Ini Sa Igsulat Denu Sa Medoo
Datù Migsabà Sa Tanà Islaél
1
Ini Sa Egoh I Datù Ahasiyas Nematay
2 Na, sebaen agdaw nenabù Datù Ahasiyas i diyà sa tatawan sa keduwa kansad patal sa metolol dalesan di diyà sa menuwa Samaliya. Tigtu nesakitan temù. Huenan di, duen etaw sinugù di anì igsaan da sa inetaw Baalsibub sa egpenemulawen sa medoo tegePilistiya dutu menuwa Ikelon dò, anì metiigan di amuk melikuan ataw ka endà dé. 3 Dodoo mig-ikagi sa egsugùsuguen i Datù Nemula diyà si Iliyas tegeTésbi sa tegesugkow kagi i Nemula, guwaen di, “Ipanaw ka dé. Angay ko siegung sa medoo sinugù i Datù Ahasiyas owoy ikagi ko diyà kenagda, guwaen ko, ‘Maen di ya eg-angay yu umigsà diyà sa inetaw Baalsibub dutu menuwa Ikelon dò? Iya sa penemdem yu kéen endà duen sa nemula diyà siini tanà Islaél.’ 4 Huenan di, ini sa kagi i Datù Nemula diyà si Datù Ahasiyas, guwaen di, ‘Endà dé melikuan di diyà iya wé mesakit di, enù ka mematay dé polo.’” Na, mig-ipanaw Iliyas i enù ka pinangunutan di iya wé igsugù i Datù Nemula.
17 Na, tuu doo, nematay Datù Ahasiyas i enù ka neketuu dé sa kagi i Datù Nemula igsugkow i Iliyas. Endà duen sa anak di maama, huenan di sa hadi di si Holam polo sa nekesambì kenagdi egkedatù. Na, egoh i Holam migkedatù dé, duwa gepalay dé sa lugay sa sangay di si Holam anak i Hosapat sa datù diyà sa tanà Huda.