Pesau Paulos ke Timutios
4
Isa Al Maseh kaꞌ datai ageꞌ ke dunia toꞌ nyidang kebala urang te idop abaꞌ te mati; abaꞌ Ya kaꞌ nganyaꞌ Pemrintah Ya. Kebaꞌ nyaꞌ de mua Tuhan Allah abaꞌ Isa Al Maseh, ku mintaꞌ bamat-amat ke meh 2 nusoi Brita Bayek ari Tuhan Allah. Tusoi sengabot kah, nang iboh ke urang kaꞌ ninga abaꞌ nadai. Padah ke apa penyalah sidaꞌ, rara abaꞌ ansak ngau sabar abaꞌ pengajar te kenaꞌ.3 Nema kaꞌ datai senta urang ngai nerimaꞌ ageꞌ pengajar te kenaꞌ, sidaꞌ ninga apa te dekedekaꞌ sidaꞌ abaꞌ sidaꞌ kaꞌ ngumpol kebala guru te ngajar kebala utai te nyamai detinga. 4 Sidaꞌ nangam peneng direꞌ ari pengajar te kenaꞌ, uleh ninga ke kebala kisah te depulah-pulah. 5 Uleh meh alah nyaga direꞌ ari ugaꞌ utai, meh alah tan ngasa pemedeh, tusoi ke Brita Bayek ari Tuhan Allah abaꞌ kreja ke bamat tugas meh.
6 Nadai lamaꞌ ageꞌ jalai ku mati lah. Darah ku kaꞌ tesioh upa angor ngau kurban pesemah ke Tuhan Allah.a 7 Ku udah betaneng ngau bayek, ku udah datai ke gares pemadoꞌ abaꞌ ku setia sengabot ke Al Maseh datai ke pemadoꞌ. 8 Entoꞌ udah deageh ke ku upah menang nema ku udah patoh nunaꞌ te dekedekaꞌ Tuhan Allah. Tuhan Isa, Akem te adel nyaꞌ, kaꞌ mereꞌ upah nyaꞌ ke ku de senta Ya nyidang ugaꞌ urang. Abaꞌ ukai ku kedireꞌ te buleh upah nyaꞌ, uleh ugaꞌ urang, te lamaꞌ ngentang penatai Ya.
Pengajar te pemadoꞌ
9 Timutios sigat geꞌ ke meh datai ngusong ku, 10 nema Dimas udah sayang ke dunia toꞌ nyaꞌ nyuroh ya ngai mantoꞌ ku ageꞌ, abaꞌ ya nyau angkat ke Tesalonika. Ku udah ngutos Kreskes ke Galatia, abaꞌ Titos ke Dalmatia. 11 Peroꞌ Lukas mah te ageꞌ abaꞌ ku. Gigaꞌ ke Markos abaꞌ baiꞌ kitoꞌ, nema ya ma mah beguna mantoꞌ tugas ku. 12 Ku udah ngutos Tikikos ke Episos.
13 Enteꞌ meh kitoꞌ baiꞌ ke lah jubah te ku dudi de Truas de rumah Karpos. Abaꞌ baiꞌ kegaꞌ kebala gulong kitab ku, te penteng te depulah ari kulet jelu.
14 Aleksander, tukang temaga nyaꞌ udah mulah kebala utai te lampar jat ke ku. Tuhan Allah kaꞌ malas ya nunaꞌ te udah depulah ya. 15 Meh alah ati-ati abaꞌ ya, nema ya ma mah ngelawan te kita ajar kah.
16 Jalai semaru ku mila direꞌ pas ku desidang, datai ke sikoꞌ mah niseꞌ urang te kaꞌ datai mantoꞌ becakap ari ku, ugaꞌ urang udah nudi ku. Engkremaꞌ mah Tuhan Allah nadai ngangap te udah depulah sidaꞌ nyaꞌ dusa. 17 Uleh Tuhan Isa ngawan ku. Ya te ngasoh ku kuat kebaꞌ ku talah madah Brita Bayek nyaꞌ, isaꞌ da tinga uleh ugaꞌ urang te bukai Yahudi. Abaꞌ ku selamat gaꞌ ari bahaya te ngasoh mati. 18 Tuhan Isa kaꞌ nyelamat ku ari kebala utai te jat datai ke Ya ngemaiꞌ ku tamaꞌ ke alam Pemrintah Ya de sruga. Puji Allah belamaꞌ raya! Amen.
Pesau pemadoꞌ
19 Padah ke tabeꞌ ku ke Preskila abaꞌ Akwila abaꞌ ke keluarga Unisepuros. 20 Erastosb ku dudi de Kurintos, Trupimosc ku dudi ke de Miletos nema ya tengan pedeh. 21 Berusaha ke meh datai kitoꞌ Timutios sebedau naꞌ rama celap. Sidaꞌ Ebulos, Pudes, Linos, Klaudia abaꞌ ugaꞌ menyadeꞌ seiman kirem tabeꞌ ke meh.
22 Engkremaꞌ Tuhan Allah abaꞌ meh. Engkremaꞌ Tuhan Allah nganyaꞌ pemayek ati Ya ke ugaꞌ kitaꞌ.