SURAT
YAKUBOS
Tabeꞌ ari Yakubos
1
Tabeꞌ ari ku Yakubos te ngelayan Tuhan Allah abaꞌ Tuhan Isa Al Maseh ke ugaꞌ urang te daempu Tuhan Allah te pamar piyar de menua bukai.Pemanai ari Tuhan Allah
2 Kebala menyadeꞌ ku, kitaꞌ alah gaga sengabot pas kitaꞌ tengan ngasa brena pemedeh te ngau nguji kitaꞌ. 3 Nema kitaꞌ tauꞌ badaꞌ, pemedeh te ngau nguji kitaꞌ nyaꞌ tauꞌ nyuroh kitaꞌ tegoh pecayaꞌ ke Tuhan Allah. 4 Kitaꞌ alah tegoh sengabot, juros maju isaꞌ kitaꞌ bepiker tuwai abaꞌ idop kitaꞌ niseꞌ pejah. 5 Enteꞌ adai daentara kitaꞌ te nitauꞌ badaꞌ kati cara ngadap brena pemedeh te ngau nguji kitaꞌ, urang nyaꞌ alah mintaꞌ pemanai ke Tuhan Allah abaꞌ Tuhan Allah kaꞌ mreꞌ pemanai nyaꞌ ke ya. Nema Tuhan Allah nyaꞌ gaga mreꞌ abaꞌ Ya nadai britong ke urang te mintaꞌ. 6 Uleh enteꞌ urang nyaꞌ mintaꞌ, ya alah pecayaꞌ ke Tuhan Allah. Nema urang te nadai pecayaꞌ sama upa glumang aiꞌ laot te kenaꞌ sepu kudeꞌ kiyaꞌ-kitoꞌ. 7-8 Urang te piyaꞌ nadai entap alam brena utai te dapulah ya, pemiker idop ya gamaꞌ, kebaꞌ ya nitauꞌ nrimaꞌ kebala utai ari Tuhan Allah.
Urang misken abaꞌ urang kaya
9 Kebala menyadeꞌ te misken alah gaga sengabot nema udah jadi urang te penteng de mua Tuhan Allah. 10 Sidaꞌ te kaya tunaꞌ sa alah gaga Tuhan Allah ngemaroh sidaꞌ. Nema urang te kaya lenyau upa bunga rumpot. 11 Mata ari tumoh blumaꞌ panas betat, kebaꞌ bunga rumpot nyaꞌ jadi layoꞌ. Nyaꞌ nyuroh bunga nyaꞌ rarah abaꞌ pemayek ya lenyau. Piyaꞌ gaꞌ urang te kaya; ya mati tengan ya bekreja upa biasa.
Tuhan Allah nadai kalaꞌ encuba ensia
12 Betuah amat urang te tan tengan ya dauji. Nema udah ya tan kenaꞌ uji ya kaꞌ nrimaꞌ mahkota pengidop, nyaꞌ mah idop te udah de dedanyi Tuhan Allah ke kebala urang te ngaseh Tuhan Allah. 13 Enteꞌ urang tengan dacuba mulah utai te jat, nang urang nyaꞌ madah Tuhan Allah te encuba ya, nema Tuhan Allah nitauꞌ dacuba uleh utai te jat, abaꞌ Ya nadai kalaꞌ encuba urang. 14 Uleh pas tengan kita dacuba, te ngemaiꞌ kita mulah utai te jat nyaꞌ penekaꞌ kita kedireꞌ. 15 Baroꞌ enteꞌ penekaꞌ te jat nyaꞌ nganong, penekaꞌ te jat nyaꞌ beranak ke dusa. Abaꞌ enteꞌ dusa nyaꞌ nyau besai dusa nyaꞌ nyuroh mati jong tepisah ari Tuhan Allah. 16 Kebala menyadeꞌ ku te ku kaseh, nang kitaꞌ tesat. 17 Ngenap pemreꞌ te bayek abaꞌ te niseꞌ pejah datai ari Tuhan Allah te mulah kebala utai te tampak de langet. Tuhan Allah nadai bebaleꞌ abaꞌ nadai mulah utai te petang. 18 Tuhan Allah mreꞌ kita idop te baru, pas kita pecayaꞌ ke Brita Bayek, nema nyaꞌ mah te dakedekaꞌ Ya. Tuhan Allah mulah upa piyaꞌ isaꞌ kita jadi buah pon te dabreꞌ ke Tuhan Allah ari ugaꞌ utai te dapulah Ya.
Ninga abaꞌ mulah apa te Jakoꞌ Tuhan Allah
19 Prati kah toꞌ bayek-bayek kebala menyadeꞌ te ma ku kaseh! Ngenap urang alah ninga dulau, nang beburoh becakap abaꞌ mudah ranseng. 20 Nema urang te ranseng nitauꞌ mulah te kenaꞌ de mua Tuhan Allah. 21 Kebaꞌ nyaꞌ, buai ke ugaꞌ utai te nadai patot abaꞌ ugaꞌ utai te jat te ageꞌ adai alam ati kitaꞌ. Trimaꞌ kah ngau renah ati apa te jakoꞌ Tuhan Allah te detamak Tuhan Allah alam ati kitaꞌ. Nema jakoꞌ Tuhan Allah nyaꞌ kuat ngau nyelamat kitaꞌ.
22 Uleh kitaꞌ alah mulah apa te jakoꞌ Tuhan Allah. Nang proꞌ ninga gena te jakoꞌ Ya, nema enteꞌ piyaꞌ kitaꞌ nipu direꞌ kedireꞌ. 23 Urang te ninga apa te jakoꞌ Tuhan Allah uleh nadai mulah apa te depadah Ya, urang nyaꞌ sama upa urang te tengan medaꞌ mua direꞌ de kaca. 24 Udah ya mrati direꞌ de kaca bayek-bayek, ya teka angkat abaꞌ lansong klupa kati upa mua direꞌ. 25 Printah Tuhan Allah niseꞌ pejah. Printah Tuhan Allah nyaꞌ ngelepas kita ari dusa abaꞌ nyuroh ati kitaꞌ lantang. Enteꞌ urang nliti, mrati abaꞌ patoh ke Printah Ya nyaꞌ abaꞌ nadai proꞌ ninga gena, urang nyaꞌ betuah. 26 Asa adai kitaꞌ te ngasa direꞌ urang te patoh ke kegiatan agama uleh kitaꞌ nadai nyaga mulot direꞌ, kitaꞌ empala nipu direꞌ abaꞌ te kitaꞌ pulah nyaꞌ jadi niseꞌ reti. 27 Kegiatan agama te nyuroh Tuhan Allah Apai kita gaga abaꞌ te niseꞌ pejah de pemedaꞌ Ya, kita alah nyaga kebala anak patu abaꞌ kebala balu te idop mrinsaꞌ, abaꞌ nang ngengaꞌ dunia ngutor idop kita.