4
Ruːnéké pesubinam bík duːrasukodoːpé gíanamdé suːpaksin duːtídung, édémpila ngolu pésodanna totsupénammé, nolukkolok séːkomsin duːrasukodokké opagleddopé paːpélagimang. 2 Buluk tadnamíːdémpé, ngolu tatpon lutaddém tattag. Bulu doːyíːdém tatka, émdaggom bulukképé édé arrékatomang, kapilaːné édílo bulu édém tatton, bulu édém méːjíksula toríksumangai. 3 Ruːnébí kapé lula léːbitang; su:pag ngolu séːkobulu méngkésutagji édé duːrasukodoːpé gíaːdung,"'Bulu ngok duːrasukodoːpé édíloːsin gíamaːyé' émna
ngo aglíːla pesunamko pesuto"a
Moːpísém ruːdodoːboi bík agerém geramtag émgom bí sém luto. 4 Kapéné Ruːnék-gomuglo okolai sém kínídnané longédé émna lutag, "Ruːnébí kínídnané longédo bík ager appíːdokké duːrasuto."b 5 Séː agomíːsém bí tayéːto lékoda lutagː "Bulu ngok duːrasukodo édíloːsin gíalaːmaːyé."c 6 Séːkobulu tatpon lutaddém tadgéːpoːtoji bulu duːrasukodém paːtomang, kapilaːné bulu méngkésutomang. Émgom akke odo dungngai séːkobulum édém paːmoto. 7 Odok-légaːpé Ruːnébí longé akonko tosékto, oko longédém Silo émníkto. Édém kapé poːpé lutagaːji, bojéruːngko dítak lédupé bí Debitkokki lutakkuː
"Silo nolu bík gomugém tadbegduːmílo,
noluk asiném tormoyok."d
8 Josuaːbí bulum duːrasukodém bitagaːmílo, Ruːnébí lékoda lédupé akon longédok tayéːlo lukumaːyaːboi.
9 Édémpila Ruːnék taniːkídí:dok légaːpé suːsin anguruːné Yoddí longéko toyaːla dung; 10 Ruːnébí bík agerrokké kappar duːrasukaji, séːko Ruːnék duːrasukodo gíaːyéji, bíːsin bík aíké agerrokké duːrasuyé. 11 Odok-légaːpé kajé ngolu édé duːrasukodoːpé gíaːlaːnam légaːpé ilaːnam appíːdém aipé ilai, édémpimílo ngolukkolok séːkosin bulukkémpé méngkésumaːla opagledmaːyé.
12 Ruːnék agomdé turné agomé odokké édé lardag. Baːnyidokki palanam yoksakoném radyaːdag. Okolo yalobíːla iji-yalobí gípumsudang odokké okolo gantiéla mojjé gípumsudoji odoːpé níkpíːla gatpíːlaːdag. Édé ngoluk méːladuːnamémna ilíːnammém kindag. 13 Ruːnék kanggaːlokké ruːnam okkosin léːsilaːmang. Bík kanggapé appíngé léngkanamsula moːroːpé dungabdung. Odokké ngolu appíngé ngoluk gernamém bím lubiruːpaːyéku.
Jisubí Bottéruːné Abíngaryan Mirídé
14 Odok-légaːpé ngolukké bottéruːné abíngaryan miríko dung séːko tayéng-amoːtok gíkurragítag, bí Ruːnék Ao Jisubí, édémpila kajé ngoluk lusunam méːjíksunamsém ngolu kínggípé bugapsula duːlai. 15 Ngoluk abíngaryan mirídé ngoluk ipílaːmaːnamdo méːbimaːpé asoːpé duːnékomang. émpigeːla ngolum kapé ankaːduːji édémíːpé appíːlo ankaːnam abíngaryan miríko ngolukké dung, émgom bí paːbém imangai. 16 Édémpila kajé ngolu kinsudanna aséng biné Ruːnék migom-tetkodoːpé gíninsulai. Odo ngolu bík ayangém paːyé, odokké ngoluk lagido ayírdo kaːdumsunam aséng paːyé.