4
Ini Sa Egoh I Mosis Mig-ikagi Diyà Sa Medoo TegeIslaél Anì Mangunut Da Diyà Si Nemula
1 Na, mig-ikagi Mosis i diyà sa medoo tegeIslaél, guwaen di, “Pangunuti yu sa langun uledin itulù ku diyà keniyu anì kumelalù yu owoy anì meheniyu ma sa tanà ibegay i Datù Nemula diyà keniyu. Kagdi sa Nemula egpigtuuwen sa medoo tupù yu. 2 Na, yoko egdugang duu sa uledin isugù ku diyà keniyu, owoy yoko ma egsiat duu. Pangunuti yu sa medoo uledin sa Datù yu si Nemula sa egtulonen ku diyà keniyu. 3 Na, hinaa yu doo sa binaelan i Datù Nemula dutu siedò getan Piyol egoh di mig-imatay sa langun tegeIslaél migpenemula sa inetaw Baal sa egpenemulawen sa medoo tegeKanan. 4 Dodoo kiyu i medoo eg-udes egpangunut diyà si Datù Nemula sa egpigtuuwen yu, nehagtay yu doo pelà taman ini egoh di.”
5 Guwaen i Mosis, “Igtulù ku dé diyà keniyu sa langun uledin igsugù i Datù Nemula diyà kenak. Pangunuti yu iya wé amuk umugpà yu dé diyà sa tanà buyu tepelen yu. 6 Petudà yu sa kepangunut yu anì mehaa sa medoo etaw diyà sa medoo liyu tanà sa kilantek yu owoy sa ketiigan yu. Amuk dinegen da denu siini langun uledin, mikagi da, guwaen da, ‘Milantek doo siini medoo tegeIslaél owoy dakel ma sa ketiigan da.’ 7 Na, apiya di pa duen egkegaga sa medoo liyu balangan etaw, endà duen sa nemula da nekeiling si Datù Nemula sa Nemula egpigtuuwen ta, enù ka kagdi sa egbulig kenita amuk duen sa kelikutan ta owoy egtabangan di ma kita sumalà dé sa egoh ta egpegeni tabang diyà kenagdi. 8 Na, apiya di pa duen egkegaga sa medoo liyu etaw, endà duen sa liyu épê uledin lagà siini metudà uledin igtulù ku diyà keniyu ini egoh di.”
9 Guwaen i Mosis, “Na, taman sa egoh yu nehagtay pelawà, tulik yu owoy hahaa yu ma anì endà melipengan yu duu siedò medoo hinaa yu. Pesagkat yu tulon diyà sa medoo anak yu owoy diyà sa medoo bébê yu ma 10 denu sa agdaw egoh yu migtigdeg diyà sa taengan i Datù Nemula, sa Nemula egpigtuuwen ta, dutu Getan Sinay dò. Egoh iya, mig-ikagi diyà kenak anì setiponen ku sa medoo etaw, enù ka ungayà di dinegen da sa eg-ikagiyen di anì meketiig da mangunut diyà kenagdi taman sa egoh da nehagtay pelawà owoy anì itulù da ma diyà sa medoo anak da anì mangunut da ma. 11 Na, tulon yu diyà sa medoo anak yu sa egoh yu migtigdeg diyà sa esudan getan egoh di migdeleman danà sa mekepal ebel kedu diyà sa siloy apuy. 12 Tulon yu ma sa egoh i Datù Nemula mig-ikagi diyà keniyu kedu diyà sa siloy apuy. Apiya di pa dinineg yu sa kagi di, endà doo hinaa yu duu sa lawa di. 13 Igpetiig di ma diyà keniyu sa mebaelan yu anì petuuwen yu sa nesepasadan binaelan di diyà keniyu. Ini sa mebaelan yu, pangunuti yu sa Sepulù Uledin igsulat di diyà sa duwa melugpayang batu. 14 Igsugù i Datù Nemula ma diyà kenak egoh iya anì itulù ku diyà keniyu sa langun uledin mepangunutan yu amuk umugpà yu diyà siedò tanà buyu tepelen yu.”
Ini Sa Egoh I Mosis Mighawid Sa Kepenemula Da Inetaw
15 Agulé mig-uman Mosis i eg-ikagi, guwaen di, “Egoh i Datù Nemula mig-ikagi diyà keniyu kedu diyà sa siloy apuy dutu Getan Sinay dò, endà hinaa yu duu sa lawa di apiya di pa dinineg yu sa kagi di. Huenan di, tulik yu temù 16 anì endà mekesalà yu danà yu egbael sa inetaw, sumalà dé sa egoh-egoh di, iling ka sa palas maama ataw ka éhê palas bayi, 17 ataw ka éhê palas hinagtay ataw ka éhê palas manuk eglepal, 18 ataw ka éhê palas sa medoo eg-ipanawpanaw diyà tanà ataw ka diyà wayeg. 19 Owoy yoko egpenemula duu sa medoo eghauwen yu diyà langit, upama sa agdaw ataw ka sa bulan ataw ka sa medoo bituen. Enù ka si Datù Nemula, sa Nemula egpigtuuwen yu, sa migpeduen iya wé anì hauwen sa langun etaw diyà siini sinukub langit. 20 Dodoo kiyu sa etaw inalukan di dutu Igiptu dò kenà yu nepasangan temù. Inuwit di kiyu kedu dutu anì mebaluy kiyu dé sa etaw di taman ini egoh di. 21 Na, binulitan i Datù Nemula aken danà yu, huenan di migpasad endà mekebatas a diyà sa lawa’t wayeg Holdan mangay diyà sa mepion tanà mebaluyan hinemulaan sa tanà ibegay i Datù Nemula diyà keniyu. 22 Mematay a diyà siini tanà owoy endà mekebatas a diyà sa lawa’t wayeg Holdan. Dodoo kiyu, mekebatas yu doo anì mekuwa yu siedò mepion tanà kebaluyan. 23 Huenan di, tuliki yu anì endà melipengan yu duu sa nesepasadan binaelan i Datù Nemula diyà keniyu. Pangunuti yu sa uledin di anì endà mael yu sa inetaw penemulawen yu. 24 Enù ka si Datù Nemula sa Nemula egpigtuuwen yu, kagdi sa lagà dakel apuy enù ka épê dakel egkegaga mekepigtamay etaw owoy mangabiyu ma amuk duen sa liyu egpenemulawen yu.”