Istél 4

Ini Sa Egoh I Maldékiyu Migpegeni Tabang Diyà Si Istél

¹ Na, egoh i Maldékiyu neketiig denu iya wé sulat i Haman, kinisì di sa ginis di owoy migkawal sa binekas sakù owoy binuhbuhan di ma abuh sa ulu di danà di tigtu nebukul. Agulé pinetaled di sa kesinegaw di egoh di eg-ipanawpanaw diyà sa menuwa. ² Dodoo neketaman daa diyà sa bengawan sa metolol dalesan sa datù, enù ka endà mebaluy di umawuh sa etaw amuk migginis daa sakù. ³ Na, egoh sa medoo Hudiyu neketiig denu sa igsugù sa datù, migpetaled da egsinegaw sumalà dé sa kenà da eg-ugpà diyà sa nesakupan sa kedatuan di. Egpeulanen da ma sa kekaen da owoy tigtu da egpehiduhidu owoy egsinegaw da ma. Medoo sa migkawal sa binekas sakù owoy mighibat da ma diyà sa kenà abuh danà da tigtu nebukul.

⁴ Na, egoh i Istél tinulonon sa medoo bayi egsugùsuguen di owoy sa medoo atung egpekelugsok kenagdi denu sa binaelan i Maldékiyu, tigtu nebukul sa pedu di. Huenan di, pineuwitan di ginis Maldékiyu i anì sambian di sa sakù igginis di. Dodoo endà kinuwa i Maldékiyu duu. ⁵ Agulé igpeumow i Istél Hatak i sa sebaen egpekelugsok kenagdi, owoy sinugù di anì igsaan di Maldékiyu i sa pesuwan di egkebukul.

⁶ Huenan di, mig-angay Hatak i diyà si Maldékiyu diyà sa duwangen sa menuwa diyà sa isaluwan sa bengawan sa metolol dalesan sa datù. ⁷ Hê, tinulon i Maldékiyu diyà kenagdi sa langun nebaelan di owoy sa kedoo sa pilak igpasad i Haman ibegay diyà sa taguan pilak sa datù asal meimatayan sa langun etaw Hudiyu. ⁸ Binegayan i Maldékiyu ma Hatak i sa kalatas sinulatan sa igsugù sa datù sa igpetiig diyà sa menuwa Susa denu sa egoh di meimatayan sa medoo Hudiyu. Inikagiyan i Maldékiyu ma anì ipehaa di diyà si Istél owoy anì selepangen di ma diyà kenagdi sa medoo mebaelan, owoy sinugù di ma Istél i anì mangay pehiduhidu diyà sa datù anì mehiduwan sa datù ma sa medoo etaw Hudiyu duma i Istél.

⁹ Agulé mig-angay Hatak i egtulon diyà si Istél sa langun inikagi i Maldékiyu diyà kenagdi. ¹⁰ Agulé pinepelikù i Istél dema Hatak i diyà si Maldékiyu, owoy iya sa igpeikagi di, guwaen di, ¹¹ “Netiigan sa langun etaw diyà sa nesakupan sa kedatuan i Asuliyu meimatayan sa muni dé etaw egpedapag diyà sa datù, maama ataw ka bayi, asal endà igpeumow di duu. Iya sa uledin di. Dodoo amuk itinudù sa datù sa tuked di bulawan diyà sa etaw, endà doo meimatayan di. Na, apiya aken, segebulan dé sa lugay sa datù endà migpeumow kenak.”

¹² Hê, egoh i Maldékiyu netulonon sa inikagi i Istél, ¹³ iya sa kagi di egsagbì ipetulon di diyà si Istél, guwaen di, “Yaka egpenemdem duu amuk kuna daa sa mealukan diyà sa langun duma ko etaw Hudiyu danà ko eg-ugpà diyà sa metolol dalesan sa datù. ¹⁴ Apiya di pa endà umikagi ka diyà ini i gai, dumuen doo sa liyu tumabang anì mealukan sa medoo Hudiyu. Dodoo amuk endà umikagi ka, mekesugsug ka owoy sa medoo duma telahadi ko. Dodoo petow ki daa iya kéen sa pesuwan ko migkebooy anì mealukan ko sa medoo duma ko etaw Hudiyu.”

¹⁵ Agulé igpeikagi i Istél dema diyà si Maldékiyu, guwaen di, ¹⁶ “Angay ko setipon sa langun Hudiyu diyà siini menuwa Susa owoy peulan yu sa kekaen yu anì sumimbà yu daa denu kenak. Yoko egkaen na owoy yoko eg-inem ma taman telu agdaw owoy telu gesigep. Hediya ma, peulanen ku owoy sa medoo bayi egsugùsuguen ku sa kekaen ké anì sumimbà ké daa. Amuk meubus iya wé, umangay a dé diyà sa datù, apiya di pa meketipay a diyà sa uledin di. Maen dé amuk meimatayan a.”

¹⁷ Agulé miglegkang Maldékiyu i owoy pinangunutan di sa inikagi i Istél.