Kiristoké Sibinamdé Appíngképé Lékkolo Píːbikang
10
Ainé oko okko gídoːji luro:dé odok yalloːdé aroruːpé édé aroːdémang. Édé palígoːnamdém dítag dítaglo palíktílaː duːdag. Émgom séːkobulu kéraːdoːpé gíaːla kumdoji bulum kabodannép imolaːmang. 2 Luro:dé pagnamkaːmílo, bulu pangasumayaːlang? Kapéné kumnékídíːdém lékkolo appíːlok légaːpé narémomayaːlang, odokké bulu lékoda bulukké paːbé dung émna méːsuma:yai? 3 Émpigeːla édé palígnamkídíːdé dítag dítaglo taniːkídíːdém buluk paːbém méːpaːmokunammai, 4 kapilaːné soːbologla sobennok iːkokki paːbém laːpagnamdé paglaːnam agermangai.5 Odok-légaːpé, édílo Kiristobí moːpísoːpé gítoji, bí Ruːnémé lutoː
"No palígnammémna tosagnamém méːbomang,
émpigeːla no ngok légaːpé adin-amírko moninsunoːbitag.a
6 Romnígla tosagnamnoːla paːblok tosaganamno
no méːyumsumang.
7 Odo ngo luto, 'O Ruːné nok méːnamdém ibipé émna ngo sidé dung,
ngok tayéːlo luro potindo édém kapé adla léːtuji, édémarpé ngo ibipé.'"
8 Bí lupoːto, "No palígnamémna tosagnamém, romnígla tosagnamémna paːblok tosagnamém méːbomang, (édémbulum Musiːké luro:dé lagidaggagom) bulukokki nom méːyumsinsumomang." 9 Odo ngo luto, 'Ngo nok méːnamdém ibipé émna, ngo sidé gípíla dung." Bí lédíkédém laːlennam légaːpé bipoːnamdém laːpakto. 10 Odokké Ruːnék méːnamdokki, Jisu Kiristoké amírdém palígnamdokki ngolum lékkolo appíːlok légaːpé angunmoto.
11 Mirí appíngé loːdísém bík mirí-agerdém gerbomdag odokké palígoːnamdém palíktíla duːdag; okodé paːbém édíloːsin langérbilaːmang. 12 Émpigeːla Kiristobí appíng ayírrok légaːpé palígnamko paːb légaːpé tosaglíggeːla bí Ruːnék lagbíkpé tetkang. 13 Odokké édíloːpé Ruːnébí bík mirukídíːdém bík lépo-samtag kísapé imomaːyé odo bí toyaːla duːyé.b 14 Kapilaːné palígnam abangki séːkobulum angunmotagan bulum loːdílongkípé kabodannép imoto.
15 Angunné Yalobíːsin ngolum lukanbidag, kapéné bí ludagː
16 "Ngo buluk lédílo séː luséksém ségyé
Ruːtumbí ludag, aːpéné longékídíːdo
ngok luro:ém ngo buluk asinno lígbiyé
odokké buluk pinyudo édémbulum biggablígyé."c
17 Odokké bí lutémto, "Ngo buluk paːbémna aiman agerkídíːdém lékoda méːpangkumaːbo." 18 Okolo sémbulum méːyinsubitagbo:ji, odo paːb légaːpé palíkpénamé kamaːbo.
Kajé Ruːnék Kéraːloːpé Gíaːlai
19 Odok-légaːpé ajonkídínga, Jisuké i:dokki ngolu Angunpagyangkodoːpé méːrasuma:pé gíaːlaːdag. 20 Bí sorkomnamdokki, bík aíké amírdokki, ngoluk légaːpé turné, anu lambéko mogebitag. 21 Odokké Ruːnéké okumdo ngolukké bottéruːné miríko dung. 22 Édémpila kajé ngolu méːtinsunamnok paːnam narén asinki Ruːnék kérapé gíaːlai, kapilaːné ngoluk asiném aiman méːlodlokké narémobitag odokké ngoluk adin-amírsém naréné asiki írpuːbitag. 23 Kajé ngolu ngoluk ludésunamdok akaːsula duːnamsém éngunmaːdopé sogabla duːlai, Ruːnémé ngolu méːtinsulaːdag kapilaːné bí arodag. 24 Akoné akoném kaːdumsudopélang ayangém léngkanna ainé agerém gerdopé, kajé ngolu akoné akonké légaːpé méːbilai. 25 Kapé akke méːyaméːsadang, édémpé ngoluk gíkumsunamsém méːyaméːsayok. Émpigeːla kajé ngolu akoné akoném lusangoːlíglaːyai, kapilaːné Ruːtumké Longédé aninpé píngadobo, nolu kaːbegdung.
26 Arodém kinnam lédupé ngolu ipérung émna paːbém iyartímílo, paːb légaːpé palíkpénamé okkosin katomaːbo. 27 Émpigeːla kébangoːngkolang dorné umíko toyaːla duːyé okodé Ruːnék mirukídíːdém ukkeyéji édém pésopénamé.d 28 Séːkoi Musiːké Luro:dém lupagdaggaji, bík kekonpé annyimanggom aumkolok lubikunammém paːmílo, bím ayadanmaːpé mokedo.e 29 Ruːnéké Aoːmé alé kéígbo sammígla odokké aséngém biné Yalomé lukaːné taniːdé éddíko bojéyaːpé bottéyan mokemoramém paːyé émna nolu méːdang, séːko luségdok iːdém okodé bím mopubiton édém angunnman attarpé sappagdoji?f 30 Kapéné ngolu bím kindag séːko sém lutagji, "Alígdé ngokké; odokké ngo alígém lígbiyé," odokké bíːíng luto, "Ruːtumbí bík taniːkídíːdém kébaːbaːbiyé."g 31 Turné Ruːnéké alaglo oanamdé airuːpé pésopénam agerko.
32 Píaːdém paːnam lédupé noluk paːnam appíng ngasod longékídíːdém mitpansuyok, nolu bojéruːngko ngasodém paːto émpigeːla oijosuka. 33 Lékonkém nolum taniːgíkumsukolo anyisumola ipusireka; odokké lékoném buluk lédílo dagmínka séːkobulum ipusirekan. 34 Nolu makanaːlok duːnékídíːdok duːgém domínka, édílo noluk ompotiém rotpakton, nolu méːpola oijosuka, kapilaːné nolu kindagai suːpaksin édémyang aiyaːné ompotiːko nolukké dung okodé lodí-longkípé duːyaryé. 35 Noluk asiném kínggímotok, kapilaːné édé bottéruːné amanko bomaːbiyé. 36 Ruːnéké méːnamdém gerbipé odokké okkom bí pesubila léːbitang édém paːpé, nolu oijosula duːpayé. 37 Kapéné
ajjokomíloi
odokké séːkobí gípénédén bí gíyé;
bí duːtédmaːyébo.h
38 Émpigeːla ngok arolok-duːné taniːkídíːdé méːjíksula turyé.
Odokké bí gílatsukumílo,
ngo bíkkolo méːyumsumaːyé."i
39 Ngolu gílatsulangkula yokpén taniːmang. Kapilaːné ngolu méngkésula moturbinam paːnékídíːdé.