2 Tisolonia
Tisolonia Taniːkídíːdoːpé Polké Adnam Bornyinané Doːjíg
1
Ngo Pol, odokké Sailas odokké Timotibí,Tisolonika kumgodok méngkésunékídíːdoːpé, séːkobulu Ruːné ngoluk Abukoloːlaː Ruːtum Jisukolo dun bulukkoloːpé séː do:jíksém adlígdungː
2 Ruːné Abubíːla Ruːtum Jisu Kiristobí aséngémna asin-ansíngém nolum bikaːlangka.
Aipai Bigeːla Kumbinam
3 Ajonkídínga, noluk légaːpé ngolu Ruːnémé loːdísém aipai bipéruːnammé édémpila ngolu bido odokké édé kaboné ageré, kapilaːné noluk méːjíksunamdé poːpékémyang kínggí kínggíyaːla gídung, odokké noluk appíngké akonké légaːpé asinang-omínsunamdé bojéyaːla gídung. 4 Odok-légaːpé, ngolu Ruːnék kumgokídíːdo nolum luyitsudo. Kapé nolu appíng ngasodloːlaː ipusire araːdo dagrasulduːla méngkésutíton.
5 Ruːnék baːpénam kébaːdé arorungé émnamdém sidébulu léngkanbidag, odokké odokki nolum bík migomdokodokképé arré kadag émna sabyé, okodok légaːpé nolu ipusireyem paːdun. 6 Ruːnébí arodag séːkobulu nolum ngasodém biduːji bí bulum ngasodém biladruːyéku. 7 Odokké bí ngasodla duːné nolum odokké ngolumsin méːsarém biyé. Édílo Ruːtum Jisumé bík kínggí-taríːné tayéng-yaːmekídíːdok lédílo dorné umílo doːmírtokké léngkanbiyén odo sém ibiyé. 8 Séːkobulu Ruːnémé lupaksuyéji odokké ngoluk Ruːtum Jisu Kiristoké tatpon lutad lubinamdém tadmaːyéji bí bulum mokemoramyé. 9 Bulu loːdílongkípé mokemoramém paːyartíyé, odokké bulum Ruːtumké kéraːdokkélaː bík kínggíné unjígdokké moːtéːpé langéryé. 10 Édílo bí gíyékuji odo longédo, bí bík angunné taniːkídíːdogla séːkobulu méngkésudagji buluk appíngkolok luyitsunamém paːyé. Odok araːdo nolusin duːtémíndung, kapéné bík légaːpé ngolu okkom nolum lubikan édém nolu méngkésutag.
11 Édémpila ngoluk Ruːnébí nolum bík gognamdo arré kadag émna sabdopé, odokké bík tornamki noluk takam ainé agerém bí ilet-gíledbidopé odokké noluk méːjíksunamdé oko agerém gerpé méːla duːji édémbulum gerredmodopé, ngolu loːdísém noluk légaːpé kumbido. 12 Édémpé ngoluk Ruːnékéla Ruːtum Jisu Kiristok aséːlo, ngoluk Ru:tum Jisuk amindé luyitsunamém paːyé, odokké nolusin bíkkolok luyitsunamém paːyé.