Ibri
Ibrikídíːdoːpé Adlígnam Doːjígdé
Jisu Kiristobí Ruːnék Aoːo
1
Lekkem Ruːnébí ngoluk tokutaːtobulum lungor-lunékídíːdokki bojé ayírko bangkí bangkín lambéki lubidaggai, 2 émpigeːla suːpakké gíngabdí longékídíːso bí bík Aoːdokki ngolum lubitag. Ruːnébí bíkkoki moːpísém ruːtag, odokké bím appíːlok panggopé tolíktag. 3 Aoːdé Ruːnék unjígdém unjígmodag odokké bí Ruːnénarmé gésusuruːdag, bík torné gomugdokki bí moːpísém turmola léːtag. Bí appíng taniːlok paːbém pídebinam lédupé, tayéng-amoːto Ruːnék lagbíkpé ménggésukodo tetkang.Ruːnék Aoːké Kínggínamdé
4 Édémpila Ruːnék bím binam amindé kapé bulumyang kínggíyaːdagji, édémarpé Aoːdém tayéng-yaːmekídíːdémyang kínggíyaːmoto. 5 Ruːnébí édíloːsin bík tayéng-yaːmekídíːdok akoném sémpé lukímang,
"No ngok Aoːo
silo ngo nok Abupé ikang."
Odokké tayéng-yaːme tayéːlo Ruːnébí sémpésin lukímang,
"Ngo bík Abupé iyé
odokké bí ngok Aoːpé iyé."a
6 Émpigeːla édílo Ruːnébí bík obopoːlum Aoːdém moːpísoːpé mélíkpé itoji odo bí luto,
"Ruːnék tayéng-yaːme appíngé bím kumpaːruːyé."b
7 Émpigeːla tayéng-yaːmekídíːdok tayéːlo Ruːnébí luto,
"Ruːnébí bík tayéng-yaːmeyém ésar kísapé mélígdag
odokké bík pagbo tayéng-yaːmekídíːdém dorné umí kísapé mélígdag."c
8 Émpigeːla Aoːdok tayéːlo bí luto,
" O Ruːné, Nok migomdokodé, loːdí-longkípé duːyaryéǃ
No nok tani tayéːlo aroki migomdoyé.
9 Okko kabodagji no édém aipé-méːdag odokké okko kabomaːji no édém tayumdag.
Odok-légaːpé Ruːné, nok Ruːnébí, nom balentag
odokké bí nom nok duːjonkídíːdémyaːsin airuːpé kínggíyaːné
ménggésunam méːpom bitag."d
10 Bí Ao:démsin luto ,
"Ruːtuma, no, lendo-aːdodo moːdisém ruːtag,
odokké nok aíké alakki no tayéng-amoːtém molentag.
11 Bulu yogyé, émpigeːla no duːyaryé;
bulu appíngé génam galug kísapé akupagyé.
12 No bulum gasor kísapé piryé,
odokké bulum pítpagla anguné génamém géyeku.
Émpigeːla no loːdísém lékkola duːyaryé,
odokké no loːdí-longkípé duːyarnédé."e
13 Ruːnébí édíloːsin bík tayéng-yaːmekídíːdok akoném lukímangː
"Ngok lagbíkpé tetta
édíloːpé ngo nok mirukídíːdém
nok alé kéígdo alélégépé imomaːyéji."f
14 Émpém, tayéng-yaːmekídíːdé okkon? Bulu Ruːnéké agergerbin yallo odokké séːkobulu moturbikunamém toríksuyéji bulum kaːdumsudopé bí bulum mélígdag.