6
Ini Sa Tigtu Mapulù Uledin I Nemula
1 Agulé guwaen i Mosis, “Na, ini sa langun uledin igsugù i Datù Nemula, sa Nemula egpigtuuwen yu, anì itulù ku diyà keniyu. Pangunuti yu ini i amuk mugpà yu diyà sa tanà buyu tepelen yu. 2 Taman sa egoh yu nehagtay pelawà owoy sa medoo tugod yu ma, adati yu Datù Nemula i sa egpigtuuwen yu owoy pangunuti yu ma sa langun uledin di tinulon ku diyà keniyu anì kumelalù yu mugpà diyà siedò tanà. 3 Huenan di, kiyu i medoo tegeIslaél, dinegdineg yu siini medoo uledin owoy tigtu pangunuti yu ma. Amuk hediya, kumepion sa keugpà yu owoy meguwad yu ma diyà sa melabel tanà mebaluyan sa langun hinemulaan, éhê mendaa sa igpasad i Datù Nemula, sa Nemula egpigtuuwen sa medoo tupù ta.”
4 Guwaen i Mosis, “Taa yu, hih, kiyu i medoo tegeIslaél. Iya daa sa tigtu nemula si Datù Nemula sa egpigtuuwen ta. Endà duen sa liyu nemula. 5 Huenan di, pusungi yu Datù Nemula i sa egpigtuuwen yu, owoy peunuti yu ma diyà kenagdi sa langun pedu yu owoy sa langun egkegaga yu ma.a 6 Yoko egkelipeng duu siini medoo uledin tinulon ku diyà keniyu ini egoh di. 7 Temù yu tului diyà sa medoo anak yu owoy takà yu ma olom amuk duen sa egbaelan yu ataw ka sumalà dé sa kenà yu, iling ka diyà yu sa dalan ataw ka diatas yu, iling ka eghibat yu ataw ka eg-enaw yu. 8 Poloti yu sa uledin diyà sa belad yu anì metulengan yu owoy diyà sa kilay yu ma anì mepenemdem yu. 9 Owoy sulati yu ma diyà sa kilidan pintù sa dalesan yu owoy diyà sa selat sa menuwa yu anì metulengan yu takà.”
Tinulon I Mosis Sa Mebaelan Da Amuk Endà Egpangunut Da Diyà Si Nemula
10 Agulé mig-uman Mosis i eg-ikagi, guwaen di, “Na, iya sa igpasad i Datù Nemula sa egpigtuuwen yu diyà sa medoo tupù yu, si Ablaham owoy si Isak owoy si Hakob, sa egoh di megay diyà keniyu sa tanà tapay dé duen sa medoo metolol dakel menuwa binaelan sa medoo liyu etaw. 11 Duen ma sa medoo dalesan nepenù sa medoo mepion sa endà itagù yu duu, owoy duen ma sa medoo paligì sa endà kinalì yu duu owoy sa medoo hinemulaan endà hinemula yu duu. Amuk uwiten i Datù Nemula kiyu diyà siedò tanà owoy duen dé sa langun egkeiyapan yu kumaen, 12 tulik yu anì endà melipengan yu duu Datù Nemula i sa mig-aluk keniyu kedu Igiptu dò kenà yu neudipen. 13 Adati yu Datù Nemula i sa egpigtuuwen yu anì kagdi daa sa penemulawen yu owoy anì kagdi ma daa sa pengibeti yu amuk peelesen yu sa pasad yu. 14 Yoko egpenemula duu sa inetaw egpenemulawen sa medoo liyu etaw eg-ugpà medapag diyà keniyu. 15 Enù ka amuk penemulawen yu sa inetaw, tigtu bulitan i Datù Nemula kiyu owoy pigtamayan di ma kiyu lagà sa kekaen apuy taman meimet yu mekedan diyà tanà. Enù ka mangabiyu Datù Nemula i, sa Nemula egpigtuuwen yu, amuk duen sa liyu egpenemulawen yu.”
16 Guwaen i Mosis, “Yoko egtepengan si Datù Nemula, sa Nemula egpigtuuwen yu, éhê sa binaelan yu egoh yu diyà sa wayeg Masa.b 17 Dodoo tulik yu anì mepangunutan yu sa langun uledin igbegay di diyà keniyu. 18 Baeli yu sa mepion owoy sa metudà diyà sa kehaa i Datù Nemula. Amuk hediya, kumepion sa kehagtayan yu owoy mekuwa yu ma sa mepion tanà kebaluyan, sa tanà igpasad i Datù Nemula diyà sa medoo tupù yu, 19 enù ka hemagawan di sa medoo kuntelà yu éhê mendaa sa igpasad di.”