Tegekukum 6

Ini Sa Egoh I Nemula Miggelal Si Gidiyon Kaunutan Da

¹ Na, migbael dema salà sa medoo tegeIslaél diyà si Datù Nemula. Huenan di, igpelugpì di kagda diyà sa medoo tegeMidiyan taman pitu gepalay. ² Endà duen egkegaga sa medoo tegeIslaél egsulì diyà sa medoo tegeMidiyan egpelihay kenagda. Huenan di, miglidung da diyà sa takub diyà sa getan-getan ataw ka sumalà dé sa kenà da eglidung. ³ Uman humemula sa medoo tegeIslaél sa medoo balangan eghemulaen, tumebow dema sa medoo tegeMidiyan owoy sa medoo tegeAmalék owoy sa medoo liyu balangan etaw kedu diyà sa tanà denu tebowon agdaw enù ka gilawen da kagda. ⁴ Mig-angay da egpetigdeg kemalig dahiya owoy tigtu pinedaetan da ma sa langun hinemula sa medoo tegeIslaél taman sa uwang menuwa Gasa. Pineka da ma sa langun hinagtay sa medoo tegeIslaél, huenan di endà dé duen sa kenà da kumuwa sa kehagtayan da. ⁵ Takà egsetebowtebow sa medoo tegeMidiyan lagà sa medoo kasuk. Inuwit da ma sa medoo kemalig da owoy sa langun hinagtay da. Endà mebilang di sa kedoo etaw owoy sa kedoo hinagtay da kamiliyu enù ka medoo da temù, huenan di tigtu pinedaetan da iya wé tanà. ⁶ Endà egpekegaga sa medoo tegeIslaél diyà sa medoo tegeMidiyan. Tigtu nepasangan da temù, huenan di migpegeni da dema tabang diyà si Datù Nemula.

⁷ Na, egoh i Datù Nemula migdineg sa keingonoy sa medoo tegeIslaél danà da pinelihay sa medoo tegeMidiyan, ⁸ pineangay di diyà kenagda sa tegesugkow kagi di. Guwaen di, “Ini sa kagi i Datù Nemula sa egpigtuuwen sa medoo tegeIslaél. Linaun di kiyu kedu diyà sa egoh yu neudipen dutu Igiptu dò. ⁹ Inalukan di ma kiyu kedu diyà sa kepelihay sa medoo tegeIgiptu keniyu owoy kedu diyà sa egkegaga sa medoo liyu etaw egkuntelà keniyu diyà siini tanà. Hinemagawan di kagda egoh yu migseilud-ilud enù ka igbegay di diyà keniyu sa tanà da. ¹⁰ Inikagiyan di ma kiyu kagdi si Datù Nemula sa egpigtuuwen yu, huenan di hinawidan di kiyu egpenemula sa medoo egpenemulawen sa tegeAmoliya, sa tapay etaw mig-ugpà diyà siini tanà kenà di migpeugpà keniyu. Dodoo endà egdinegdinegen yu duu sa inikagi di.”

¹¹ Agulé migtenà sa Egsugùsuguen i Datù Nemula diyà sa menuwa Opela owoy migpenuu diyà sa pesu kayu tugas. Na, iya sa épê di si Howas tugod i Abiyésal. Na egoh iya, telibubu eg-elik teligo Gidiyon i anak i Howas diyà sa nekelidung atung kenà da eghemeg sa bunga palas anì endà hauwen sa medoo tegeMidiyan duu. ¹² Egoh sa Egsugùsuguen i Datù Nemula migpehaa diyà si Gidiyon, mig-ikagi, guwaen di, “Eg-unutan doo i Datù Nemula kuna i mebalaw owoy mebagel etaw.”

¹³ Migsagbì Gidiyon i, guwaen di, “O Datù, amuk tuu kami sa eg-unutan i Datù Nemula, maen di ya éhê ini i sa egkebaelan ké ini egoh di? Maen di ya endà egbaelan di duu sa medoo egkegaipan etaw igoh, lagà mendaa sa binaelan di egoh anay egoh di mig-uwit sa medoo tupù ké kedu Igiptu dò iling sa tinulon sa medoo lukes ké diyà kenami? Dodoo sinalidan i Datù Nemula polo kami. Enù ka amuk endà sinalidan di duu kami, maen di ya atu igpeukit di diyà kenami sa kepelihay sa medoo tegeMidiyan?”

