SURAT PAULOS KE
TITOS
Paulos kirem tabeꞌ ke Titos
1
Surat toꞌ ari ku, Paulos playan Tuhan Allah abaꞌ rasol Isa Al Maseh. Ku dautos nulong kebala urang te dapileh Tuhan Allah nguat iman sidaꞌ abaꞌ ngajar apa te kenaꞌ ke sidaꞌ isaꞌ sidaꞌ nunaꞌ kedekaꞌ Tuhan Allah.a 2 Nema kita pecayaꞌ abaꞌ nunaꞌ pengajar nyaꞌ, kita tauꞌ ngagam jong idop abaꞌ Tuhan Allah sengabot. Tuhan Allah te nadai kalaꞌ bulaꞌ udah nanyi idop nyaꞌ ke kita sebedau dunia dapulah. 3 Nyau senta te pas, Tuhan Allah nyuroh Brita Bayek Ya da ketauꞌ urang. Brita Bayek nyaꞌ udah de pecayaꞌ ke ku, abaꞌ ku madah pesau nyaꞌ nema perintah Tuhan Allah Penyelamat kita. 4 Titos ku nules surat toꞌ ke meh. Ku udah ngangap meh upa medaꞌ anak ku kedireꞌ, nema tua sama pecayaꞌ ke Al Maseh. Ku bradua isaꞌ Tuhan Allah Apai kita abaꞌ Isa Al Maseh Penyelamat kita, nganyaꞌ pemayek ati Ya abaꞌ mreꞌ idop penoh damai ke meh.Pengerja Titos da Pulau Krita
5 Ku nudi meh da pulau Krita isaꞌ meh nguros kebala utai te bedau de uros. Abaꞌ ku kaꞌ isaꞌ meh ngangkat kebala pemimpen jemat de ngenap kuta munyi te depadah ku toꞌ: 6 Pemimpen jemat alah urang te niseꞌ pejah, setia abaꞌ bini direꞌ, kebala anak ya pecayaꞌ ke Isa Al Maseh abaꞌ sidaꞌ alah mulah te bayek isaꞌ niseꞌ urang te tauꞌ nudoh sidaꞌ mulah utai te nadai senunoh, abaꞌ sidaꞌ nadai pedeh deatoh. 7 Pemimpen jematb nyaꞌ urang te nguros pekerja Tuhan Allah, kebaꞌ ya alah niseꞌ pejah, nadai sumong abaꞌ garang, ukai pemabok, ukai urang te keran blayaꞌ abaꞌ nadai tamaꞌ ke kebala duet. 8 Uleh pemimpen jemat toꞌ alah urang te gaga nrimaꞌ urang bukai de rumah ya, gaga ke kebala utai te bayek, panai, adel, suci abaꞌ tauꞌ ngetat direꞌ. 9 Ya alah bepegai teguh ke pengajar te tauꞌ dapecayaꞌ, upa te udah deajar ke ya isaꞌ ya tauꞌ ngansak urang nunaꞌ pengajar te kenaꞌ abaꞌ isaꞌ ya tauꞌ madah penyalah urang te ngelawan pengajar nyaꞌ. 10 Nema udah mayoh urang te meruntak terutama sidaꞌ te ngajar ugaꞌ urang Kristen alah de sunat, sidaꞌ nipu urang ngau umong te bulaꞌ. 11 Sidaꞌ alah datutop mulot nema sidaꞌ udah ngacau mayoh keluarga ngau kebala utai te nadai perlu deajar. Sidaꞌ mulah piyaꞌ bayah kaꞌ ngigaꞌ duet. 12 Udah adai dulau teh sidaꞌ pulau Krita kedireꞌ te deangap sidaꞌ nabi, ya udah madah, “Sidaꞌ te de pulau Krita gah ngemulaꞌ, sidaꞌ upa jelu te ganas, sidaꞌ muloꞌ abaꞌ luntos.” 13 Apa te jakoꞌ ya nyaꞌ amat mah. Kebaꞌ nyaꞌ kingat ke amat uleh meh jemat te adai de krita, isaꞌ sidaꞌ bamat-amat proꞌ pecayaꞌ ke pengajar te kenaꞌ. 14 Meh alah ngingat sidaꞌ isaꞌ sidaꞌ nadai pecayaꞌ ageꞌ kebala kisah Yahudi te nadai bamat. Abaꞌ kingat ke sidaꞌ isaꞌ sidaꞌ nadai nunaꞌ kebala prator urang te udah nudi pengajar kitaꞌ te kenaꞌ 15 Urang te suci ngangap ugaꞌ utai bayek dengau, uleh urang te najes abaꞌ nadai pecayaꞌ ngangap ugaꞌ utai najes nadai bayek dengau, nema pemiker abaꞌ ati nurani sidaꞌ najes. 16 Sidaꞌ nyaꞌ madah direꞌ nglala Tuhan Allah, uleh apa te sidaꞌ pulah nunyok enteꞌ sidaꞌ nadaiꞌ nglala Tuhan Allah. Tuhan Allah gedeꞌ ke sidaꞌ. Sidaꞌ ngai patoh ke Tuhan Allah, abaꞌ nadai talah mulah te bayek.