Bottérun Moturbikunam
2
Odok-légaːpé ngoluk tatpaːsunam arodém ngolu aipé tadmi:la tatpé lagidag, édémpimílo ngolum odokké sarpagbomnamaːyé. 2 Ngoluk tokutaːtobulum tayéng-yaːmeki binam doːyíːdé arro émna léngkanbitagai, odokké séːkobulu édém itosinmang odokké tattosinmang, bulu buluk paːpénam mokemoramém paːto. 3 Ngolu kinman-séumomílo, émpém kapé, síddín botténé moturbinamsokké ngolu dukpítsuyén? Ruːtumbí aíé séː bottéruːné moturbinamsém lukanbigotpoːtag, odokké séːkobulu bík lunamdém tattang édé agomdé arro émna bulu ngolum léngkanbitag. 4 Ruːnébíːsin kanggotki, méːpílaːmaːnam agerki, odokké Angunné Yaloké amankídíːdém orbinamki bík méːnampé édém arro émna lukanbitag.Moturbikodoːpé Ngolum Gíbonédé
5 Ruːnébí aːpéné anu moːpídok tayéːdo tayéng-yaːmeyém migompé tolígmang, oko moːpídok tayéːlo ngolu agomém lula duːji. 6 Émpige:la Ruːnék-gomugdo okolai attagː
"O Ruːné, taniyé okkon, no buluk légaːpé méːbipé ikan;
bulu émmum taniyé, no bulumyé kaːsípénamén?
7 No bím ajjiou ayír légaːpé tayéng-yaːmekídíːdémyang ajjiyaːmoka;
no bím unjíkkila ménggésunamki dumlubém kublíkka,
8 odokké appíːlok tayéːlo no bím migompé imotag."a
Sémpé lunamko dung, Ruːnébí bím "appíːlok tayéːlo migompé imotag;" séː lunamsok araːdo appíngé aːngabdag. Émgom suːpag appíːlok tayéːlo bí migompé dola duːnamdém ngolu kaːbegmaːda. 9 Émpigeːla ngolu Jisum kaːpaːdung, séːkom ajjiou ayír légaːpé tayéng-yaːmekídíːdémyang ajjiyaːmoto, édémpila Ruːnék aséːlo bí appíngké légaːpé sibipaːyé. Bí duːgém dola sibinamdok légaːpé bím unjígloːla ménggésunamno dumlubém kublígbinamdém ngolu suːpag kaːpaːdung. 10 Séːkképéla séːkkoki moːpísok appíngé turradung, bojéko ommangém bík unjígdoːpé gíabonam légangé, bulum moturbinamém binédém duːg donamdokki píːramkamaːnép imoto, kapilaːné édé bíkképé kabodaggai.
11 Bí taniːyém buluk paːblokkém mopubidag, odokké bíːlang séːkobulum mopubitang buluk appíngké Abudé atérongko. Édémpila Jisubí bulum éraːtani émna gokpénamdém anyisumang. 12 Bí Ruːnémé luto,
"Nok aminém ngo ngok bírrangkídíːdém lukanbiyé;
buluk gíkumsukodo ngo nom luyitsubiyé."b
13 Bí lékoda lutoku, "Ngo Ruːnémé méːtinsuyé." Odokké bíːíng ludag, "Ruːnéké ngom binam ommangkídíːdok lédílo ngo sidé dung."c
14 Bík ommang émna lunamkídíːdé adin-amíréla iːlok taniyé, Jisubí aíé bulukkémpé ila bulum gésumínto. bík sinamdokki Uiːmé séːkké sinam tayéːlo tornamé duːji, bím momíglaːyépé émna méːla bí édémpé gésumínto, 15 odokké édémpé séːkobulu buluk turdag appíːdo sinamém pésola pagbopé iladungngan, bulum motubitoku. 16 Édé arro, bí tayéng-yaːmeyém kaːdumsumangai, émpigeːla Abraamké ommangkídíːdém kaːdumsuka. 17 Odok légaːpé bím bík taniːkídíːdémpé appíːloi imopé ikang, édémpila bí Ruːnék agerro asin-ainéla aroné abíngaryan mirípé ibikang, séːko taniːkídíːdok paːbém laːpagbidopé palígnamém palígbidang. 18 Odokké suːpag séːkobulu ankangém paːla duːji bí bulum kaːdumsulaːdag, kapilaːné bíːsin ankangémna ngasodém paːsutag.