6
Odok-légaːpé kajé ngolu Kiristoké tayéːlo luyírgotpoːnamkídíːdém mépaglaːboi odokké méːjubné taniːpé ilai. Ngolu lékoda agerkaman agerkídíːdokké méngkutsula Ruːnémé méngkésunamém isangkupé lagimang; 2 baptis laːnam tayéːlo, alag laksaːla kumnam tayéːlo, sinélok lékod-turkunamdo, odokké duːyarpéné kébaːdok agom tayéːlo luyírbinamkídíːdo koːkangoːpé ila duːyobo. 3 Kajé bottélaːboi, odokké Ruːnébí ngolum édémbulum tolígmílo ngolu ipé.4 Séːkobulu buluk méːjíksunamdém mépakton kapé lékoda bulum méngkutsunamnoːpé gíladbolaːyekun? Bulu Ruːnék píangém pangkítag; tayéːtok amaném ankítag odokké angunné yalomé gerjonsunépé ikítag, 5 bulu Ruːnék gomugdé aidag émna kindag odokké aːpéné aːdídok tornamém ankítag. 6 Bulu buluk méːjíksunamdém mépagmílo, bulum lékoda méngkutsukoloːpé gíladbokunamdé pagnam agermang, kapilaːné bulu lékoda Ruːnék Aoːmé kuruslo pídla amikanggaːlo anyisumodung.
7 Édílo amoːdé oyarné podoːlo jula aríg-inéké légaːpé ainé aːyém eːbidang, édé amoːdé Ruːnékolok ayang paːné. 8 Émpigeːla arígdo tangéla tanggomé saːmílo, amoːdokké ager kamaːbo. Édé Ruːnék penamém paːyé émna pésopénamé, odokké édém rompagyé.
9 Ngolu sémpé ludaggom, méːbomsunam ajonkídínga, ngolu noluk tayéːlo dakidanna lulaːdag. Ngolu kindag noluk moturbikunamdo nolukké aiyaːné peyubinamdé dung émna. 10 Ruːnébí méːmursunémang. Nolu ayaːla oko agerém bík taniːyém agerbila kaːdumsukaji odokké suːpésin kaːdumsutíla dun édém bí mitpanmaːyé. 11 Ngoluk akaːla duːnamdém aromonam légaːpé, nolu appíngé sémmípé léddardoːpé iyarra duːtoka émna ngolu méːdag. 12 Ngolu nolum loːbagné taniːpé imolíːmang, émpigeːla séːkobulu méngkésula oijosula duːji bulukkémpé ilang, odo okkom Ruːnébí pesula léːbitang édém nolu paːyé.
Ruːnék Pesubinamdé Arorungé
13 Édílo Ruːnébí bík pesunamko Abraamé pesubikan, odo bímyang séːkosin bottéyan kamaːla, bí aíké aminno pesubika. 14 Bí luto, "Ngo pesubidung ngo nom peyubiyé odokké bojérungko ommangém biyé."a 15 Abraambí araiaraipé toyaːto, odokké Ruːnébí okkom pesubitagan édém bí paːto. 16 Édílo ngolu pesubidon, ngolu ngolumyang bottéyaːnékolok aminno pesudo, odokké pesubinamdé lukerkaːmínsunam appíːdém méːyinsumodag. 17 séːkobulu bík pesubinamdém toríksuyéji, buluk légaːpé méːyinsubidag. Bík méːnamdém angumokumang émna Ruːnébí édém nérkíkpé kinmolíːdag; édémpila bí bík pesunamdo séː lusunamsém líktéːto. 18 Odo baːnyiko agomé dung, édém angumolangkumaːbo odokké Ruːnébí loːdém arrom ludag. Édémpila ngolu séːkobulu bíkkolo duːrasukkom paːtoji, ngoluk légaːpé mébinam akaːdém kínggípé bugapsula duːdopé ngolu kínggíné lusalígbinamko paːyé. 19 Ngoluk turnamsok légaːpé séː akaːla duːnamsé ngolukképé longgor kísapé dung. Sidé arorungé odokké éngun-étamang, édé sorkomnamdok lamkuké arapakké soyardoːpé gíaːdag, 20 okoloːpé ngolumyang gípoːya:la, Jisubí ngolukképé ila gíaːbito. Bí Melkisedekkémpé loːdílongkíké mirípé ikang.b