Abíngaryan Mirí Melkisedek
7
Édé Melkisedegbí Salemdok migomai odokké Kínggíːtariné Ruːnék mirrai. Migom appiːko mimaglo motabgeːla Abraambí gíladdokudodo, Melkisedegbí Abraammé ríksugeːla bím peyubito,a 2 odokké Abraambí bík bomkunam appíːdok íyíːdém bím bito. Melkisedegdok légíːdé "Arolok-duːné Migom"; odokké Salem migomdok légíːdé "Asin-ansíné Migom." 3 Melkisedekké abumanggom, anémanggom tokutaːto-yaːyokídíːdok amin adgabnammé kamang; bím onamdémna sinamdémsin adgabmang. Bí Ruːnék Aoːdémpé idag; bí loːdílongkípé duːyarpéné miríko.4 Méngkangkítok bí éddík bottén taniːkanǃ Guːmín Abraambí bím mimagmola paːnam appíːdok íyíːdém bika. 5 Suːpag luroːdok lulígnampé Lebiké ommangkídíːdé séːkobulu mirrén bulu buluk aíːtani, Israelkídíːdok, bulu Abraamké ommaːdaggom, bulukkolok íyíːdém urdag. 6 Séː taniːsé Lebiké aoːmangngai, émpigeːla bí Abraamkolok íyíːdém langgeːla bím peyubito, Abraambí Ruːnék pesubinamdém paːto. 7 Séːko abíyaːdagji bí ameyaːném peyubido odok tayéːlo méːmopénam kamang. 8 Miríkídíːdé séːkobulu íyíːdém urdang bulu taniyé, séːko sidang, émpigeːla Melkisedegbí bulumyang bottéyaːné kapilaːné bí turra dung émna ngolum lukanbitag. 9 Séːkai sémpésin lulaːdo, Lebibí séːko íyíːdém urdang, Abraamkokki bíːsin íyíːdém dorka, 10 kapilaːné édílo Melkisedegbí Abraammé ríksuton Lebibí bík tokutaːto-yaːyobuluk aki araːbo dungngai.
11 Lebia mirí-agerdokki kabonamdém paːlaːnamkaːmílo (Lebia mirí-agerdok tayéːlo luroːdém Israel taniːkídíːdém bitungai). Émpém kapila Aaron miríkémpé imaːné, akon mirí aːkoda lagikangkun, séːko Melkisedekkémpin miríkon? 12 Kapéné édílo mirí-agerém angumodoji, odo luroːdémsin angumopaːyé. 13 Sék tayéːlo séː agomkídíːsém lutang bí angu opínnok taniːko, odokké édé opíndokké siloloːpé mirípé runggudo agergerkímang. 14 Ngoluk Ruːtummé Juda opíndo otagai émnamdém nérkíkpé kindag, odokké édé opíndok tayéːlo Musiːbí mirí agergernam okkomsin lumang.
Melkisedeképin Akon Miríko
15 Doːyíːsé naréngoːyangkang; séːko Melkisedekkémpé idang, akon miríko lenkang. 16 Bím bík taːtoyaːyokídíːdok niyomkilang ilot-gílotki mirípé imomang, émpigeːla turnamkolok tornamki okodé duːyarpénékon odokki mirípé imotag. 17 Kapéné Ru:nék-gomugdé ludagː "Melkisedekkémpé, no loːdílongkípé duːyarné miríkopé iyé." 18 Akuné ilot-gíloddém laːpaktobo kapéné édé sipereːla ager-kamaːbo. 19 Kapéné Musiːké Luroːdé okkomsin kabodannép imolaːmang. Odokké suːpag aiyaːné akanamko bitag okodokki ngolu Ruːnék kéraːpé gíaːdo.
20 Odokké Ruːnék pesubinamé odo dungǃ Akonkídíːdé mirípé idodo sémpin pesubinamko kamangai. 21 Émpigeːla Jisubí pesunamkokki mirípé ikang édílo Ruːnébí bím sémpé lukanː
"Ruːtumbí pesubitag
odokké bík asiném angumokumaːyéː
'No loːdílongkíké miríko.'"
22 Séː pesubinamsokki Jisubí aiyaːné luségdok togésubinépé ikang.
23 Poːpé bojéruːngko akon mirré dungngai, bulu sila buluk agerdém geryarramangai; 24 émpigeːla Jisubí loːdílongkípé turyarnammé, odokké bík mirí kísapé gernam agerdém séːkomsin tokonsumaːyé. 25 Odok-légaːpé séːkobulu bíkkoki Ruːnékoloːpé gíaːdoji, bí bulum suːpaglang loːdísém moturbilaːdag, kapilaːné bí buluk légaːpé kumbipé émna loːdílongkípé turra dung.
26 Sémpin abíngaryan mirídé ngoluk laginamém bidag; bí angunndag, bím lugéːpénammé okkosin kamang, narédag, imurrokkém langutag, tayéng-amoːtémyang bím tayéyaːmotag. 27 Bí akon abíngaryan miríkídíːdémpé imang, bík aíké paːb légaːpéla taniːkídíːdok paːb légaːpé bí loːdém palíkpoːpénammé kamang. Édílo bí aíém tosaglíkton, odo bí palígnamém lékkongko odokké appíːlok légaːpé akkongko palíkto. 28 Luroːdé píːramné taniːyém abíngaryan miríːpé tolígdag; émpigeːla pesubinamdé, okodé lurodok lédupé gítang, Aoːdém tolíktag, séːkom loːdílongkípé kabodannép imotang.