Pesau te pemadoꞌ
3
Kingat kah kebala jemat meh, prati kah sidaꞌ isaꞌ sidaꞌ tunok ke pemrintah abaꞌ pemimpen te bekuasa, abaꞌ patoh ke printah sidaꞌ. Sidaꞌ alah slareh siap mulah te bayek. 2 Sidaꞌ nang mejat pangan, nang blayaꞌ abaꞌ urang. Sidaꞌ alah ritak abaꞌ bebasa ke ugaꞌ urang. 3 Nema kita sebedau pecayaꞌ sigeꞌ budu, nadai patoh ke Tuhan Allah, abaꞌ idop tesat. Kebala kedekaꞌ kita te jat mrintah ati kita, idop kita ma jat penoh iri ati abaꞌ slareh areh ke pangan. 4 Uleh Tuhan Allah Penyelamat kita nganyaꞌ pemayek abaꞌ kaseh Ya ke kita ensia. 5 Ya nyelamat kita ukai tegal kita udah mulah kebala utai te bayek, uleh tegal Ya kaseh badaꞌ kita. Ya nyelamat kita ngau Roh Kudos te meranak kita ageꞌ, nyaꞌ mah te mreseh kita ari dusa, abaꞌ te nyuroh kita buleh idop baru. 6 Tuhan Allah nadai bejangkaꞌ mreꞌ Roh Kudos ke kita ari apa te udah dapulah Isa Al Maseh, Penyelamat kita, 7 isaꞌ kita jadi anak Tuhan Allah te tauꞌ jong idop abaꞌ Ya upa te kita agam. Utai nyaꞌ tauꞌ piyaꞌ nema Tuhan Allah ngangap kita kenaꞌ de mua Ya. Ya mulah piyaꞌ nema Ya bayek ati ke kita. 8 Apa te udah ku padah ke toꞌ amat kenaꞌ, meh alah bamat-amat ngajar toꞌ ke sidaꞌ isaꞌ sidaꞌ te udah pecayaꞌ ke Tuhan Allah bamat-amat brusaha mulah utai te bayek nema nyaꞌ mah te bayek abaꞌ beguna ngau ensia. 9 Nang meh nungaꞌ kebala urang te gah betengek ke utai te niseꞌ reti, abaꞌ betengek kebala kisah asal-usol. Nang blayaꞌ ke kebala Prator Tuhan Allah te datules Musa. Nema ugaꞌ nyaꞌ niseꞌ guna abaꞌ nadai nguntong urang. 10 Meh alah ngerara kebala urang te nyuroh pecah belah alam jemat isaꞌ sidaꞌ badoꞌ mulah te piyaꞌ. Rara ke sidaꞌ nang lebeh ari dua kaleꞌ. Enteꞌ sidaꞌ ageꞌ mulah upa piyaꞌ, jaoh ke sidaꞌ. 11 Meh pesti tauꞌ badaꞌ kebala urang te upa nyaꞌ nadai keran mulah utai te kenaꞌ. Kebala dusa sidaꞌ nyaꞌ, nyaꞌ mah bukti sidaꞌ salah.12 Ku kaꞌ ngutos entara Artemas abaꞌ Tikikos ngusong meh. Pas salah sikoꞌ ari snikoꞌ datai, beburoh ke meh ngusong ku ke Nikopolis. Nema ku udah mutos kaꞌ diyau den slamaꞌ rama celap. 13 Brusaha bamat-amat talau kah Senas urang te ahli alam ukom abaꞌ Apulos isaꞌ snikoꞌ buleh ugaꞌ utai te dengau snikoꞌ slamaꞌ dejalai. 14 Kebaꞌ isaꞌ mah kebala urang kita belajar gaꞌ mulah utai te bayek abaꞌ tauꞌ mreꞌ apa te daperlu ngau urang idop, isaꞌ idop sidaꞌ beguna ke urang bukai.
Tabeꞌ
15 Ugaꞌ urang te abaꞌ ku ditoꞌ kirem tabeꞌ ke kitaꞌ. Padah kah kirem tabeꞌ ku ke kebala kawan kita te sama pecayaꞌ. Engkremaꞌ Tuhan Allah nganyaꞌ pemayek ati Ya ke ugaꞌ kitaꞌ.