Istél 5

Ini Sa Egoh I Istél Migpegeni Diyà Si Datù Asuliyu

¹ Na, egoh di neuma sa ketelu di agdaw, igluhub i Istél sa ginis booy owoy mig-angay egtigdeg diyà sa luwang sa metolol dalesan datù diyà sa taengan sa bangkù sa datù. Egoh iya, egpenuu Datù Asuliyu i diyà sa metolol bangkù di eg-isalu diyà sa bengawan sa metolol dalesan di. ² Hê, egoh sa datù mighaa si Booy Istél migtigdeg diyà sa luwang sa metolol dalesan di, netuuwan diyà kenagdi owoy igpetodò di ma diyà kenagdi sa pulu tuked di bulawan. Huenan di, migpedapag Istél i owoy inamis di sa pulu sa tuked. ³ Agulé inigsaan sa datù Istél i, guwaen di, “Ngadan sa ungayà ko, o Booy? Ikagi ko daa sa egpegeniyen ko enù ka ibegay ku diyà keniko, apiya baed pa siini kedatuan ku.”

⁴ Migsagbì Istél i, guwaen di, “Amuk meiyap ka, o Datù, angay yu kani si Haman diyà sa kenà ku enù ka duen sa kaenen tinapay ku atang niyu.”

⁵ Hê, mig-ikagi sa datù diyà sa medoo egsugùsuguen di, guwaen di, “Angay yu Haman na mapes anì mepangunutan ké sa ungayà i Istél.” Agulé mig-angay sa datù owoy si Haman egkaen diyà sa kaenen tinapay i Istél. ⁶ Na, ligò da eg-inem sa wain, mig-igsà dema sa datù diyà si Istél, guwaen di, “Ngadan sa ungayà ko? Ikagi ko dé sa egpegeniyen ko enù ka ibegay ku diyà keniko apiya sa baed pa siini kedatuan ku.”

⁷ Migsagbì Istél i, guwaen di, “Ini sa egpegeniyen ku. ⁸ Amuk tuu sa egoh ko egketuuwan diyà kenak owoy amuk egkeanggan ka megay sa pegeniyen ku, enggaten ku dema kiyu si Haman simag mahapun kumaen diyà sa kenà ku. Iya pa sa egoh ku tumulon diyà keniko sa ungayà ku.”

Ini Sa Egoh I Haman Egpenemdem Mimatay Si Maldékiyu

⁹ Na, egoh iya wé agdaw, egkeanggan Haman i eglaun kedu diyà sa kenà da egkaen. Dodoo egoh di mighaa si Maldékiyu diyà sa bengawan sa metolol dalesan sa datù, tigtu egbulit Haman i enù ka endà egtigdeg Maldékiyu i owoy endà ma eg-adatan di duu Haman i. ¹⁰ Dodoo linegen i Haman daa sa pedu di egoh di miglikù diyà sa kenà di. Hê, egoh di migtebow, igpeumow di sa medoo loyuk di owoy sa sawa di si Silis. ¹¹ Agulé igpeolòolò di diyà kenagda sa medoo langun taman di owoy sa medoo anak di maama owoy sa egoh di egketuuwan gaa sa datù diyà kenagdi owoy sa egoh sa datù migpehagtaw sa gelal di diyà sa gelal sa medoo liyu kaunutan. ¹² Mig-ikagi ma, guwaen di, “Beken iya daa, enù ka aken daa sa inenggat i Booy Istél duma sa datù migkaen egoh giina diyà sa kenà di. Owoy igsasà di dema aken anì dumuma a sa datù kumaen diyà sa kenà di simag. ¹³ Apiya di pa langun iya wé, endà doo egpekebegay di kekeanggan diyà kenak amuk tapay doo hauwen ku siedò etaw Hudiyu si Maldékiyu sa sebaen kaunutan egpenuu diyà sa bengawan sa metolol dalesan sa datù.”

¹⁴ Agulé mig-ikagi sa sawa di si Silis owoy sa medoo loyuk di, guwaen da diyà kenagdi, “Maen di ya endà egbael ka sa atang kenà mitin? Mepion amuk duwa pulù owoy telu kamitelu sa kehagtaw di. Amuk sumimag pegeni ko diyà sa datù anì bitinen Maldékiyu i. Amuk hediya, meanggan ka umunut diyà sa datù kumaen amuk mahapun simag.” Hê, netuuwan Haman i diyà sa inikagi da. Huenan di, igsugù di igpebael sa atang kenà mitin.