6
Ini Sa Egoh I Datù Daliyu Migsugù Sa Kepelagbas Da Eggalebek
1 Na, igsugù i Datù Daliyu tegeMidiya igpepengaa sa sulat diyà sa dalesan atung taguan sulat dutu Babiloniya dò. 2 Hê, hinaa da sa sulat dinilin dutu menuwa Ikbatana dò diyà sa pelubinsiya Midiya.
Iya sa kagi nekesulat, guwaen di, 3 “Egoh sa muna palay egoh i Silo migkedatù, igsugù di igpebael dulì sa Dalesan i Nemula dutu Hélusalém dò. Iya sa Dalesan kenà da megay diyà si Nemula owoy sa kenà da ma megay sa atang ulowen. Sepulù owoy lima lipo sa kehagtaw di, owoy hediya ma sa kelabel di. 4 Uman telu logsud sa dakel batu sangkap di, ahayan da dema kayu elet di. Na, iya sa ibayad langun iya wé sa pilak kedu diyà sa taguan pilak sa datù. 5 Na, sa medoo sangkap bulawan ataw ka pilak kinuwa i Datù Nabokonosol diyà sa Dalesan i Nemula diyà Hélusalém owoy inuwit di diyà Babiloniya egoh anay, pelikui yu diyà sa tapay kenà di diyà sa Dalesan i Nemula dutu Hélusalém dò.”
6 Na, egoh i Datù Daliyu migbasa iya wé uledin i Silo sa datù egoh anay, petow dé migpeuwit sulat. Ini sa kagi sa sulat di, guwaen di,
“O Tatenayi sa ulu-ulu diyà sa pelubinsiya denu eledan agdaw amuk diyà ki sa lawa't wayeg Upelatis owoy si Sital Bosinayi owoy sa medoo duma yu ulu-ulu, yoko egbogo kenagda egbael sa Dalesan i Nemula. 7 Pandayà yu dé sa ulu-ulu etaw Hudiyu owoy sa medoo kaunutan da anì mekelagbas sa kedulì da egbael sa Dalesan i Nemula diyà sa tapay kenà di. 8 Owoy egsuguen ku ma kiyu egpebulig siini medoo ulu-ulu egbael sa Dalesan i Nemula. Bayadi yu sa medoo megastu da kedu diyà sa pilak etuken yu diyà sa medoo etaw yu eg-ugpà diyà sa pelubinsiya denu eledan agdaw anì endà meéngén sa kegalebek da.
11 “Na, amuk duen etaw umeked siini uledin ku, ini sa mebaelan di. Mekedan sa sebaen bugsud diyà sa dalesan di, owoy ideban, agulé idilek diyà kenagdi. Megubal sa dalesan di anì mebaluy daen lupuk. 12 Na, si Nemula sa mighemilì sa menuwa Hélusalém sa kenà etaw egpenemula kenagdi. Ungayà ku kagdi sa pedaet sumalà dé sa datù ataw ka kedatuan sa egkelukuy meluman siini uledin ku ataw ka gumubal sa Dalesan i Nemula dutu Hélusalém dò. Aken si Datù Daliyu sa migsugù ini i, huenan di tigtu mepangunutan yu ini i.”
Ini Sa Egoh Da Migpeépê Diyà Si Nemula Sa Dalesan Di
13 Na, si Tatenayi sa ulu-ulu diyà sa pelubinsiya denu eledan agdaw owoy si Sital Bosinayi owoy sa medoo duma da ulu-ulu, tigtu da migpangunut diyà iya wé uledin i Datù Daliyu. 14 Hê, igpelagbas sa medoo ulu-ulu etaw Hudiyu sa kebael da sa Dalesan i Nemula, owoy migkebagel ma sa pedu da danà sa ketegudon sa duwa tegesugkow kagi i Nemula, si Hagiyo owoy si Sakaliyas tugod i Ido. Huenan di, neubus sa kebael da sa Dalesan i Nemula danà sa igsugù sa Nemula egpigtuuwen sa medoo tegeIslaél owoy danà ma sa igsugù sa medoo datù tegePélsiya, si Silo owoy si Daliyu owoy si Altahilis.a 15 Na, neubus dé sa kebael da sa Dalesan i Nemula egoh sa ketelu di agdaw diyà sa bulan pinengadanan da bulan Adal diyà sa keenem di gepalay egoh i Daliyu migkedatù.
16 Agulé sa medoo tegeIslaél, lapeg sa medoo tegesimbà owoy sa medoo tugod i Lebi owoy sa langun etaw migpelikù kedu diyà sa neangayan da egoh da nesigkem, neanggan da temù egoh da migpeépê diyà si Nemula sa Dalesan di magtu binaelan da. 17 Egoh da egsimbà, iya sa sinumbalì da danà da egpesalamat diyà si Nemula magatus tudu sapì, owoy duwa gatus mandangan kebilibili owoy epat gatus nati kebilibili. Owoy iya ma sa inimatayan da anì egpegeniyen da sa kepeuloy i Nemula sa salà da sepulù owoy duwa mandangan kambing tandà sa sepulù owoy duwa geumpung tugod i Islaél. 18 Agulé sinebaedbaed da sa medoo tegesimbà owoy sa medoo tugod i Lebi danà sa galebek sa uman sebaen etaw owoy danà ma sa agdaw kegalebek da diyà sa Dalesan i Nemula, iling sa igsulat i Mosis egoh anay.
Ini Sa Egoh Da Migbael Sa Pista Sa Kinetalà Sa Kepigtamay I Nemula
19 Na, sa medoo etaw migpelikù kedu diyà sa neangayan da egoh da nesigkem, binaelan da sa Pista Sa Kinetalà Sa Kepigtamay i Nemula, egoh di neuma sa kesepulù di owoy epat agdaw diyà sa muna bulanb diyà sa magtu palay. 20 Migpelanihlanih sa medoo tegesimbà owoy sa medoo tugod i Lebi, owoy metiengaw da dé diyà sa kehaa i Nemula. Agulé sinumbalì sa medoo tugod i Lebi sa medoo kebilibili sa atang kaenen sa langun etaw migpelikù, lapeg sa medoo tegesimbà owoy sa medoo duma da tugod i Lebi.
21 Agulé iya sa migkaen sa langun tegeIslaél migpelikù kedu diyà sa neangayan da egoh da nesigkem owoy sa medoo etaw mig-eked sa medaet adat sa liyu etaw eg-ugpà medapag diyà kenagda anì sumimbà da daa diyà si Datù Nemula, sa Nemula egpigtuuwen sa medoo tegeIslaél. 22 Taman pitu agdaw egkeanggan da egbael sa Pista Sa Kekaen Da Sa Epan Endà Duen Ipelenuk Di. Neanggan da langun enù ka danà i Datù Nemula, huenan di egketuuwan sa datù tegeAsiliya diyà kenagda owoy tinabangan di kagda egbael dulì sa Dalesan i Nemula, sa Nemula egpigtuuwen sa medoo tegeIslaél.