Jisubí Musiːméyang Bottéyaːné
3
Odok-légaːpé, angunné ajonkídínga, séːkobulum Ruːnébí tayéng-amoːtoːpé goktang. Jisumé méːmiːlaméːla duːlang, séːkom Ruːnébí ngoluk ludesunam méːjíkso abíngaryan mirípé ibidopé mélígbitag. 2 Bí Ruːnékolo arodaggai, séːko bím séː agersém gerdopé balentag, Musiːbí kappar Ruːnék okumdo bík agerdo arodaggan édémarpé bíːsin arodaggai.a 3 Okum moné taniːdé monam okumdémyang ménggésunamém paːyaːdag. Édémarpé Musiːméyang Jisubí ménggésunamém paːyaːdopé arrékaya:dag. 4 Kapéné appíng okumém séːkaibí modag, émpigeːla appíngém monédé Ruːnébí. 5 Ruːnék okumdo Musiːbí appíːloi agergerné kísapé arodaggai, aːpéné longékídíːdo Ruːnébí okkom luyéji édémbulum bí lukanbidagai. 6 Émpigeːla Kiristobí aoːkísapé Ruːnék okum tayéːdo arodag. Odokké ngolu ngoluk angpítala du:namsémna ngoluk akaːla duːnamsém okodok tayéːlo ngolu pugdasudoji édém sogabla léːmílo ngolu bík okumé.Ruːnék Taniːkídíːlok Duːrasukodé
7 Édémpila, kapé Angunné Yalodé lutang,
"Silo nolu Ruːnék gomugém tadbegduːmílo,
8 kapé noluk tokutaːtobulu Ruːnék kekonpé ikaji,
sullipotado odo longédo kapé bulu bím ankangkaji, édémpé noluk asiném tormoyok.
9 Ngo yíːlaːpi dítakko okkom ikan,
édém bulu kaːdaggom ngom bulu ankaːla kaːto.
10 Odok légaːpé ngo édé opedok tayéːlo aglíːla luto,
'Buluk asiné loːdísém gíyoddag,
odokké bulu ngok lambém kintomang.'
11 Édémpila ngok aglíːlo ngo pesuto,
'Ngok duːrasukodo bulu édíloːsin gíalaːmaːyé.'b
12 Ajonkídínga, totsulang, nolukkolo séːkkésin airuːpé aimaːnélang méngkésuman asiné kapé lagimang okodé nolum turné Ruːnékolokkém gíladbokupéké. 13 Émpigeːla édíloːpé édém "Silo" émna ludon, akoné akoném loːdém lusangkaːmínsulang, édémpimílo nolukkolok séːkomsin paːpké yadnamki asiném tormomaːyé. 14 Ngolu méːtinsuapoːdodok méːtinsunamdém léduduridoːpé méːtinsutíla duːmílo, ngolu appíngé Kiristokolo agergerjoné.
15 Ruːnék-gomugdé sémpé ludagː
"Silo nolu bík gomugém tadbegduːmílo,
kapé Israelkídíːdé sullipotado odobulu bím ankangkaːji,
édémpé noluk asiném tormoyok."
16 Séːkan bulu séːkobulu Ruːnék gomugém tadgeːla bík kekonpé dagropkan? Édé appíːdé bulumangnganei séːkom Musiːbí Ijibbokké gílenbokaku? 17 Sék tayéːlo Ruːnébí yíːlaːpi dítakko aglíngkan? Bulumannganei séːkobulu paːbém ikan, séːkobuluk simangé sullipotado érserradungngan?c 18 Odokké séːkom Ruːnébí pesula luton bulu édíloːsin bík duːrasukodo gíalaːmaːyé? Bulum, séːkobulu bík agom-tadmangan. 19 Buluk méngkésumaːnam légaːpé bulu gíalaːtomang, édém ngolu kaːbegdung.