sidaꞌ lari ari menua ya mansaꞌ jalai te kebukai.e 26 Ku madah ke kitaꞌ, tuboh asa niseꞌ semengat mati, piyaꞌ gaꞌ iman asa nadai mulah te bayek niseꞌ guna.