Tegekukum 13

Ini Sa Egoh I Samson Miglesut

(Tegekukum 13:1-5, 24-25)

¹ Na, egoh di nelugaylugay dé, migbael dema salà sa medoo tegeIslaél diyà si Datù Nemula, huenan di etaw tegePilistiya sa pinesabà di diyà kenagda taman epat pulù gepalay.

² Na egoh iya, duen sa maama si Manowa tugod i Dan eg-ugpà diyà sa menuwa Solah. Endà eg-anak sa sawa di. ³ Agulé sebaen agdaw, migpehaa sa Egsugùsuguen i Datù Nemula diyà sa bayi owoy guwaen di, “Edung egoh ko migsawa taman ini egoh di endà eg-anak ka. Dodoo endà melugay di kumelalingen ka owoy umanak ka maama. ⁴ Huenan di, edung ini egoh di yaka eg-inem duu sa wain owoy sa medoo liyu inemen mekelangut, owoy yaka ma egkaen duu sa melihi egkaenen. ⁵ Amuk lumesut sa anak ko maama, yaka egtagped duu sa balut ulu di, enù ka edung sa egoh di lumesut si Nemula dé sa épê di. Kagdi sa umedung umaluk sa medoo tegeIslaél kedu diyà sa egkegaga sa medoo tegePilistiya.”

²⁴ Agulé mig-anak maama sa sawa i Manowa, owoy pinengadanan di si Samson. Miglenuk dé sa batà owoy takaan i Datù Nemula egtabangan, ²⁵ owoy tinunungan sa Suguy i Datù Nemula egoh di diyà sa kenà sa medoo tugod i Dan migpetigdeg kemalig diyà sa neseteliwadaan menuwa Solah owoy menuwa Éstayol.