7
Ini Sa Egoh Da I Gidiyon Miglugpì Sa Medoo TegeMidiyan
1 Na, egoh di sumimag, miglapus da mig-ipanaw Gidiyon i sa pinengadanan da si Hélobaal owoy sa langun etaw di, owoy migpetigdeg da kemalig medapag diyà sa tebulan Halod. Denu belabagan sa medoo tegeMidiyan diyà sa sugud medapag diyà sa Getan Moléh.
2 Agulé mig-ikagi Datù Nemula i diyà si Gidiyon, guwaen di, “Temù medoo siini etaw eg-unut diyà keniko. Iya kéen sa penemdemen da guwaen da danà sa hagda daa egkegaga sa kelugpì da sa medoo tegeMidiyan, beken danà sa ketabang ku. 3 Huenan di, ikagi ko diyà kenagda anì lumikù sa medoo etaw egpesu eggila.” Hê, egoh i Gidiyon mig-ikagi iya wé diyà kenagda, miglikù sa duwa pulù owoy duwa ngibu geetaw. Hê, salagsà daen sa nesamà.
4 Dodoo mig-ikagi dema Datù Nemula i diyà si Gidiyon, guwaen di, “Tapay doo medoo sa etaw ko. Huenan di, uwit ko kagda diyà sa kilidan lawa't wayeg. Amuk dutu yu, ipetiig ku diyà keniko sa tayu di etaw sa peunuten ko owoy sa endà peunuten ko duu.” 5 Agulé egoh i Gidiyon mig-uwit kenagda diyà sa lawa't wayeg, mig-ikagi Datù Nemula i diyà kenagdi, guwaen di, “Setigesa ko sa medoo etaw migsakug belad da daa owoy sa medoo etaw migligkued tulen dé egduem.” 6 Hê, telu latuh daa sa kedoo etaw eg-inem egsakug belad, dodoo tulen dé migduem sa medoo duma da.
7 Agulé mig-ikagi Datù Nemula i diyà si Gidiyon, guwaen di, “Siedò telu latuh etaw migsakug belad egoh da mig-inem, iya daa sa peunut ko mangay gumila diyà sa medoo tegeMidiyan. Ipelugpì ku doo sa medoo tegeMidiyan diyà keniyu anì mealukan sa medoo tegeIslaél. Dodoo pelikù ko dé sa medoo liyu etaw.” 8 Huenan di, pinelikù i Gidiyon sa langun tegeIslaél liyu daa siedò telu latuh geetaw pineipat di sa medoo buyunga da owoy sa medoo tegbuli kinuwa di diyà sa medoo etaw pinelikù di. Na, diyà sa sugud leketanà da sa kenà sa medoo tegeMidiyan migpetigdeg kemalig.
9 Na, egoh iya wé sigep, sinugù i Datù Nemula Gidiyon i, guwaen di, “Enaw ka dé. Angay ko pengayaw sa medoo tegeMidiyan, enù ka ipelugpì ku kagda diyà keniyu. 10 Dodoo amuk egpesu ka pelawà, uwit ko sa egsuguen ko si Pula anì mangay yu diyà sa kenà da migpetigdeg kemalig. 11 Amuk dinegen ko sa keseolomoy da, kumebalaw ka doo mengayaw kenagda.” Agulé miglungel Gidiyon i owoy si Pula mig-angay diyà sa kilidan sa medoo kemalig sa kuntelà da. 12 Na, sa medoo tegeMidiyan owoy sa medoo tegeAmalék owoy sa medoo liyu balangan etaw kedu diyà sa tanà denu tebowon agdaw, nebelet da sa sugud kenà da migpetigdeg kemalig. Medoo da temù lagà sa kedoo kasuk, owoy endà ma mebilang di sa kedoo kamiliyu da enù ka lagà sa kedoo enay mantadan.
13 Na, egoh da i Gidiyon mig-angay migdapag, dinineg da sa etaw migtulon sa tegeinep di diyà sa duma di. Guwaen di, “Egoh ku migtegeinep, hinaa ku sa segetibulu epan sebada nekelid eg-angay diyà sa kenà ta migpetigdeg kemalig. Neambakan di sa kemalig. Hê, nepilay owoy nelubun ma.”
14 Migsagbì sa duma di, guwaen di, “Aba, endà duen sa liyu selepangan iya wé liyu daa sa sundang siedò tegeIslaél, si Gidiyon anak i Howas. Enù ka iya sa pelugpien i Nemula diyà kenita i medoo tegeMidiyan owoy diyà siini medoo duma ta.”
15 Na, egoh i Gidiyon migdineg iya wé tegeinep owoy sa selepangan di, migligkued eg-olò si Nemula. Agulé migpelikù da diyà sa kenà sa medoo duma da tegeIslaél mig-ugpà. Egoh da migtebow, inenaw di sa medoo duma di owoy guwaen di, “Téél yu dé, enù ka ipelugpì i Datù Nemula doo siini medoo tegeMidiyan diyà kenita.” 16 Agulé binaed i Gidiyon telu gebaed sa telu latuh etaw di, owoy igbegay di diyà sa uman sebaen etaw sa tegbuli owoy sa buyung inawuhan sulù. 17 Mig-ikagi diyà kenagda, guwaen di, “Amuk medapag ki dé diyà sa kenà da migpetigdeg kemalig, hahaa yu sa baelan ku owoy ilingi yu ma. 18 Amuk dinegen yu sa ketegbuli ké, tegbuli yu ma dé owoy petaled yu ikagi, guwaen yu, 'Tumaban Datù Nemula i owoy si Gidiyon.’”
19 Agulé egoh di buyu dé teliwadà sigep egoh sa medoo tegeMidiyan migsambì dé sa tegebantay da, mig-angay Gidiyon i owoy sa melatuh duma di migdapag diyà sa kenà sa medoo tegeMidiyan migpetigdeg kemalig. Hê, migtegbuli da owoy pinesà da ma sa buyung da inawuhan sulù. 20 Neseselengan sa telu geumpung etaw i Gidiyon migpesà sa medoo buyung da inawuhan sulù owoy egtegbuli da ma. Egsabà sulù sa bibang da owoy egsabà tegbuli sa kuwanan da. Migpetaled da ma eg-ikagi, guwaen da, “Tumaban Datù Nemula i owoy si Gidiyon.” 21 Sineulingutan da daa egtigdegan sa kilidan sa medoo kemalig sa medoo kuntelà da. Dodoo migletu sa langun kuntelà da egpelaguy, owoy miglesing da ma danà da tigtu nelimedangan. 22 Egoh da telibubu egtegbuli sa telu latuh geetaw i Gidiyon, migsetigbasay sa medoo kuntelà da tegeMidiyan danà i Datù Nemula. Nekepelaguy ma sa duma etaw, duen mig-angay diyà Bétsita selatal Séléla owoy duen ma mig-angay diyà sa menuwa Abél-Méhola medapag diyà Tabat.