¹⁴ Agulé mig-ikagi Datù Nemula i diyà si Gidiyon, guwaen di, “Angay ko aluki sa medoo tegeIslaél anì mekelaun da kedu diyà sa kedatuan sa medoo tegeMidiyan, enù ka dumuen sa dakel egkegaga ko danà ku egsugù keniko.”

¹⁵ Migsagbì Gidiyon i, guwaen di, “O Datù, enù sa ukit kealuk ku sa medoo tegeIslaél? Enù ka endà duen egkegaga sa malayan ké diyà sa umpung tugod i Manasa, owoy aken sa tigtu nekeleketanà diyà sa malayan ké.”

¹⁶ Agulé mig-ikagi Datù Nemula i, guwaen di, “Mekegaga ka doo umaluk sa medoo tegeIslaél enù ka tabangan ku kuna. Tigtu tabanan ko sa medoo tegeMidiyan lagà ka daa egbalà sa segeetaw.”

¹⁷ Migsagbì Gidiyon i, guwaen di, “Amuk tigtu egketuuwan ka diyà kenak, pehauwi ko diyà kenak sa tandà kuna si Datù Nemula eg-ikagi diyà kenak. ¹⁸ Amuk mebaluy, yaka pelawà eglegkà ya, hih, taman endà duen sa kaenen mekebegay ku diyà keniko.”

Guwaen i Datù Nemula, “Na, angatan ku taman pelikù ka.”

¹⁹ Huenan di, mig-angay Gidiyon i mig-imatay sa nati kambing, owoy tinabel di. Inilegà di ma sa sepulù owoy walu kakilu alina anì baelan di sa epan endà duen ipelenuk di. Egoh di nelegà dé sa kaleni, dinalem di alat owoy dinalem di kuden sa sabaw di. Agulé igtenà di diyà sa taengan sa Egsugùsuguen i Datù Nemula diyà siedò pesu kayu tugas. ²⁰ Mig-ikagi sa Egsugùsuguen i Datù Nemula diyà kenagdi, guwaen di, “Tenai ko sa kaleni owoy sa epan diyà siini dakel batu, owoy hudud ko ma dahiya sa sabaw di.” Hê, pinangunutan i Gidiyon sa igsugù di. ²¹ Agulé igtuedek sa Egsugùsuguen i Datù Nemula sa tuked egsabaan di diyà siedò kaenen. Hê, petow dé miglegleg sa apuy kedu diyà sa batu owoy neulow sa kaleni owoy sa epan, owoy nekedan ma dé sa Egsugùsuguen i Datù Nemula.

²² Agulé netiigan i Gidiyon iya sa mig-ikagi diyà kenagdi sa Egsugùsuguen i Datù Nemula. Huenan di, tigtu nelimedangan owoy guwaen di, “Aba! O Datù Nemula sa épê dakel egkegaga. Ngadan sa mebaelan ku ini egoh di enù ka hinaa ku owoy tinaeng ku ma sa Egsugùsuguen ko.”

²³ Dodoo mig-ikagi Datù Nemula i diyà kenagdi, guwaen di, “Petanà ko sa pedu ko. Yaka egkelimedangan na, enù ka endà mematay ka.” ²⁴ Agulé binaelan i Gidiyon dahiya sa atung kenà da eg-ulow sa ibegay da diyà si Datù Nemula, owoy pinengadanan di iya wé si Datù Nemula sa Egpetanà Pedu Ta. Na, dahiya doo taman ini egoh di iya wé binaelan di diyà sa menuwa Opela kenà sa medoo tugod i Abiyésal eg-ugpà.

Ini Sa Egoh I Gidiyon Migpangunut Diyà Sa Igsugù I Nemula

²⁵ Na, egoh di sumigep dé, mig-ikagi Datù Nemula i diyà si Gidiyon, guwaen di, “Angay ko sa keduwa maama sapì i Emà ko, sa pitu dé gepalay sa kelukes di. Owoy angay ko ma lukat siedò atung kenà sa emà ko eg-ulow sa ibegay di diyà sa Baal, owoy kasing ko ma siedò kayu inetaw Astolot igbugsud medapag dahiya. ²⁶ Agulé baeli ko sa atung kenà ko eg-ulow sa ibegay ko diyà kenak dutu siedò getan, aken i Datù Nemula sa egpigtuuwen ko. Pepion ko sa kebael ko, owoy amuk meubus ko dé, sekelengkeleng ko sa kayu inetaw Astolot enù ka iya sa temeg ko amuk ulowen ko sa maama sapì amuk egpenemulawen ko aken.”

