2
Ini Sa Egoh I Iliyas Nebatun Dutu Langit Dò
(2 Medoo Datù 2:1-18)
1 Na, egoh di neuma dé sa agdaw egoh i Datù Nemula matun si Iliyas dutu langit dò danà sa kelamag siling, mig-ipanaw Iliyas i owoy si Ilisiya kedu diyà Gilgal. 2 Egoh da diyà dalan, mig-ikagi Iliyas i diyà si Ilisiya, guwaen di, “Dahini ka daa, enù ka egpeangayen i Datù Nemula aken dutu Bétél dò.”
Migsagbì Ilisiya i, guwaen di, “Ipengibet ku danà di melalù Datù Nemula i owoy taman nehagtay ka pelawà, endà lumengà a umunut diyà keniko.” Hê, neseunut da eg-angay Bétél dò.
3 Agulé egoh da migtebow dutu, duen sa segeumpung tegesugkow kagi i Nemula diyà Bétél migpedapag da diyà si Ilisiya. Mig-igsà da, guwaen da, “Enù di ya, netiigan ko pa kuwaen i Datù Nemula diyà keniko sa datù ko ini egoh di?”
Migsagbì Ilisiya i, guwaen di, “Hoò, netiigan ku doo, dodoo yoko dé eg-olom ma.”
4 Agulé mig-ikagi Iliyas i, guwaen di, “O Ilisiya, dahini ka daa, enù ka egpeangayen i Datù Nemula aken dutu Héliko dò.”
Dodoo migsagbì Ilisiya i, guwaen di, “Ipengibet ku danà di melalù Datù Nemula i owoy taman nehagtay ka pelawà, endà lumengà a umunut diyà keniko.” Hê, neseunut da dema eg-angay Héliko dò.
5 Agulé egoh da migtebow, duen sa segeumpung tegesugkow kagi i Nemula diyà Héliko migpedapag da diyà si Ilisiya. Mig-igsà da, guwaen da, “Enù di ya, netiigan ko pa kuwaen i Datù Nemula diyà keniko sa datù ko ini egoh di?”
Migsagbì Ilisiya i, guwaen di, “Hoò, netiigan ku doo, dodoo yoko dé eg-olom ma.”
6 Agulé mig-ikagi dema Iliyas i diyà si Ilisiya, guwaen di, “Na, dahini ka daa, enù ka egpeangayen i Datù Nemula aken dutu siedò wayeg Holdan.”
Dodoo migsagbì Ilisiya i, guwaen di, “Ipengibet ku danà di melalù Datù Nemula i owoy taman nehagtay ka pelawà, endà lumengà a umunut diyà keniko.” Huenan di, neseunut da dema duwa eg-ipanaw. 7 Owoy miglohot ma sa lima pulù tegesugkow kagi i Nemula eg-angay diyà sa lawa’t wayeg Holdan. Hê, migtigdeg da Iliyas i si Ilisiya diyà sa ilis wayeg, dodoo migtangkà tukééy sa lima pulù tegesugkow kagi i Nemula. 8 Agulé linengà i Iliyas sa sebaen kawal di. Dinilin di owoy igtapes di diyà sa wayeg, hê petow dé nesekawang sa wayeg. Huenan di, neetiyan sa ukitan da egbatas eg-angay tanà dutu dò. 9 Egoh da nekebatas dé, mig-ikagi Iliyas i diyà si Ilisiya, guwaen di, “Tulon ko diyà kenak ngadan sa ungayà ko baelan ku diyà keniko egoh i Datù Nemula endà pa kumuwa kenak.”
Migsagbì Ilisiya i, guwaen di, “Amuk hediya, ungayà ku mebegayan a sa duwa baed sa egkegaga ko anì metandaan aken sa tegesugkow kagi i Nemula mekesambì diyà keniko.”a
10 Mig-ikagi Iliyas i, guwaen di, “Melikut iya wé egpegeniyen ko. Dodoo amuk hauwen ko aken selengan sa egoh ku mekedan diyà keniko, mesakem ko doo sa egpegeniyen ko. Dodoo amuk endà hauwen ko duu aken, endà mesakem ko duu.”
