2 Pitor
Pitorké Bornyinané Doːjíg
1
Ngo Simon Pitorbí, Jisu Kiristoké pagbokolaː mélígnamko,séː doːjíksém bulukkoloːpé adlígdung, séːkobulum ngoluk Ruːnékélang Moturbikuné Jisu Kiristok arolok-duːnamki ngolum binam arékané méːjígém bikampé binamkídíːdoːpé.
2 Ruːnémélaː ngoluk Ruːtum Jisumé noluk kinnamki aséngélaː ansíngé nolukkolo bojébomkaːlangka.
Ruːnék Gognaméla Balennam
3 Ruːnék tayéng tornamki, ngolum arolok-duːnamno turra duːdopé ngoluk laginam appíngém bí ngolum bitag. Ngolu bím kinnamé séː appíːsém paːtag, séːko ngolum bík aíkodoːpé bík méːpílaːmanam unjíkkilang bík ainamki goktag. 4 Sidogbulukki bí ngolum bík airuːpé kínggínélaː arékané pesubinamém bitag, édémpila édé pesubinamkídíːdé nolum Ruːnéké unjígém bisulaːdag odokké séː moːpísok aidanma:nélokké lenné méːbonamnokké nolu dukpítsulaːyé. 5 Sidogarbuluk légaːpé ainamém noluk méːjígdo paːsednam légaːpé pagnamdém ilang; noluk ainamdé kinnamém paːsedmoye; 6 odokké kinnamdé aíém-tejisunamém paːsedmoye, odokké aíém-tejisunamdé, oijosunamém; odokké oijosunamdé yelam agerém; 7 odokké yelam agerdo, bírrang ayang; odokké bírrang ayaːdo, aipé-méːnam. 8 Sidébulu noluk laginam soritkídíːdé, odokké édébulu nolukké kasekayéla kamílo, ngoluk Ruːtum Jisu Kiristom noluk méːngkinamno édébulu nolum ager-kannélaː ardan taniːpé imoyé. 9 Émpigeːla séːkkaiké édébulu kamamílo, bí aninpé kaːbegnélaː miglunéko, odokké bím poːpéké imurkídíːdokké mopubinamdém bí mitpansuto.
10 Odok-légaːpé, ajonkídínga, nolum gognamdémnaː balennamdém dakidanna lulaːdopé kínggíːpé asin-díglang, kapéné nolu édém imílo nolu édíloːsin opagledmaːyé, 11 odokké ngoluk Ruːtumkélaː Mortubiné Jisu Kiristok duːyarné migomdokodo bottéruːpé boríksunamko nolu paːyé.
12 Odokké nolu édémbulum kinjígla kinna odok arodo dagrasuladunggom, ngo nolum loːdípé sémbulum méːpaːmoyé. 13 Ngok turra duːdag takamdo édém nolum méːpaːmotíla duːnamdé ngokképé kabodag émna ngo méːsudag. 14 Ngo kinsudag séː ngok sipakpéné amírsém ngo lomdanna pítpaksuyébo, kapéné ngoluk Ruːtum Jisu Kiristobí ngom naréngoːpé lukanbitagbo. 15 Ngok gípakkunam lédupé nolu appíng ayírro sémbulum méːpaːla duːdopé ngo éddík pagyeji odokkíddík ibipé.
Kiristok Unjígdém Aíké Amikki Kaːnékídíng
16 Ngoluk Ruːtum Jisu Kiristok tornam odokké bík gílatkunamdém nolum lubidodo ngolu taniːlok pokírra kíbinam doːyíngém nolum kíbimangngai. Émpigeːla ngolu bík unjígdém aíké amikki kaːsutag. 17 Kapéné Ruːné Abukolok bí ménggésunamémna unjígém paːto, 'Bí ngok Aoːo, séːkom ngo aipé-méːdang, bíkkolo ngo airuːpé méːyumsudag' émna édílo gomugdé Tayéng Unjígdokké ludagan ngolu odo dungngai. 18 Édílo ngolu bík lédílo naréné adi tayéːdo dungngan odo tayéːamoːtokké lunam gomugdém ngolu aíé tatsutag.
19 Édémpila lungor-lunékídíːdok lugoːbinam doːyíːdém ngolu dakidanna arro émbilaːdag. Nolu doːyíːdém asin-binam légaːpé aipé ibomye, kapilaːné édíloːpé píaːpímaːyéji odokké karbuk takardé noluk asindo karsaːmaːyéji, odoloːpé édé seraki kísapé kémokolo unnaduːné. 20 Appíngkémyang tayéːpé, nolu sém kinpénammé Ruːnék-gomugdok lungor-lunam aːkosin lungor-lunédok aíké lusonsubinampé gímang. 21 Kapéné lungoré édíloːsin taniːlok méːnamno lennémang, émpigeːla Angunné Yaloké igurro lungor-lunékídíːdé Ruːnékolok paːnam lungordém ludag.