Istél 6

Ini Sa Egoh I Datù Asuliyu Migpedakel Si Maldékiyu

¹ Na, egoh iya wé sigep endà egpeketudug Datù Asuliyu i. Huenan di, igpekuwa di sa libelu sinulatan sa medoo gugud denu sa egkebaelan diyà sa kedatuan di, owoy igpebasa di anì dinegdinegen di. ² Iya ma sa nebasa da sa gugud denu sa egoh i Maldékiyu migtulon denu si Bigtan owoy si Tilis sa egoh da migpenemdem mimatay hedem si Datù Asuliyu, apiya di pa kagda sa duwa egsugùsuguen tegebantay bengawan sa bilik di. ³ Agulé mig-igsà sa datù, guwaen di, “Ngadan sa untung igbegay ta diyà si Maldékiyu danà ini i mepion binaelan di diyà kenak?”

Hê, migsagbì sa medoo egpekelugsok kenagdi, guwaen da, “Endà pa duen di, o Datù.”

⁴ Mig-igsà dema Datù Asuliyu i, guwaen di, “Duen pa sa kaunutan dalem sa metolol dalesan ku?”

Hê, egoh iya, magtu pelà Haman i eg-awuh diyà sa duwangen sa metolol dalesan enù ka angayen di megeni diyà sa datù mimatay si Maldékiyu diyà sa bitinan igpetapay di. ⁵ Huenan di, migsagbì sa medoo egpekelugsok kenagdi, guwaen da, “O Datù, dahini dé Haman i diyà sa luwang dalesan ko.”

Agulé mig-ikagi sa datù, guwaen di, “Peawuh yu anì mangay dini.” ⁶ Agulé egoh i Haman mig-awuh, inigsaan sa datù, guwaen di, “Ngadan sa mepion baelan ku diyà sa etaw egkeiyapan ku kumedakel?”

Na, iya sa penemdem i Haman kagdi sa egkeiyapan sa datù kumedakel. ⁷ Huenan di, migsagbì, guwaen di, “Ini sa mepion kebael ko diyà sa etaw egkeiyapan ko kumedakel. ⁸ Pekuwai ko sa kegal ko owoy sa kudà ko épê umbay-umbay sa atung egkudaan ko. ⁹ Agulé sugui ko diyà sa sebaen kaunutan ginelal ko anì ipekegal di diyà iya wé etaw sa kegal datù owoy anì pekudaen di ma diyà sa kudà ko, agulé agaken di tumimbul diyà siini uwang menuwa. Ligò da eg-ipanaw, petaled umikagi sa etaw nekehuna diyà kenagdi, guwaen di, ‘Ini sa baelan diyà sa etaw egkeiyapan sa datù kumedakel.’”

¹⁰ Agulé mig-ikagi sa datù diyà si Haman, guwaen di, “Na, angay ko dé mapes sa kawal ku owoy sa kudà ku ma. Baeli ko diyà si Maldékiyu sa etaw Hudiyu sa langun inikagi ko. Hauwen ko kagdi egpenuu diyà sa bengawan sa metolol dalesan ku. Tigtu baeli ko langun iya wé inikagi ko.”

¹¹ Huenan di, kinuwa i Haman sa kawal owoy sa kudà ma, agulé igpekawal di diyà si Maldékiyu owoy pinekudà di ma. Hê, inagak di egtimbul diyà sa uwang menuwa ligò di egpetaled eg-ikagi, guwaen di, “Ini sa egbaelan diyà sa etaw egkeiyapan sa datù kumedakel.”

¹² Agulé egoh di neubus, migpelikù dema Maldékiyu i diyà sa bengawan sa metolol dalesan sa datù. Dodoo migpetéél miglikù Haman i owoy linimunan di sa palas di danà di tigtu nemalaan. ¹³ Agulé tinulonon di sa sawa di owoy sa langun loyuk di denu sa medoo nebaelan. Hê, mig-ikagi sa sawa di owoy sa medoo tegetabang di, guwaen da, “Egtabantabanan i Maldékiyu dé kuna. Kagdi sa etaw Hudiyu, huenan di endà melugpì ko duu, dodoo kuna polo sa melugpì di.” ¹⁴ Na, ligò da egseolomoy pelà, migtebow sa medoo egsugùsuguen sa datù owoy pinetéél da mig-uwit Haman i eg-angay diyà sa kenà i Istél egtapay sa kaenen atang diyà sa datù owoy si Haman.