Moːdisogla Tayéːtok Kumnam
9
Bipoːnam luségdo aroruːpé kumnam luyírélang odok kumgéngko moːdiso dungngai. 2 Poːyupko diːsangka, odok ara:do soyarko dungngai, okodém Angunnédé émdo. Odo seraki-tígédé odokké tebuldok lédílo Ruːnémé tosaglígnam pitangé duːdagai.a 3 Odok lédíké sorkamnamdok lamkudo soyarkoda dungngai édém Angunpagyangkodé émdo, 4 okolo dunangém romko aín runggudéːla aínki tíbu:nam luségdok peradé du:dagai. Édé peradok araːdo mannalok aín gontidém, anné nginnena duːné Aaronké tukundém, odokké luségdok ílíng silotkídíːdé duːdagai.b 5 Peradok tayéːdo unjígné serup annyiko duːdag, bínyik alabdé paːbém méːyinsubikodém laglubla duːdag. Émpigeːla suːpag édémbulum lubínna lusarbinan ayírmang.6 Édílo appíngém édémpé ibidoji, miríkídíːdé loːdém panggotpoːnam soyardoːpé gíaːla buluk agerém gerdagai. 7 Émpigeːla abíngaryan mirroːdé arangké soyardoːpé gíaːdaggai, édésin dítakkolo lékkongko giaːdaggai, édémsin iyém bomamaːpé gíaːma, okodém bí bík aíké légangéla taniːkídíːdok kinmap inam paːb légangé pídebitang. 8 Angunpagyangkodoːpé gíanan lambédém mogebimaːda édíloːpé bipoːnam poːyubdé dagyarpoːyéji, édém Angunné Yalodé édé agerkídíːdokki léngkanbitag. 9 Suːpakké ayírsokképé sidé luyisubinamko, okodé Ruːnémé tosaglígnam amanéla palígnammé kumnékídíːdok méːloddém narémolamang émna léngkanbidag. 10 Édébulu okosinmang émpigeːla donam tíːnamélang pídesula írnamoːngé. Édíloːpé anu lulígdé aːmaːyéji odoloːpé séːbulu ager gertíla duːyé.c
11 Émpigeːla Kiristobí sok duːné ainé attarkídíːdok Abíngaryan mirí kísapé gítag. Bík ager gerko poːyubdé bottéyaːnédéːla kaboya:néːdé; édém taniːlok alakki momang, odokké édé séː ruːnam moːpísok duːténésinmang. 12 Bí sobennogla soːbolok i:ki gíaːnamang; émpigeːla bí lékkongko odokké appíːlokképé bík aíké iːdokki Angunpagyangkodoːpé gíaːto, odokké turyarné turnamdém ngolukképé paːbito. 13 Sobennogla so:bolok iːyém odokké soːnélok romnam médbom buluk tayéːlo tíkkadlígdo séːkobulu naréːmaːji, odokké édé bulum narémodagakui.d 14 Méngkangkítok Kiristok iːdé imur inamnokkém ngoluk méːloddém éddík bojéyaːngko narémobiyéku, odo ngolu turné Ruːnémé kumnaːyé. Kapéné turyarné Yaloké tornamki, Kiristobí aíém ngoluk paːb légaːpé lugéngkamaːné palígnampé Ruːnékolo tosaglíktag.
15 Odok-légaːpé Kiristobí anu luségdok pongkokké taniːdé, édémpila séːkobulum goktang bulu pesula léːbinam duːyarpéné panggodém paːyé. Kapéné séːkobulu aku luségdok kéíglo paːb iladungngan bulum dorpítkunam légaːpé Kiristobí sibikang.
16 Okolo adbisunamé duːji, édé adbisuné taniːdok sinamdém léngkanruːpaːdag. 17 Kapilaːné adbisunédé turra duːdagdo adbisunamdé agerro aːmang, bík sinam lédupakpé édé agerro aːdag. 18 Odok-légaːpé bipoːnam luségdémsin iːlok lédíloːpag agerro aːmoka. 19 Musiːbí luro:dok lulígnam appíːdém taniːappíːdém lukanbika. Odo bí soːbologla sobennok iːdém langgeːla édém asilo molusuka, odokké édém líːné ul-onnokila esub réngkéngki Luro potindogla taniːkídíːdok tayéːdo tíkkatka. 20 Odokké bí luto, "Sidé luségdok iːdé, okodém Ruːnébí noluk légaːpé lulíktag."e 21 Odokké édémíːpé, bí iːdokki poːyubdémna odok araːdok duːné kumnan attar appíːdok tayéːlo tíkkatka. 22 Aropésin, luro:dok lukampé appíngémei iːki narémodag, odokké íːyem bidlenmomaːmílo paːbém méːyinsubinammé kamang.
Kiristok Sibinamdé Paːbém Laːpuːbidag
23 Édémpila tayéːtok duːné attarém kaːyisunamkídíːdém, séː palígnamkídíːsokki narémopé idag, émpigeːla tayéːtok duːné attarém sémyang aiyaːné palígnamkídíːdokki narémodag. 24 Kapilaːné taniːlok alakki monam Angunnédoːpé Kiristobí gíaːmangngai, okodé aroné poːyubdok kaːyisula monaman. Bí tayéːtok du:nédoːpémín gíangkan, okolo bí suːpag ngolukképé ibila Ruːnék dungkodo dakkansubila dung. 25 Odokké bí aíém tosaglíktíkolo tayéːamoːpé gíamang, kapé abíngaryan mirídé appíng dítaglo íːyém bomaːla, okodé bík aíkémang Angunpagyangkodoːpé gíadon. 26 Édémpé inamkaːmílo moːpísém ruːlendokkébo bí bojé ayírkopé duːgém dopénammai. Émpigeːla suːpag bí lékkongko appíngké légaːpé gíngabné ayírdo aíém palíksubila paːbém laːpagbipé dakkansuto. 27 Léko appíngé sipaːruːyé, odokké odok lédupé Ruːnébí kébangém baːyé. 28 Édémarpé bojérungko taniːlok paːbém laːpagbidopé Kiristomé léko palíkto, odokké bí lékoda dakkansuyé, paːbém joːbinam légaːpémang, émpigeːla bím toyaːla duːnékídíːdém moturbinamém bombila gíyé.