Isdela 5

Ini Sa Egoh Da Mig-edung Dema Egbael Sa Dalesan I Nemula

(Isdela 5:1-13, 17)

¹ Na, egoh iya, duen sa duwa tegesugkow kagi i Nemula, si Hagiyo owoy si Sakaliyas bébê i Ido. Tinulon da sa medoo kagi igpesugkow i Nemula, sa Nemula egpigtuuwen sa medoo tegeIslaél, owoy inikagiyan da sa medoo Hudiyu eg-ugpà diyà sa tanà Huda owoy diyà sa menuwa Hélusalém. ² Huenan di, si Solobabel anak i Salatiyél owoy si Hosuwa anak i Hosadak, migpelagbas da egbael dulì sa Dalesan i Nemula diyà Hélusalém. Egoh da eggalebek, egbuligan sa duwa tegesugkow kagi i Nemula ma kagda.

³ Dodoo si Tatenayi sa ulu-ulu diyà sa pelubinsiya denu eledan agdaw amuk diyà ki sa lawa't wayeg Upelatis owoy si Sital Bosinayi owoy sa medoo duma da ulu-ulu, mig-angay da diyà sa menuwa Hélusalém. Mig-igsà da diyà sa medoo etaw, guwaen da, “Ngadan di etaw sa migsugù keniyu anì baelan yu dulì siini Dalesan i Nemula? ⁴ Tulon yu diyà kenami ngadan sa langun etaw egpetigdeg siini Dalesan.”

⁵ Dodoo si Nemula sa egtulik sa medoo ulu-ulu etaw Hudiyu, huenan di endà mehawidan da egbael sa Dalesan i Nemula taman sa egoh da i Tatenayi migsulat diyà si Datù Daliyu owoy sa egoh da ma meketiig sa sagbì di.

⁶ Na, si Tatenayi sa ulu-ulu diyà sa pelubinsiya denu eledan agdaw owoy si Sital Bosinayi owoy sa medoo duma da ulu-ulu, migpeuwit da sulat diyà si Datù Daliyu. ⁷ Ini sa kagi sa sulat da, guwaen da,

“O Datù Daliyu, ungayà ké kumetanà sa keugpà yu. ⁸ O Datù, egtulonen ké diyà keniko sa egoh ké mig-angay diyà sa tanà Huda. Hinaa ké dutu sa kebael da sa Dalesan i Nemula, sa Nemula épê dakel egkegaga. Duen sa dakel batu sinelogsudlogsud da diyà sa kelatkat di, owoy eg-ahayan da ma kayu. Tigtu da eg-udes eggalebek, huenan di metéél egkeubus sa kebael da. ⁹ Mig-igsà ké diyà sa medoo ulu-ulu da ngadan sa etaw migsugù kenagda egpetigdeg iya wé Dalesan. ¹⁰ Owoy mig-igsà ké ma ngadan sa medoo ulu-ulu da anì metulon ké diyà keniko, o Datù.

¹¹ “Ini sa sagbì da, kagda gaa sa medoo etaw i Nemula, sa Nemula egsabà sa langit owoy tanà. Owoy egbaelan da gaa dulì sa Dalesan i Nemula sa igpebael sa datù da épê dakel egkegaga diyà sa tanà Islaél egoh anay. ¹² Tinulon da diyà kenami sa egoh sa medoo tupù da migpebulit si Nemula, sa Nemula diyà langit. Huenan di, igpesigkem di kagda diyà si Datù Nabokonosol tegeBabiloniya sa mig-uwit kenagda dutu tanà Babiloniya dò, agulé pinedaetan di ma sa Dalesan i Nemula. ¹³ Agulé egoh sa muna palay egoh i Silo migkedatù diyà Babiloniya, igsugù di diyà kenagda gaa anì petigdegen da dema sa Dalesan i Nemula.

¹⁷ “Huenan di, amuk mebaluy diyà keniko, o Datù, pepengauwi ko diyà sa etaw sa medoo tapay sulat diyà sa tanà Babiloniya amuk tuu sa kesugù i Datù Silo egpebael dulì sa Dalesan i Nemula dutu Hélusalém dò. Owoy egpegeniyen ké ma sa ketulon ko diyà kenami sa niko penemdem denu iya wé.”