Te alah depulah kebala urang tuai, pemudaꞌ abaꞌ pemantoꞌ
2
Uleh meh Titos, meh alah ngajar pengajar te kenaꞌ. 2 Ngajar kebala urang laki te tuai, isaꞌ sidaꞌ talah ngetat direꞌ, dehormat urang, abaꞌ bijak. Iman sidaꞌ alah kuat, sidaꞌ alah ngaseh urang ngau cara te kenaꞌ, abaꞌ alah tan ngadap pemedeh. 3 Padah ke gaꞌ ke urang inoꞌ te tuai, isaꞌ sidaꞌ idop patoh ke Tuhan Allah, isaꞌ sidaꞌ nadai mejaiꞌ urang bukai, abaꞌ ukai pemabok. Sidaꞌ alah ngajar cara idop te kenaꞌ. 4 Nema ngau cara idop te upa nyaꞌ, sidaꞌ tauꞌ ngajar inoꞌ te ageꞌ mudaꞌ ngaseh laki abaꞌ anak miyak sidaꞌ, 5 bijak abaꞌ idop kudos, rajen nguros rumah tangaꞌ, bayek ati, abaꞌ patoh ke laki direꞌ. Sidaꞌ alah mulah ugaꞌ nyaꞌ isaꞌ urang nadai mejah pengajar Tuhan Allah te udah kita trimaꞌ.6 Upa piyaꞌ gaꞌ meh Titos, meh alah ngajar kebala urang laki te mudaꞌ isaꞌ sidaꞌ talah ngetat direꞌ. 7 Alam ugaꞌ utai te meh pulah, meh alah jadi teladan mulah utai te bayek. Enteꞌ meh ngajar meh alah jujor abaꞌ bamat-amat. 8 Abaꞌ ugaꞌ te meh ajar alah kenaꞌ, isaꞌ apa te meh ajar nadai depejah urang. Isaꞌ kebala urang te ngelawan meh malu, nema sidaꞌ niseꞌ nemu penyalah te tauꞌ dengau sidaꞌ mejah kita.
9 Kebala pemantoꞌ te udah pecayaꞌ, alah patoh, abaꞌ alah selareh berusaha nyuroh ati tuan sidaꞌ gaga, abaꞌ sidaꞌ nitauꞌ ngelawan tuan sidaꞌ. 10 Nang sidaꞌ encuri kebala utai te deempu tuan sidaꞌ, abaꞌ sidaꞌ alah tauꞌ nunyok direꞌ urang jujor abaꞌ setia. Enteꞌ sidaꞌ mulah te bayek upa piyaꞌ, idop sidaꞌ nyaꞌ kaꞌ nyuroh pengajar Tuhan Allah Penyelamat kita tauꞌ depuji urang.
Pemayek ati Tuhan Allah nyelamat ensia
11 Kita idop upa nyaꞌ nema Tuhan Allah udah nganyaꞌ pemayek ati Ya ke kita. Pemayek ati Ya nyaꞌ nyelamat ugaꞌ ensia. 12 Pemayek ati Tuhan Allah nyaꞌ mah te ngajar kita isaꞌ nadai ageꞌ idop ngelawan penekaꞌ Tuhan Allah abaꞌ nadai idop nunaꞌ penekaꞌ dunia toꞌ. Kita deajar isaꞌ idop alam dunia toꞌ alah talah ngetat direꞌ, adel abaꞌ setia ke Tuhan Allah. 13 Kita idop upa nyaꞌ, blumaꞌ nungoꞌ senta ari te nyuroh gaga te kita agam ke nyaꞌ, senta nyaꞌ dunia kaꞌ medaꞌ lampar besai sinar kuasa Isa Al Maseh, Ya mah Allah te Mabesai abaꞌ Penyelamat kita. 14 Ya udah nyerah direꞌ nyelamat kita ari kebala utai te jat abaꞌ mreseh kita ari dusa isaꞌ kita jadi urang te deempu Ya te ransak mulah te bayek.
15 Ajar ke ugaꞌ nyaꞌ abaꞌ ansak ke sidaꞌ isaꞌ sidaꞌ mulah ugaꞌ nyaꞌ. Kuat ke sidaꞌ, abaꞌ rara ke sidaꞌ enteꞌ sidaꞌ mulah penyalah. Meh tauꞌ mulah piyaꞌ nema meh adai kuasa ari Tuhan Allah, kebaꞌ nang ngengaꞌ sidaꞌ menadai meh.