11 Na, egoh da telibubu eg-ipanaw, egseolomoy da uman. Hê, duen sa hinaa da kalitun eglegleg eggodoyen sa medoo kudà eglegleg ma eg-ukit diyà sa teliwadaan da. Hê, petow dé nebatun Iliyas i inuwit sa kelamag siling dutu langit dò. 12 Na, tigtu hinaa i Ilisiya iya wé nebaelan, huenan di, mig-umow, guwaen di, “O Emà, Emà ku, sa tigtu mebagel egsegumalang diyà sa tanà Islaél.” Inut di endà dé eghauwen di duu Iliyas i.
Agulé kinisì i Ilisiya teliwadà sa ginis di tandà sa pedu di migkedaet. 13 Agulé kinuwa di sa kawal i Iliyas netangtang, owoy migpelikù diyà sa lawa’t wayeg Holdan. 14 Egoh di nekeuma dahiya, inilingan di sa binaelan i Iliyas. Hê, igtapes di diyà sa wayeg sa kawal i Iliyas netangtang owoy mig-ikagi, guwaen di, “Kenà i Datù Nemula i dé, sa Nemula egpigtuuwen i Iliyas?” Hê, egoh di neubus migtapes sa wayeg, petow dé nesekawang sa wayeg owoy nekebatas ma dé eg-angay tanà dutu dò.
15 Na, egoh sa medoo tegesugkow kagi i Nemula kedu Héliko mighaa iya wé, mig-ikagi da, guwaen da, “Diyà dé si Ilisiya sa egkegaga i Iliyas.” Agulé siniegung da owoy migligkued da diyà sa taengan di. 16 Mig-ikagi da, guwaen da, “Lima pulù sa kedoo ké dahini, owoy anan ké mebagel. Amuk meiyap ka, selugagapan ké lumagbet sa datù ko, enù ka inuwit sa Suguy i Datù Nemula daa kéen eg-angay diyà sa sebaen ma getan ataw ka diyà sa sebaen ma lepak.”
Migsagbì Ilisiya i, guwaen di, “Ulan dé sa kelagbet yu.”
17 Dodoo egtemuen da eg-ikagiyan taman sa egoh di umatu. Agulé mig-ikagi, guwaen di, “Na, ipanaw yu dé.” Huenan di, mig-ipanaw sa lima pulù geetaw. Taman telu agdaw sa lugay da eglagbet si Iliyas, dodoo endà hinaa da duu. 18 Agulé migpelikù da dema eg-angay diyà si Ilisiya eg-angat-angat kenagda diyà sa menuwa Héliko. Hê, mig-ikagi Ilisiya i diyà kenagda, guwaen di, “Na, beken atu hinawidan ku doo kiyu eglagbet kenagdi, enù ka endà hauwen yu duu.”
Ini Sa Egoh I Nemula Migpepion Sa Wayeg Danà Sa Binaelan I Ilisiya
(2 Medoo Datù 2:19-22)
19 Na, mig-ikagi sa medoo etaw tegeHéliko diyà si Ilisiya, guwaen da, “O Datù, diyà sa kehaa ko, tigtu mepion siini menuwa. Dodoo duen doo sa kelikutan di. Endà mepion sa wayeg dahini, huenan di endà iseg di kebaluyan sa tanà dahini.”
20 Migsagbì Ilisiya i, guwaen di, “Uwit yu diyà kenak sa bilu magtu binaelan, owoy awuhi yu timus.” Hê, inuwit da diyà kenagdi. 21 Agulé mig-angay Ilisiya i diyà sa tebulan siedò wayeg endà mepion, owoy igbuhbuh di sa timus diyà sa wayeg. Mig-ikagi ma, guwaen di, “Ini sa eg-ikagiyen i Datù Nemula, guwaen di, ‘Pinepion ku dé siini wayeg, huenan di endà dé duen sa keduwan linadu sa pesuwan di egkematay sa etaw ataw ka sa pesuwan di endà egkebaluy sa hinemulaan.’” 22 Hê, edung egoh iya taman ini egoh di, mepion dé inemen sa wayeg, lagà sa inikagi i Ilisiya.