Pesau te pemadoꞌ
3
Ingat ke kebala jemat meh isaꞌ sidaꞌ tunok ke pemrintah abaꞌ pemimpen te bekuasa. Sidaꞌ alah selareh patoh ke pemimpen toꞌ abaꞌ alah selareh siap mulah te bayek. 2 Padah ke sidaꞌ nang mejaiꞌ pangan, nang belayaꞌ, sidaꞌ alah ritak abaꞌ bebasa ke ugaꞌ urang. 3 Nema kita sebedau pecayaꞌ sigeꞌ budu, nadai patoh ke Tuhan Allah, abaꞌ idop tesat. Kebala kedekaꞌ kita te jat mrintah ati kita, idop kita ma jat penoh iri abaꞌ selareh areh ke pangan. 4 Uleh Tuhan Allah Penyelamat kita nganyaꞌ pemayek abaꞌ kaseh Ya ke kita ensia. 5 Ya nyelamat kita ukai tegal kita udah mulah kebala utai te bayek, uleh tegal Ya kaseh badaꞌ kita. Ya nyelamat kita ngau Roh Kudos te meranak kita ageꞌ, nyaꞌ mah te mreseh kita ari dusa, abaꞌ te nyuroh kita buleh idop baru. 6 Tuhan Allah nadai bejangkaꞌ mereꞌ Roh Kudos ke kita ari apa te udah depulah Isa Al Maseh, Penyelamat kita, 7 isaꞌ kita jadi anak Tuhan Allah te tauꞌ jong idop abaꞌ Ya upa te kita agam. Utai nyaꞌ tauꞌ piyaꞌ nema Tuhan Allah ngangap kita kenaꞌ de mua Ya. Ya mulah piyaꞌ nema Ya bayek ati ke kita. 8 Apa te udah ku padah ke toꞌ amat kenaꞌ. Meh alah bamat-amat ngajar toꞌ ke sidaꞌ isaꞌ sidaꞌ te udah pecayaꞌ ke Tuhan Allah bamat-amat berusaha mulah utai te bayek, nema nyaꞌ mah te bayek abaꞌ beguna ngau ensia. 9 Nang meh nungaꞌ kebala urang te gah betengek ke utai te niseꞌ reti, abaꞌ betengek kebala kisah asal-usol. Nang belayaꞌ ke kebala Prator Tuhan Allah te detules Musa. Nema ugaꞌ nyaꞌ niseꞌ guna abaꞌ nadai nguntong urang. 10 Meh alah ngerara kebala urang te nyuroh pecah belah alam jemat isaꞌ sidaꞌ badoꞌ mulah te piyaꞌ. Rara ke sidaꞌ nang lebeh ari dua kaleꞌ. Enteꞌ sidaꞌ ageꞌ mulah upa piyaꞌ, jaoh ke sidaꞌ. 11 Meh pesti tauꞌ badaꞌ kebala urang te upa nyaꞌ nadai keran mulah utai te kenaꞌ. Kebala dusa sidaꞌ nyaꞌ, nyaꞌ mah bukti sidaꞌ salah.12 Ku kaꞌ ngutos entara Artemas abaꞌ Tikikos ngusong meh. Pas salah sikoꞌ ari senikoꞌ datai, beburoh ke meh ngusong ku ke Nikopolis. Nema ku udah mutos kaꞌ diyau den selamaꞌ rama celap. 13 Berusaha bamat-amat ke nulong Senas urang te ahli alam ukom abaꞌ Apulos, isaꞌ senikoꞌ buleh ugaꞌ utai te dengau senikoꞌ selamaꞌ dejalai. 14 Abaꞌ isaꞌ mah kebala urang kita belajar mulah utai te bayek abaꞌ tauꞌ mereꞌ apa te deperlu ngau urang idop, isaꞌ idop sidaꞌ beguna ngau urang bukai.
Kirem tabeꞌ
15 Ugaꞌ urang te abaꞌ ku ditoꞌ kirem tabeꞌ ke kitaꞌ. Padah ke kirem tabeꞌ ku ke kebala kawan kita te sama pecayaꞌ. Engkremaꞌ Tuhan Allah nganyaꞌ pemayek ati Ya ke ugaꞌ kitaꞌ.