²⁷ Huenan di, inuwit i Gidiyon sa sepulù geetaw diyà sa medoo egsuguen di, owoy binaelan da sa langun igsugù i Datù Nemula diyà kenagdi. Sigep sa egoh da migbael enù ka egkelimedangan Gidiyon i sa medoo malayan di owoy sa medoo duma di diyà sa menuwa da.

²⁸ Na, egoh di magtu kesimag egoh sa medoo etaw mig-enaw, hinaa da nedaetan dé sa atung kenà da eg-ulow sa ibegay da diyà sa Baal, owoy nekedan ma dé sa kayu inetaw Astolot igbugsud medapag dahiya. Owoy neulow ma dé iya wé maama sapì diyà sa magtu atung kenà da eg-ulow sa ibegay da diyà si Nemula. ²⁹ Agulé egseigsaay da, guwaen da, “Ngadan di etaw sa migbael ini i?” Egoh da dé temù egseigsaay, netiigan da si Gidiyon anak i Howas sa migdanà iya wé.

³⁰ Agulé mig-angay sa medoo ulu-ulu diyà si Howas, owoy guwaen da, “Pelesut ko sa anak ko anì imatayan ké, enù ka pinedaetan di sa kenà ta egsimbà diyà sa Baal owoy kinasing di ma sa kayu inetaw Astolot medapag dahiya.”

³¹ Dodoo mig-ikagi Howas i diyà sa langun etaw egkuntelà kenagdi, guwaen di, “Enù di ya, sulian yu Baal i? Maen di ya egtugutan yu iya wé? Mepion pa amuk meimatayan sa etaw sumulian si Baal egoh di endà pa sumimag. Enù ka amuk tigtu nemula kagdi i, sumulì doo danà di nedaetan sa atung kenà etaw di eg-ulow sa ibegay da diyà kenagdi.” ³² Na, edung egoh iya, si Hélobaal dé sa kepengadan da si Gidiyon danà iya wé inikagi i Howas, guwaen di, “Sumulì doo Baal i danà di nedaetan sa atung kenà etaw di eg-ulow sa ibegay da diyà kenagdi.”

³³ Agulé nesetipon sa medoo tegeMidiyan owoy sa medoo tegeAmalék owoy sa medoo liyu balangan etaw kedu diyà sa tanà denu tebowon agdaw, owoy migbatas da ma sa lawa't Holdan owoy migpetigdeg da ma kemalig diyà sa sugud Héslil. ³⁴ Agulé linuhub sa suguy i Datù Nemula Gidiyon i. Huenan di, eghiyupen di sa tegbuli di binaelan sidung kebilibili enù ka eg-umowen di sa langun maama tugod i Abiyésal anì umunut da diyà kenagdi. ³⁵ Pineuwitan di ma kagi sa medoo etaw diyà sa umpung tugod i Manasa owoy sa umpung tugod i Asél owoy sa umpung tugod i Sabulon owoy sa umpung tugod i Naptali. Hê, neseunut sa medoo etaw pineuwitan di kagi eg-angay diyà si Gidiyon.

³⁶ Agulé mig-ikagi Gidiyon i diyà si Nemula, guwaen di, “Amuk tuu sa inikagi ko aken sa hinemilì ko umaluk sa medoo tegeIslaél, duen sa egpegeniyen ku diyà keniko. ³⁷ Ini egoh di itenà ku sa bulbul kebilibili diyà siini atung kenà ké eg-elik teligo. Amuk ini daa sa mepelê danà aglù amuk umenaw simag owoy amuk metikal doo sa tanà nekeulingut, metiigan ku doo aken sa hinemilì ko mekealuk diyà sa medoo tegeIslaél.” ³⁸ Hê, tuu doo iya sa nebaelan. Egoh di sumimag, miglapus mig-enaw Gidiyon i enù ka inangay di egtelow. Egoh di migbelut sa bulbul kebilibili, nepenù wayeg aglù sa bilu.

³⁹ Agulé mig-ikagi dema Gidiyon i diyà si Nemula, guwaen di, “Mepion amuk endà bulitan ko duu aken danà ini i egpegeniyen ku dema diyà keniko, enù ka tepengan ku dema anì metiigan ku sa uyot ko. Ini sa ungayà ku metikal siini bulbul kebilibili dodoo mepelê aglù sa tanà nekeulingut.” ⁴⁰ Hê, egoh iya wé sigep, hediya doo sa binaelan i Nemula. Netikal iya wé bulbul kebilibili dodoo atung nepelê danà aglù sa tanà ulingut di.