Ru:nébí Ngoluk Abbo
12
Odok-légaːpé, bottén kéréngko lubikun taniyé ngolum duːyedbomna dung; édémpila, kajé ngolu ngolum dagriné appíːdémna paːbdém okodé ngolum bíjembomna dun édém érpaksulai. Odokké ngoluk kanggaːpé duːné dukpénamdém kajé ngolu ménggabla duglai. 2 Kajé ngolu Jisum kaːtinsulai, sék tayéːlo ngoluk méːjígdém lendodokké lentérdoːpé méːtinsutag. Kurusdok légaːpé bí mépagmangǃ Émpigeːla, méːpodok légaːpé okodé bím toyaːla dun, kurusdok anyísula sibinamdém bí okkosin émna méːtomang, odokké suːpag bím Ruːnéké migom-tetkodog lagbíkpé tedmotag.a3 Noluk asiném méːdírra nolu mépagmaːdopé, méːpaːngkítok bí kapin ngasodém imur-iné taniːkídíːsok alaglok paːton. 4 Nolu paːpké kekonpé yeːmunsula suːloːpé íːyém bidgoːsukímaːda. 5 Ruːnébí nolum bík ommang kísapé lubinam lusang agomdém nolu mitpansutonei?
"Ngok aoːa, édílo Ruːtumbí nom moyinsuyéji odo asin-bila tadlang,
odokké bí nom geːyírdodo asin méːdíryok.
6 Kapéné Ruːtumbí séːkom aipé méːdagji bí bím moyinsudag,
odokké séːkom bí ao kísapé toríksutagji bím díːyinsudag."
7 Abbo moyinsudung émna ngasodém oijosulang; Ruːnébí nolum ommang kísapé iyírdung. Abulok édíloːsin moyinsumaːnammé, édémpin ommangé duːnei? 8 Appíng ommangém moyinsudodo, nolum moyisutéːmaːmílo, nolu joːrangépag, nolu osunam ommaːmang.b 9 Odok tayéːlo, ngoluk appíngké adin-amírrok abbo dungngai séːkobulu ngolum moyinsuka odokké odok léga:pé ngolu bulum ménggésuto. Émpém ngolu éddíko ngoluk yalolok Abumé ajjisula turpénamménǃ 10 Kapéné okodé kabodagji buluk méngkampé, kontég légaːpé ngolum ngoluk abbo moyinsudag, émpigeːla Ruːnébí ngolum ngoluk ainam légaːpé moyinsudag, odo ngolu bík angunnamdém paːmínyé. 11 Édílo ngolum moyinsudang, odo ayírdo oːkaikoné ngolum méːdírmodag, édé ngolum méːpomomang. Émpigeːla séːkobulum sémpin díːnamki moyinsutagji lédupé arolok-duːnamémna asin-ansíngé paːyéku.
Luyírnammélang Lupangé
12 Odok-légaːpé nok lakpeːla duːné alagém laksaːtok odokké jinna duːné lébíːdém léjartok.c 13 Lébené kéttabmaːdopé, émpigeːla ésaːdokupé, noluk alékídíːdok légaːpé lambékídíːdém yig émmotok.
14 Appíngké lédílo ansíngo:pé duːlang, odokké angunné turnamno turrang, kapilaːné angunnamdémaːmílo séːkosin Ruːtummé kaːbegmaːye. 15 Ruːnék aséːdokké gílatkupéké édém ansulang. Séːkosin koné amíngkonémpé ipélagimang okodé míːtaːla noluk araːdo ngasodém bila bojérungkoném suamopéké.d 16 Séːkosin Esoukémpé laːnggonélaː arolok-duːman taniːpé ipélagimang, séːko apin arém légaːpé abíné aoːlok paːnam ménggésunamdém kopaksuto.e 17 Odok lédukédém nolu kindag, Esoubí bík abudok peyubinamdém paːlíːto, émpigeːla abudé bím lupakto, bí miksé díla peyubinamdém madogom, bík asiném méːlatsumolaːtomang.f
18 Israel taniːkídíːdok gíkampé nolu adiːkoloːpé gímang okodém gakkílaːdag odokké dorné umídém kaːbegdag; odokké yakala kémojíjí:la duːnamdémna ésarém anbegdag, 19 tu:tok mudnamko, odokké gomukkolok béːnamko tatpaːsudag. Édílo taniːkídíːdé gomugdém tatpaːsuton, bulu lékoda tadbegmoyokubo émna kumdanna luto.g 20 Kapilaːné okodém lulíktagan bulu édém tatrasulaːtomangː "Simínkonésin édé adiːdém kétubmílo, édém ílíngki gékelang." 21 Édé kaːpaːnamdé míryaddopé pésokandagai, édémpila Musiːbí luto, "Ngo pésolo jindung."h
22 Émpigeːla nolu Jayon Adiːdo:pélaː turné Ruːnék nogordoːpé, tayéng-among Jerusalempé líːyíng líːyíng tayéng-yaːme lédílo gíaːmíndung. 23 Nolu Ruːnék obopoːlumkídíːdok méːpola gíkumsukodoːpé gídung, sék aminém tayéːto adgabla léːbitag. Nolu Ruːnékoloːpé gítag, séːko appíng taniːlok kébaːbaːbin migomdé, odokké nolu arolok-duːnékídíːdok yalokídíːdoːpé gítag séːkobulum tayéng-amoːto kabodannép imotang. 24 Nolu anu luségdok Ruːnékéla taniːké pongkoké taniːpé ibila duːné Jisukodoːpélang édé tíglígnam iːdoːpé gítag okodé Abelké iːdémyaːsin aiyaːném pesubila léːbitag.i
25 Totsulang agom-lubinédok agomdém nolu lupagmaːpéka. Moːpísok lupaːbinam agomdéméi lupagla bulu dukpísulaːtomang, émpém tayéːtokké lupaːbinam agomdokké gíyodmílo, kapé ngolu dukpítsulaːyenǃj 26 Édé ayírkídíːdo bík gomugdé moːpísém éngunmoto, émpigeːla bí suːpag sémpé pesutag, "Ngo lékoda éngunmoyé, odo moːpísémmong éngunmomaːyé émpigeːla doːmírtémsin éngunmoyé."k 27 "Lékoda" émnam agomdé ruːnam appíngém éngunmoyé odokké laːpagyé, odokké okokídíːdém éngunmolaːmaːji édébulu duːyaryé émnamdém nérkíkpé léngkanbidag.