5
Abíngaryan mirí appíngém tani araːlokkém balendo odokké bulukképé ila bí Ruːnék kanggaːlo amaném tosagbidopélang paːb légaːpé palígbidopé bím tolígdo. 2 Bí aíésin bojérungkolo siperenammé, séːkobulu kinsuma:nélang imurnén bí buluk lédílo ajjisulaːdag. 3 Édémpila kappar bí taniːlok paːb légaːpé palígbidoji, bí bík aíké paːb léga:pésin palíkpaːdag. 4 Kapé Aaronmé Ruːnébí gokkaji, édémíːpé bímsin gokpaːyé. Séːkosin aíé bím abíngaryan mirípé tolíksulaːmang.5 Édémíːpé Kiristobí bík aíké tayéːlo abíngaryan mirípé inamdok luyitsunamdém laːlíksumang. Émpigeːla Ruːnébí bím luto,
"No ngok Aoːo;
silo ngo nok Abupé idung."a
6 Odokké bí okolaikolo lutag,
"No Melkisedekkémpé,
loːdílongkípé duːyarné miríko."b
7 Jisuké moːpíso turaduːdagdo, bí bottépé kabla kumnamémna kumpaːlígbinam miksédíla Ruːnémé lubika, séːko bím sikolokkém mopídbilaːdaggan. Bík kumnamém Ruːnébí tadbito, kapilaːné bí Ruːnékolo pésola ajjisuka. 8 Bí Ruːnéké Aoːai émgom, bík duːgdonamdokki bí agom-tadnamém iyírsuto. 9 Odokké édílo bím píːramkamaːnépé imoton, séːkobulu bík agomém-tadyéji bí buluk appíngképé turyarné moturbinamém pangkopé ibikang,c 10 odokké Ruːnébí bím Melkisedekkémpé, abíngaryan mirípé idopé lukannígbito.
Méːjíksunamém Mépagnékídíːdém Lupaːnam
11 Séː agomsok tayéːlo ngolukké bojéko lupénammé kadung, émpigeːla édém nolum lusarbinamdé airuːpé tordag, kapilaːné noluk tatkinnamdé airuːpé asoːdag. 12 Aropé lumílo nolu suːpag luyírnépé ipénammaːboi, émpigeːla nolum lékoda Ruːnék gomugdém posaːdokkébo poyírbinék lagiladung. Nolu torné apiném dokineimaːda, nolu suːpésin gakírém tíːladung. 13 Séːko gakírém tíːladuːji bí suːpésin koːkangé, okodé kabodang okodé kaboman édémsin kinmaːda. 14 Torné apindé méːjubnélokképé, séːkobulu ibom-gíbomnamki ainélogla aimaːnélog angunamdém kangkindang.