Aimaːnédé
2
Ajonkídínga, ngoluk Ruːtum Jisu Kiristoké gílatkunam odokké bím ríksukolo ngoluk gíkumsunamdém, nolum kumdanna lubidung, 2 noluk méːnamno émmumpésin méːmursula duːyok odokké Ruːtumké Longédé angkaːbo émna méːdíryok. Séːkkaiké yalokimanggom, séːkkaiké lunamki odokké ngolukkosoːkké gíné doːjíkki émna amme ménggom nolu méːdíryok. 3 Nolu séːkomsin kapésin yatkosuyok; kapéné édíloːpé édé agom-tadmaːnédé gípoːmaːji, odokké luro-kamaːné taniːdé lenmaːyéji, séːkobí sikoloːpé gípénédén, odoloːpé édé longédé aːmaːyé. 4 Taniːlok kumnam odokké ruːnékídíːdok kekonpé dagrobla bí aíém luyitsuyé, édémpila bí Ruːnék kumliːdo tedgeːla bí aíé Ruːnébí émna lugoːsubiyé.5 Édílo ngo noluk lédílo dungngan odo odogbuluk légaːpé lubika, édémbulum méːpaːdoyé? 6 Odokké suːpag okko bím motumna léːtang édém nolu kindag, édémpila bí bík aíké ayírrado léngkansuyé. 7 Luro-kamaːnédok kinpíːmaːnam tornamdé agerém gerraduːbo; odokké édíloːpé bím bík lambédokké gíyodmomaːyéji, bím motumna léːnébí bím motumtíyé. 8 Odok lédupé luro-kamaːnédém gílenmoyé, séːkom Ruːtum Jisubí bík nappaːdok ngalenamkilaː bík unjígla gílatkunamdokki mokeyé. 9 Uiːké tornam katéla luro-kamaːné taniːdé gíyé odokké bí takam aroman kínggíné agerém geryé, méːpílaːmaːnam kanggodémna kinpíːlaːmaːnamém léngkanyé. 10 Odokké yokpénékídíːdém appíng aimaːnamki yadamyé, kapilaːné bulu arodém aipé-méːtomang okodo moturbinammém paːmodoji. 11 Odok légaːpé Ruːnébí buluk tayéːlo kínggín méːmursunamko mélígyé, édémpila bulu aromaːném méngkésuyé. 12 Séːkobulu arodém méngkésumaːpé igeːla aiman agerém méːpoméngganna gerton, bulum appíngém mokemoramyé.
Nolum Moturbinamém Paːdopé Balentagyé
13 Émpigeːla, ngolu noluk légaːpé ajonkídínga, Ruːnébí séːkom ayaːdang, bím loːdísém aipai bipénampé idag. Kapilaːné yaloké mopubinamki odokké arodém méːtinsunamno, lendo-aːdodokkébo moturbikunamdém paːdopé Ruːnébí nolum balentag. 14 Ngoluk tatpon lutaddokki bí nolum soːpé goktag, édémpila nolu ngoluk Ruːtum Jisu Kiristoké unjígnamdém paːmínyé. 15 Édémpila, ajonkídínga, dagrasula duːtílang odokké ngoluk luyírbinamkídíːdém nolu ménggabla duːlang, okodém ngolu agomki manggom doːjíkki luyírbika.