Aroman Luyírnékídíng
2
Émpigeːla poːpéloːsin taniːkídíːdok araːdo aroman lungor-lunné dungngai, édémarpé noluk araːlo aroman luyírné duːyé. Bulu léːsila siko lambéloːpé gíboyé, bulum répítkuné Ruːtumésin bulu lupagyé, édémpé bulu buluk tayéːlo lomdanna sinané lambém langasuyé. 2 Buluk anyisukanné lambédo bojéruːngkoné gímínna arodok lambédém ammem lukaːmoyé. 3 Odokké buluk agroiyaːlo édé aroman luyírnékídíːdé nolum méːsumésunam doːyingém kíbila nolukkolok murkongém laːlenyé. Bulum baːpénam kébaːdé bulum bojjarko toyaːla duːmaːbo, odokké buluk sipénamdé yubngaksula duːmang.4 Paːb iné tayéng-yaːmekídíːdém Ruːnébí métomang, émpigeːla bulum uiːamoboːpé géilíkto, okolo bulum kémokolo kébaːbaːnam longédok légaːpé ikoliki rínna léːtag. 5 Ruːnébí lekeké réngamdémsin métomang, ruːném-kummaːné réngamdoːpé pumiassém mélíkto; émpigeːla bí Nuamé atéroːdémna bík lédílo kínítkoném moturbito, Noːabí arolok-duːnamém lugoːbinékai. 6 Ruːnébí Sodom odokké Gumurra nogor baːnyidém kébangém baːla umílo médbupé imoto, odokké aːpéné ayírdo ruːném-kumman taniːkídíːdém kapé iyéji édém kaːyisunamkopé imoto. 7 Émpigeːla bí arolok-du:né Ludmé moturbito, odok luroːkaman taniːkídíːdok bemunsunamkídíːdé bím airupé méːdírmodaggai. 8 Édé ainé taniːdé buluk araːlo duːmínka, bí buluk aiman agerkídíːdém kaːpaːtatpaːla loːdém asiné kigosudagai. 9 Édémpila ruːném-kumném buluk ngasodlokké kapé mopítpénamén odokké aimaːnékídíːdém mokemoram bila bulum kébaːbaːdo longédoːpé kapé léːpénamén édém Ruːtumbí kindag. 10 Séːkobulu aisíːmaːném méːbola gímíndang odokké Ruːnémé ménggésumang bulukképé anguru:pé sidé arodag.
Édé aroman luyírnékídíːdé angpítadag odokké magramidag, bulu tayéngké unjígém ménggésunamém bimang émpigeːla bulum lukaːdag. 11 Tayéng-yaːmekídíːdé, séːkobulu séː aroman luyírnékídíːsém aipéi toryangeːla kínggídaggom, Ruːnék kanggaːlo buluk kekonpé lujémna lukaːmang. 12 Émpigeːla séː taniːkídíːsé buluk kinmaːnam agom tayéːloːsin Ruːném lukaːdag. Bulu makkeresiyaːné simín kísadag, kegappé émna ménggodag odokké mokepé émnagoː otag, odokké simín kísapé bulusin singabyé. 13 Buluk binam ngasodém bulum ngasotpé biladyéku. Bulu longépoːrapé imurém igeːla méːpomandag. Bulu nappa:yakamonélaː anyisumoné, noluk lédílo dojonsudodoːsin bulu aromaːnélo méːpodag. 14 Bulu okkomsin kanggo:mang émpigeːla beːpé émnango kanggodag; bulu paːbém édíloːsin ingasumang. Bulu rémagnékídíːdém yadyumdag. Buluk asiném amikpírtadopé luyírtag. Bulu Ruːnékolok penamém paːnéǃ 15 Bulu yíg émné lambédém mépagnammé bulu gínyoksukang; bulu Boerké ao Balaamké lambédo gímínkang, séːko imurém igeːla paːnam murkongém méːbodaggai. 16 Émpigeːla bík imurnamdok légaːpé agom lumaːné simín, gadongkoné, séːko taniː gomukpé lula lungor-lunédok simadné agerdém lutomna, bím géːto.
17 Séː taniːkídíːsé asi kaman sikuré, odokké ésaré sarbomnam mukkangé; Ruːnébí bulukképé kémopagyaːné dungkoko mébitag. 18 Bulu nappang angngarangongé, pugdasun agomoːngé, odokké adin-amírrok langgonammém ménggomodag, séːkobulu annopé yatkagla léːnamdokké gípítoːsutagaji bulum paːbém idokupé méːboka:bomodakku. 19 Bulu bulum aísuampé duːyépé émna pesubidag, émpigeːla bulu aíkídíːdéi aimaːnélok pagbo, okko taniːkolok ruːtumpé idagji taniːdé odok pagbo. 20 Bulu ngoluk Ruːtummélaː Moturbiné Jisu Kiristomé kinnamkokki moːpísok aisíːmaːnélokké dukpítsugeːla lékoda oddupé aːladlangkula paːblo durbutsukumílo, bulu poːpékédémyang lédíkékodo aiyamaːyéku. 21 Kapéné édém kingeːla bulum binam naréné luroːdokké gílattayingém, arolok-duːnam lambédém bulu kinmaːnamkam aipé aiyyadaggai. 22 Bulukkolo luyisunamkídíːdé arodagː "Ikiyé bík badnamdém dodakku," odokké "Eːgém írpubigom bí bukaːlo gadoilosudakku."