Ngoluk Abíngaryan Mirídé Jisubí
8
Ngoluk lunam agomdok légaːdé séː Ngolukké sémpin abíngaryan miríko dung, séːko tayéːto ménggésupagya:nam migom-tetkodok lagbíkpé teddag. 2 Bí Angunpagyangkodo, édé aroruːné poːyubdo, mirí kísapé ager-gerdag, okodém taniːkokki ruːlenmang émpigeːla Ruːtumkokki ru:lentag.3 Mirí appíngém Ruːnémé amaném tosagbidopéla simíném palígbidopé tolíktag, édémpila ngoluk abíngaryan miríbíːsin oːkaiko tosaglíkpaːyé. 4 Bí moːdiso duːnamkaːmílo, bí mirípé ilaːdanmaːyai, kapéné luro:do adla léːnam kísapé amaném tosaglígné mirré duːbong. 5 Mirí kísapé buluk gernam agerdé tayéng-amoːto okko duːji odok kaːyisunamoːngkolang yallongé. Édémpila édílo Musiːbí poːyubdém diːsaːpé émna iton odo Ruːnébí bím lupangko luto, "Adi tayéːdo nom okkom léngkankan édém gésusuruːdopé appíːdém molang."a
6 Émpigeːla suːpag, Jisumé mirí-agerdém bitag, okodé bulukkédémyang bottéyaːdag, Ru:nékéla bík taniːkídíːdok pongkogdo bík ibinam luségdé kappar aiya:dang édémarpé aidag, kapilaːné édé aiyaném pesubinam tayéːlo dung.
7 Bipoːnam luségdo imuré kama:namkaːmílo, odo lékoda lusékko lagikumaːyaːboi. 8 Émpigeːla Ruːnébí taniːkídíːdo imurém paːla lutoː
"Ruːtumbí lukanbidung, ayírdé aːdobo,
édílo ngo Israelkéla Judaːké taniːkídíːdok lédílo anu lusékko ségyé.
9 Oko longédo ngo bulum alagdok sogabla édílo Ijibbokké gílenbokaku
édé buluk abukídíːdok lédílo ngok monam luségdémpé imaːyé.
Buluk lédílo ngok monam luségdo bulu arola duːtomang,
édémpila ngoːsin bulum asin-dígbitomang.
10 Ruːtumbí lukanbidung, édé ayírdok lédupé,
Israel taniːkídíːdok lédílo ngok mopénam luségdé sidé.
Ngok luro:ém ngo buluk aːpíbo ménggabmoyé
odokké édémbulum asindo adlígbiyé.
Ngo buluk Ruːnépé iyé,
odokké bulu ngok taniːpé iyé.
11 'Ruːtummé kintok' émna
séːkaibí bík kumrémmaːmílo
odokké taniːkoné bík bírokoném luyírpénam kamaːyébo,
kapéné amenélokké abínéloːpé,
bulu appíngé ngom kinyé.
12 Kapéné ngo buluk paːbém méːyinsubiyé
odokké buluk imurém méːpangkumaːbo."b
13 Séː luséksém bí "anu" émna lula, poːpékédém bí akuːpé imoto; odokké okodé akunéla betkaːbon édé lomdanna yogyé.