Ruːném Kapé Méːyumsumoyen
13
Akoné akoném bírrang kísapé asinang-oyarrang. 2 Mibo bopénamdém mitpansuyok, kapéné mibo-boddom akke kinmaːpé tayéng-yaːmeyém mibo-boto.a 3 Makanaːlok duːnékídíːdém, nolusin buluk lédílo makanaːdo duːmínarkanémpé méːpaːlang. Ipusirenamkídíːdém nolusin buluk lédílo ipusire paːténgarmínkanémpé méːpaːlang.4 Midang-monamdém appíngki ménggésupé lagidag, odokké néːmilbongé akoné akoném aromínsulang. Kapéné benggon taniːyémna langgon tani appíngém Ruːnébí kébangém baːyé.
5 Murkongém méːbonamdokké moːtéːpé duːlang; noluk kanam tayéːlo méːtísulang, kapéné Ruːnébí lutagː "Ngo édíloːsin nolum mépagla nolukolokké gíérmaːyé."b 6 Édémpila kajé dakidanna lusulai,
"Ruːtumbí ngom kaːdumsunédé,
ngo pésomaːyé.
Séːkai ngom okkom ilaːyén?"c
7 Noluk mirokídíːdém méːpaːlang séːkobulu Ruːnék agomém nolum lubitang. Bulu kapé dungngan édém méngkaːlakaːlang, odokké buluk méːjíksunamdém kaːyisulang. 8 Jisu Kiristobí mélo, silo odokké loːdílongkípé lékkola duːdag. 9 Bangkí bangkí anu luyírki aroné lambédokkém gíyodbokosuyok. Ruːnék aséngki ngoluk asiném kínggímonamdé aidag, joːsag donamkimang, séːkobulu dodagji édébulu bulukképé aré kamang.
10 Jiudi miríkídíːdé séːkobulu poːyubdo agergerdang ngoluk runggudok palígnamém donan bulukké arékamang. 11 Abíngaryan mirídé Angunpagyangkodoːpé simínnok íːyém paːblok tosaglígnam kísapé bomdag, émpigeːla adinkídíːdém poːyubdok ruːyido romdag.d 12 Odokké édémíːpé Jisubíːsin bík aíké iːdokki taniːkídíːdém angunmonam légaːpé nogordok séːtur ruːyido sibika. 13 Édémpila kajé ngolu poːyubdok ruːyoloːpé bíkkodoːpé gílai, odokké bík paːnam anyisunamdém paːmínkai. 14 Kapéné séː moːpíso ngolukképé duːyarra duːpéné nogoré kamang; émpigeːla aːpéné nogordém ngolu toyaːla kaːladung. 15 Odok-légaːpé kajé ngolu loːdísém Jisukokki Ruːnémé tosaglígnam kísapé luyitsulai, bím Ruːtumdé émna ngoluk nappangki ludésaunamdé édé tosaglígnamdé.e 16 Odokké ainém gerpénamdémna akoném bidumsupénamdém mitpansuyok, kapéné édémpin tosaglígnamki Ruːnémé méːyumsumodo.
17 Noluk mirokídíːdok agomém tadlang odokké buluk ilang-gílaːlo kéíksulang. Bulu tedrasumaːpé noluk iji-yallom kaːsíla duːdag, kapilaːné bulu buluk gernam agerdém Ruːnémé léngkanbipaːyéku. Nolu buluk agomém tadmílo, bulu buluk agerém méːpola geryé; odokké tadmaːmílo bulu édém méːdírra geryé, odokké édé agerdé nolukképé ainépé imaːyé.
18 Ngoluk légaːpé kumbilang, kapéné ngolu kinsudag, ngolukké naréné méːloddé dung, odokké appíng agerém ménggésula gerrídag. 19 Ruːnébí ngom lomdanna nolukkodoːpé méladlígdokupé kínggípé kumdopé ngo nolum kumdanna ludung.
Kumtér Kumnam
20 Suːpag ansí:né Ruːnébí séːko sikodokkém lékoda ngoluk Ruːtum Jisu, abípagyaːné Meːr-kaːsínémé, turyarné luségdok iːdokki turmotoku,f 21 bík méːnamdém nolu idopé appíng ainamki nolum luyírbikaːlangka, Jisu Kiristokokki ngolukkolo ager gerradung, séːkkoloːpé unjígdé loːdílongkípé duːyarkaːlangka. Amen.
Lutér Agom
22 Ajonkídínga, ngok lusaːla lunam agomkídíːdém oijosulang émna ngo kumdanna ludung, kapéné ngo nolukkoloːpé andéngoːné doːjíkko attag. 23 Ngoluk bíro Timotimé mélennítakku émnamdém ngo nolum kinmolíːdung. Bí lomna gípí:mílo, ngo nolum kangkolo bík lédílo gímínyé.
24 Ngoluk asin-aséngém noluk miro appíngémna Ruːnék taniːappíngém bibilang. Italisok méngkésun bírrangé buluk asin-aséngém nolukkoloːpé bilígdung.
25 Noluk appíngkolo aséngé dungkaːlangkaǃ