Ruːtumké Longédé
3
Méːbomsunam ajonkídínga, nolukkoloːpé ngok séː bornyinané doːjígé. Ngok adnam doːjíg bornyiːdéi noluk asinno ainém méːla duːlangka émna méːpaːmokunam légaːpé attag. 2 Angunné lungor-lunékídíːdok lekeké lunam agomkídíːdémna noluk mélígnamkídíːdok ngoluk Moturbiné Ruːtumkolok paːnam lulígnamkídíːdém nolu méːpaːdokupé ngo séː doːjíksém addung. 3 Sém nolu kinpoːruːpénamé, léddarké longékídíːdo lukanggoːné gíyé, lukanggoːla buluk adin-amírrok laːlíngílíːlo gígoyé. 4 Odokké bulu tauyé, "Kapikan Jisuké gíladyéku émna pesunamdé? Ngoluk taːtobulusin singapkaːbo, émpigeːla ruːlendokkébo appíngéi lékkolai dung." 5 Bulu mitpanruːpé émna séː arosém mitpantag, Ruːnéké agomki lekeloːbo tayéng-amoːtém ruːtag odokké moːpísém asilokkéla asiki ruːtag émnamdém. 6 Édé asikídíːdokki édé akuné moːpídém moyutto. 7 Odokké édé agomíːdokki suːpakké tayeng-amoːtémna moːpísém umílok légaːpé métag. Édílo Ruːném-kinmaːnékídíːdém kébaːbaːla momígamyen odo longédokképé bulum mésíːtag.8 Émpigeːla méːbomsunam ajonkídínga, séː arosém mitpanyokː Ruːtumkolo longé aːko líːyíng díːtakkonémpé idag, odokké líːyíng díːtak aːko longékonémpé idag. 9 Ruːtumbí bík pesubinamdo asoːmang, akke asoːdung émna méːdag. Bí nolum oijosula dung, séːkomsin bí yokkalangka émna méːmang, émpigeːla appíngé méngkutsutokuka émna méːbidag.
10 Émpigeːla Ruːtumké longédé dopsongkolok gíkampé gíyéku. Odo longédo tayeng-amoːté ngomna déːpagyé, odokké odok duːnékídíːdém umílo jedmoyé, odokké moːpísém odokké sidok duːné appíngé yogyé. 11 Appíngém sémmarpé momígyé, nolu kapin tani:pé ipénammén? Noluk turnamdé angunnépéla ruːném-kinnép ipé lagiyé 12 Ruːnék longédé lomdanna gídokubo émna nolu toyaːla dung. Édé longédé tayéng-amoːtém umíki ukpagmoyé odokké odok duːnékídíːdém gunamki jedmoyé. 13 Émpigeːla anu tayéng-amoːdémna anu moːpídém okolo arolok-duːné duːyékuji, okkom Ruːnébí pesubitang édém ngolu toyaːla dung.
14 Édémpila méːbomsunam ajonkídínga, nolu édé longédém toyaːlai dung, odok-légaːpé Ruːnékolo nolu imur-kamaːnépé, lugéngkamaːnéla ansíːpé duːné taniːpé ikíruːpé méngkílang. 15 Ngoluk Ruːtumké toyaːla duːnamdé moturbinamé émna sablang. Édémíːpé bím binam méːjoːnamdok kísapé ngoluk méːbomsunam bíro Polbí nolukkoloːpé adlíkka. 16 Séː doːyíːsém addom bí bík appíng doːjíkkídíːdoi sémpé ludag. Bík adnam doːjíg ara:dok ake agomém kinnamang, odokké séːkobulu kinmangan odokké baggodaggan, bulu bík doːjíkkídíːdém oːkai angupé luyodambito, kappar bulu Ruːnék-potindok adnam akekídíːdémsin iton. Édémpé bulu buluk aíké tayéːlo mokemoramém laːlíksudag.
17 Odok-légaːpé méːbomsunam ajonkídínga, nolu sidém kindagéibo, nolu totsulang odo nolum luro-kaman taniːkídíːdok lumurki gíyodbomaːyé odokké noluk dagrasula dungkodokké opagledmaːyé. 18 Émpigeːla ngoluk Ruːtumkélaː Moturbiné Jisu Kiristoké aséːdoːla kinnamdo puːpojarpoːkaːlangka. Takam luyitsunamé bíkkoloːpé suːpaglaː loːdílongkípé. Amenǃ